Mo Gumatua ena Yaloqaqa, Kaukauwa, kei na iTaviqaravi

Mai vei Bishop Gary E. Stevenson

Bisopi Vakatulewa

Mo ni sa vakataki ira na 2,000 na cauravou sotia ena nodra yaloqaqa vaka-lewe ni matabete kilikili ka gugumatua.

Ena bogi nikua au na vosa vakatabakidua tiko vei ira na cauravou, o ira na lewe ni Matabete iEroni, era lako vata mai ena veiyasai vuravura taucoko ki na soqoni raraba oqo ni matabete. Au na wasea vei kemuni na italanoa mai na iVola i Momani baleti Ilamani kei ira na 2,000 na nona cauravou sotia. Eda na kila vakavinaka kina mai na ivolanikalou oqo na kedra ituvaki o ira na cauravou oqo ni gauna makawa—ka veivakauqeti vei kemuni, na cauravou ni gauna oqo. Meu cavuta mada e dua na ivolanikalou taleitaki: “Ia era sa cauravou bulabula kece ka yaloqaqa; io era sa icegu bula ka kaukauwa vinaka tu; me kena ikuri, era sa vakayacora ena yalodina.”¹ Yaloqaqa, kaukauwa, itaviqaravi, kei na dina—sa ituvaki ni bula taleitaki dina!

Au gadreva meu raica mada na imatai ni ituvaki ni bula e vakamacalataki ira: “gumatua ena yaloqaqa.” Vei au, oqo e vakamacalataka na nodra yalodina na cauravou mera yaloqaqa ena cakava na ka dodonu, se me vakataka na ivakamacala i Alama, mera “vakadinadinataka na Kalou ena veigauna kecega … kei na veivanua kecega.”² E sega ni wili rawa na veigauna ni nodra vakaraitaka kina na 2,000 na sotia cauravou oqo na nodra yaloqaqa. Ena yaco talega vei kemuni yadua na veigauna bibi vakaoqo ena nomuni bula e gadrevi kina na yaloqaqa. A wasea vei au o noqu itokani, o John, e dua vei ira na gauna vakaoqori ena nona bula.

Ena vica na yabaki sa oti a vakadonui o John mai na dua na univesiti rogo mai Japani. Ena oka tiko o koya ki na dua na nodra parokaramu ni gonevuli ni veimatanitu eso vata kei ira na gonevuli vuku mai na veiyasai vuravura. Eso era curu ena inuinui mera vakatitobutaka na nodra kila vakavinaka na itovo kei na ivosavosa, ka so era raica ni sa ikakalawa ki na dua na kila vakavuku ka cakacaka e Japani, ia era sa biuta mai na nodra vale mera laki vuli ena dua tani tale na matanitu.

Oti vakalailai ga na nona yaco yani o John, sa tukuni wavoki sara yani vei ira kece na gonevuli vulagi ni na vakayacori tiko e dua na pati ena tabavale e cake ni dua na itikotiko vakaitaukei—na veisureti raraba me ia kina na veikilai. Ena yakavi oya, ratou sa gole sara yani o John kei na rua tale na itokani ki na vanua sa tukuni tiko.

Ni oti na nodratou vodo eleveita ki na fuloa e cake ni vale oya, ratou sa qai muria cake yani o John kei rau na nona itokani na ikabakaba qiqo me yaco ki na tabavale e cake ka ratou laki veicurumaki sara kei ira e kea. Ni sa bogi levu, sa veisau na mua. Sa toso cake na veivosaki, rorogo ni vakatagi, kei na gunu, ka vakakina ni sa yamasamasa o John. Vakasauri ga e dua vei ira sa vakasokomuni ira na gonevuli mera tu wavoki mera na kana tavako mariwana. A vakaveveku mata o John ka tukuna vakatotolo sara vei rau na nona itokani me ratou sa gole. A veivakatanini mai e dua vei rau, ka kaya mai, “John, e rawarawa tu ga—eda na tucake wavoki ga, ni sa yaco mai vei kedatou, tou solia ga yani ka kakua ni kania. Ni va oya tou na sega ni vakamaduataki kedatou e matadra me tou gole yani.” E rogorogo rawarawa oqo vei John, ia e sega ni rogorogo dodonu. Sa kila tu o koya ni sa dodonu me tukuna na lomana ka vakayacora. Ni oti a vakayaloqaqataki koya ka tukuna vei ira ni sa rawa mera cakava ga na ka oya ia sa na gole ga o koya. E dua vei rau na itokani sa nanuma me sa tiko ka oka ki na tu wavoki oya; o kena ikarua sa mani muri John yani vakacudrucudru i ra ena ikabakaba me rau vodo ena eleveita. E rau kurabui, ni gauna e dola kina na katuba ni eleveita, era sa curu mai tuba na ovisa ni Japani, ka lako siviti rau, ka ra lako yani vakatotolo ki na ikabakaba ki na tabavale e cake. Rau a vodo ena eleveita o John kei nona itokani ka gole yani.

Ni ra sa yaco yani na ovisa ena kabakaba e cake, era ulataka sara vakatotolo na gonevuli na waigaga mai delanivale mera kakua kina ni tobo. Ni ra sa latia oti na kabakaba na ovisa, era sa qai tuvai yadudua na gonevuli ena tabavale e cake ka tukuna vei ira yadua mera dodoka na ligadra ruarua. Era sa qai lakova yani na laini na ovisa, ka vakamaqosa sara na nodra boica na nodra idomidomi kei na idusidusi ni qaqalo yadua na gonevuli. O ira kece era a taura na mariwana, era kania se sega, sa vakadeitaki ni ra sa cala, ka levu sara na kena revurevu. Voleka ni o ira kece na gonevuli, era a tiko ena tabavale e cake era a cemuri mai na nodra dui univesiti. O ira era a vakavuna na vakayagataki waigaga oya era a totogitaki vakalawa ka cemuri laivi mai Japani, ka dredre mera lesu e kea me vuqa na yabaki. Na tatadra ni vuli, na veiyabaki ni vakavakarau, kei na kena rawati na cakacaka ena veisiga ni mataka mai Japani sa mai vakarusai vakatotolo sara.

Ia meu tukuna mada vei kemuni na veika a yaco vei iratou na le tolu na veitau oqo. Na itokani a tiko lesu yani ena tabavale e cake a cemuri mai na univesiti mai Japani ka a cakacakataka tu mai vakaukauwa o koya me curu kina ka sa mai lesu i nodratou vale. Na itokani a biuta na pati ena bogi oya vata kei John a vakacavara na nona vuli e Japani ka laki yaco sara me rawata na koroi eso mai na rua na univesiti cecere mai Amerika. E vakauti koya lesu ki Esia na nona cakacaka, ka marautaka sara na nona rawa-ka cecere vakacakacaka. Me yacova mai nikua e dau vakavinavinakataka tu ga na ivakaraitaki ni yaloqaqa nei John. Ia o John, na isau vinaka ni nona bula sa sega ni wili rawa. Na nona tiko mai Japani ena yabaki oya a laki vakamau sara ena marau ka mani rua sara na luvena tagane. Sa yaco sara me daunibisinisi rawati koya ka dua na gauna sa oti sa laki parofesa sara ena dua na univesiti mai Japani. Vakasamataka mada na kena rawa ni laki duidui na nona bula ke a sega ni yaloqaqa me biuta na pati ena yakavi bibi oya mai Japani.³

Ra cauravou, ena yaco na gauna eso vei kemuni, vakataki John, mo ni na vakaraitaka kina e matanavotu na nomuni yaloqaqa dodonu vei ira na nomuni icaba, ko ni na rawa ni vakacacani se vakamadualaki kina. Me kena ikuri, ena nomuni vuravura, na veisaqasaqa kei koya na meca ena valuti vakanomodi toka ga, ena dua na buca ni valu vakatikitiki e mata ni dua na sikirini. Na tekinolaji kei na kena yaga e kauta talega mai na ibolebole eso era a sega mada ni sotava na itabatamata se bera oi kemuni. E kunei ena dua na vakadidike raraba sa oti ni o ira na itabagone nikua era sega walega ni temaki vakalevu sara ena veisiga yadua e koronivuli ia e yaco talega ena initaneti. E kunei ni o ira na itabagone era raica tiko na gunuvi kei na vakayagataki ni waigaga ena veivanua ni veimaliwai vakatamata ena vakatolu se vakavataki na nodra rawa ni vakayagataka vakakina. Ena nona vosa baleta na vakadidike oya, a kaya kina e dua na sekeriteri vakacegu ni kebineti e Amerika: “Na vakadidike ni yabaki oqo e kunea rawa e dua na veivakauqeti vakaicaba kaukauwa—oya na veivakauqeti vakaicaba ni livaliva. Na veivakauqeti vakaicaba livaliva e uabaleti ira yani na itokani kei ira na gone era dau veimaliwai vata tiko. E curubotea yani na itikotiko kei na nona rumu ni moce o gone ena Initaneti.”⁴ Na vakaraitaki ni yaloqaqa dodonu ena wasoma toka ena dreve mo na kiliki se kakua ni kiliki. Era vakavulici na daukaulotu mai na Vunautaka na Noqu Kosipeli, “Na veika ko digitaka mo vakasamataka ka kitaka ni ko tiko taudua ka vakabauta ni sega ni dua e vakaraici iko tiko sa na ivakaraitaki kaukauwa ni nomu bula dodonu.”⁵ Mo yaloqaqa! Mo kaukauwa! “Mo tudei ka kakua ni yavalati rawa.”⁶

Ra cauravou, au sa yalataka ni na vakaukauwataki kemuni na Turaga. “Ni sa sega ni solia mai vei keda na Kalou na yalo ni rere; a yalo ni kaukauwa ga.”⁷ Ena saumi kemuni ena vuku ni nomuni yaloqaqa kei na itovo savasava—ena marau kei na reki. Na yaloqaqa vakaoqo ena yaco me vua ni nomuni vakabauti Jisu Karisito kei na Nona Veisorovaki, nomuni masu, kei na talairawarawa ki na ivakaro.

E kaya kina o Peresitedi N. Eldon Tanner: “E rawa ki vua e dua na cauravou gone ena lomanibai ni koronivuli me veivakauqeti vakalevu sara ki na veika vinaka. Sa rawa vua e dua na cauravou ena timi ni veicaqe, se univesiti, se vei ira e cakacaka vata tiko, me bulataka na kosipeli, doka na nona matabete, ka tutaka na ka dodonu, me na levu na nona caka vinaka. Ena so na gauna ko ni na sotava na veivakacacani kei na veivakalialiai mai vei ira saraga era vakabauta vata kei iko, e dina ga ni ra na rairai doka na nomu caka dodonu. Ia mo ni nanuma tiko ni a vakararawataki na iVakabula, vakalialiai, kasiviti, ka lauvako baleta ni sega ni gole tani mai na nona dina. Ko ni sa bau tu mada vakadua ka vakasamataka na cava beka ena yaco ke a malumalumu ka kaya, ‘Na cava na betena?’ ka biuta na nona ilesilesi? Eda vinakata beka meda dausorosoro, se meda italai gugumatua se vakacava ga na taucoko ni veisaqasaqa kei na ka butobuto ena vuravura oqo? Meda sa qai yaloqaqa ka tucake yani meda wili vaka-tisaipeli dina ka qaqa i Karisito.”⁸

Au sureti kemuni mo ni sa vakataki ira na 2,000 na sotia cauravou ena nodra yaloqaqa vaka-lewe ni matabete kilikili ka gugumatua. Mo ni nanuma tiko, na ka o ni cakava, na vanua o ni lako kina, kei na veika o ni raica ena bulia na kemuni ituvaki. O cei o ni vinakata mo ni vakataka? Yaco mo ni dikoni bula kilikili, ivakavuvuli bula kilikili, bete bula kilikili. Tuvanaka e dua na inakinaki mo kilikili kaya ni ciqoma na nomuni cakacakatabu vakalotu e tarava ena yabaki donu ka yaco mo ni ciqoma sara na Matabete i Melikiseteki. Oqo na sala ni bula dodonu e dau sureta mai na veivuke vakalou. E kaya kina na Turaga, “Ia na ilesilesi oqo sa vakatakilai mai kina na kaukauwa va-Kalou.”⁹

Ena dusimaki kemuni o ira na itubutubu, iliuliu ni matabete, kei na veika vakaliuci vakaparofita era kune tiko ena iTavi Vua na Kalou kei na Me iSakisaki ni iTabagone.

E vakasalataka o Peresitedi Thomas S. Monson ena dua na gauna sa oti:

“Ni vinakati me vakayacori vakavuku na [vakatulewa], e gadrevi kina na yaloqaqa—na yaloqaqa mo kaya sega, na yaloqaqa mo kaya io. …

“Au vakamasuti kemuni mo ni vakadeitaka sara ga oqo, mo ni kakua ni gole tani mai na salatu e mua ki na noda inakinaki: na bula tawamudu vata kei na Tamada mai Lomalagi.”¹⁰

Me vaka ga ni ra a vakaio na 2,000 na sotia cauravou ki na nona cibi na nodra iliuliu, o Ilamani, ka muataka mera yaloqaqa gugumatua, sa rawa mo ni cakava talega ena nomuni muria na nomuni parofita iliuliu, o Peresitedi Thomas S. Monson.

Kemuni na noqu lewe ni Matabete i Eroni, au mai tinia niu vakadinadinataka na Kalou na Tamada kei Jisu Karisito kei na vosa nei Josefa Simici: “Oi kemudou na wekaqu, dou yaloqaqa ka ia tikoga ki liu; io dou ia tikoga mo dou rawata na qaqa!”¹¹ Ena yaca i Jisu Karisito, emeni.