Na iMatai ni iVakaro Cecere
Ena gadrevi meda bula ena gugumatua vakatisaipeli me ivakaraitaki ni noda lomana na Turaga.
Au lomani ira vakalevu na lewe tinikadua na iapositolo era a bula salamuria yani na mate ni i Vakabula kei vuravura me vakatauvatani kei na dua tale na ilawalawa tamata era a bula rawa. Au vakasamataka ena so na gauna ni da guilecava na nodra lecaika tu kei na nodra a vakararavitaka vakatabakidua tu na veika me baleti ira vei Jisu. A kaya o Koya me baleti ira, “Niu sa tiko dede vakaoqo kei kemudou, ko sa sega li ni kilai au … ?”1
Ia, vei ira a se sega sara ga ni bau dede na Nona a mai toka vata kei ira. Tolu na yabaki e sega ni balavu sara me ra kacivi rawa kina na lewe taucoko ni dua na Kuoramu ni iApositolo Le Tinikarua mai na kedra maliwa e lewe vica wale ga na curu vou, vakasavasavataki ira mai na cala ena ilakolako makawa, vakavulici ira ena veivakurabuitaki ni kosipeli i Jisu Karisito, ka qai laivi ira me ra tomana tiko na cakacaka me yacova nodra a vakamatei tale ga. Sa dua dina na ituvatuva veivakurabui kivei ira e dua na ilawalawa italatala qase tabaki vou.
Vakabibi ena nodra sa mai biu vakataki ira tu yani. Vakavica nona tovolea tiko o Jisu me tukuna vei ira ni na sega ni tiko vakayago vata kei ira, ia a sega ni rawa vei ira se ena sega ni rawa me ra ciqoma vakarawarawa e dua na vakasama moici vaka o ya. A vola vaqo o Marika:
“Ni sa vakavulici ira na Nona tisaipeli ko Koya, ka kaya vei ira, Sa voleka na nona soli yani na Luve ni tamata ki na ligadra na tamata, ka ra na vakamatea, ia ni sa vakamatei, ena qai tucake tale mai ena ika tolu ni siga.
“A ra sa sega ni kila na ibalebale ni vosa ko ya, a ra sa rere ni tarogi koya.”2
Ia, ni oti ga e dua na gauna lekaleka ni vuli kei na gauna lailai wale ga ni vakavakarau, a yaco na ka a sega ni vakasamataki se vakabauti me rawa ni yaco. A lauvako na nodra Turaga ka iVakavuvuli, nodra Daunivakasala ka Tui. Sa mai cava na Nona ilesilesi vakayago, kei na Lotu lailai tatadredre a tauyavutaka, sa na mai vakalewai matemate tu yani ka vakanaulu ki na kawaboko. Era a vakadinadinataki Koya kei na Kena ituvaki ena tucaketale na Nona iApositolo, ia oqori e vakalevutaka ga na nodra veilecayaki. Ena nodra mai lomatarotarotaka tiko yani se, “Na cava meda cakava ena gauna oqo?” era a vakasaqara na kena isau vei Pita, na iApositolo iliuliu.
Au kerei kemuni ena gauna oqo mo ni solia vei au na galala meu vakamacalataka ena vosa ka sega ni kunei ena ivolanikalou na ka era veivosakitaka. Sa yaco kina, me kaya vakaoqo o Pita vei ira na nona itokani: “Kemuni na taciqu, sa dua na yabaki tolu lagilagi dina. E sega ni dua vei keda e rawa me a raitayaloyalotaka ena vica walega na vula leleka sa oti na caka mana eda sa mai raica kei na veika vakalou eda sotava ka da sa rekitaka. Eda sa veitalanoataka vata, masulaka vata, ka cakacakataka vata kei na Luvena sara ga na Kalou Vakaikoya. Eda a lako vata kei Koya ka da tagi vata kei Koya, kei na iotioti ni bogi vakarerevaki ko ya, e sega ni dua a tagi vakabibi vakalevu cake sara me vakai au. Ia sa oti yani o ya. Sa vakacavara o Koya na Nona cakacaka ka sa tucaketale mai na ibulubulu. Sa cakacakataka oti o Koya na Nona, vakakina na noda vakabulai. Ia mo taroga, ‘Na cava meda cakava ena gauna oqo?’ Au sega ni kila se cava tale meu tukuna vei iko mai na nomu lesutale ki na nomu bula makawa, ena reki. Au gadreva meu ‘sa laki qoli.’” Ka yaco me lewe ono mada ga mai na vo ni lewe tini na iApositolo era a duavata ena nodra kaya, “Edatou na lako tale ga kei iko.” O Joni, e dua vei ira, e vola, “Eratou sa lako yani, ka vodoka sara na waqa.”3
Ia, e ka ni rarawa, ni a sega soti ni vinaka na qoli. Na imatai ni bogi nodra lesu tale ki na drano, e sega ni dua na ka era qoliva—sega mada ga ni bau dua na ika. Ni kida na mataka, era sa gole ena yalorarawa ki na matasawa ka ra raica e dua na tamata ni tu mai vakayawa ka kacivi ira tiko yani, “Ragone, sa tu vei kemudou na kakana, se segai?” Ena yalorarawa o ira na iApositolo oqo ka ra sa lesu tale mera dauqoli era a sauma yani ena isaunitaro ka sega ni dau via solia e dua na dauqoli, “Sa segai,” era vosa kudrukudrutaka, ka me ikuri ni nodratou vakacacani, na nodra a kacivi tale, “ragone.”4
“Dou viritaka na lawa ki na imatau ni waqa, ka dou na kunea kina,5 a kacivaka ena domolevu na vulagi—ena vosa mamada oqori, era sa tekivu kilai koya mai ka vosa tiko yani. Ena tolu na yabaki se qai oti wale ga oqo o iratou sara ga na turaga oqo eratou a qoli tiko ena wasawasa vata ga oqo. Ena gauna tale ga oqori eratou a “ia tiko ena bogi ka sigavaka, ka keitou sa [sega] ni rawata e dua na ka,”6 kaya na ivolanikalou. Ia e dua na kai Kalili a kacivi iratou yani ena matasawa me ratou biuta sobu nodratou lawa, ka yavita “e levu sara na ika eratou sa kovuta,”7 na kena levu a bote kina na nodratou lawa, na ika ni qoli a vakasinaita e rua nodratou waqa ka sa tekivu me dromu sobu ena kena sa rui bibi.
Sa yaco tale tiko ena gauna oqo. O ira na “ragone,” ena kena donu na yaca era kacivi kina oqo, era a maqusa ena biu sobu ni nodra lawa, ka “ra sa sega ni yavita rawa, ni sa ka levu sara na ika.”8 a vakamatatataka o Joni, “Na Turaga bagi oqo.”9 Ka lade ovataka yani na bati ni waqa, na ka tani o Pita.
Ni oti nodrau sota ena reki kei Jisu ka sa vakaturicaketale, e rau a veivosaki o Pita vata kei na i Vakabula kau vakasamataka na gauna bibi a veisautaka kina na veiqaravi raraba vakaiapositolo ka vakaidina ena vukui Pita vakaikoya, ka tosoya yani na tamata oqo ki na bula cecere ni gugumatua ena veiqaravi kei na veiliutaki. Ni laurai tiko na nodratou waqa makawa, nodratou lawa kabasu, vakakina edua na ibinibini 153 na ika, a kaya yani o Jisu vua na Nona iApositolo qase cake, “Pita, ko sa lomani au vakalevu, ka vakalailai ko iratou oqo, se segai?” kaya o Pita, “Io, na Turaga; ko ni sa kila niu sa lomani kemuni.”10
A kaya tale yani na i Vakabula ena isaunitaro o ya, ka tomana nona wanonova tiko na matadra Nona tisaipeli ka kaya tale, “Pita, ko sa lomani au se segai?” A sauma ena ikarua ni gauna, na dauqoli cecere, ka mai veilecayaki yani vakalailai ena vuku ni kena tarogi tale na taro, “Io, na Turaga; ko ni sa kila niu sa lomani kemuni.”11
A sauma vakalekaleka tale na i Vakabula, ia ena veiwanonovi matua a taroga tale o Koya ena ikatolu ni gauna, “Pita, ko sa lomani au, se segai?” Ia ena gauna oqo sa vaka me sa logaloga ca vakaidina mai o Pita. E rairai a se tu beka ga e lomana na vakanananu ni vica wale ga na siga sa oti ena nona a tarogi vakatolu ena dua tani tale na taro ka qai vakavorakitaka na kena isau—ia ena sega. De rairai a tekivu me lomatarotarotaka kevaka me sa taura donu tiko na nona taro nodra iLiuliu na Qasenivuli. Se de rairai a vakasaqara tiko e lomana, na veivakadeitaki ni dina na isaunitaro ka rawarawa, se cariba sara tiko oqo na nona sa sauma. Veitalia ga se cava a vakila tu, a kaya o Pita ena ikatolu ni gauna, “Turaga, … ko ni sa kila niu sa lomani kemuni.”12
A sauma lesu o Jisu (eke tale au tusanaka na noqu nanuma ena noqu itukutuku ni sega ni volai ena ivolanikalou), ena rairai a tukuna beka eso na ka me vaka, “Ia, Pita, na cava na vuni nomu sa baci mai tiko tale eke? Na cava na vuna eda sa lesu tale mai kina ena matasawa vata ga oqo, ena lawa ni qoli vata ga, talanoa vata ga oqo? A sega beka ni kilai e liu ka sega beka ni kilai ena gauna oqo ni kevaka au vinakata na ika, e rawa niu rawata na ika? Na ka ga au gadreva o ira na tisaipeli—kau gadrevi ira me tawamudu. Au gadreva e dua me vakatawana na noqu sipi ka taqomaki ira na noqu lami. Au gadreva e dua me vunautaka na noqu ivakavuvuli ka taqomaka na noqu vakabauta vakalotu. Au gadreva e dua ka lomani au, e dua me lomani au vakaidina, ka lomana na veika a lesia vei au na Tamada Vakalomalagi meu cakava. Na noda itukutuku e sega ni malumalumu, e sega tale ga ni sega ni dei na noda itavi. Na noda cakacaka e sega ni ka ni rarawa se me sega ni nuitaki, se ka ni gauna makawa. Sa ikoya na cakacaka ni Kalou Cecere, ka me na veisautaka na vuravura.O koya gona ena kena ikarua ka rairai sa kena iotioti talega ni gauna, Pita au sa kerei iko saraga mo biuta na ka kece oqo, mo vakavulica ka vakadinadinataka, veiqaravi ka solibula, loloma ka cakacaka ena yalodina, me yacova sara na siga era na vakayacora kina vei iko na veika era a vakayacora vei au.”
Ia a vuki tale kivei ira kece na iApositolo, ka rairai a kaya beka, “O iko beka e dua na lialia me vakataki ira na vunivola kei na Farisi, me vakataki Eroti kei Pailate? Vakacava o iko, o vakataki iratou, nodratou vakasamataka ni cakacaka oqo e rawa me vakamatei vakarawarawa mai na noqu vakamatei? Vakacava o iko, me vakataki iratou, nodratou vakasamataka ni kauveilatai kei na ivako kei na ibulubulu sa kena icavacava taucoko, ka sa rawa vei keda vakayadua meda lesutale ena marau ki na noda ituvaki cava ga eda a tu taumada kina? Ragone, e vakacava beka na noqu bula kei na noqu loloma e sega beka ni a tara vakatitobu cake sara na lomamuni me vakatauvatani kei na kena oqori?”
Kemuni na taciqu kei na ganequ, sega ni kila rawa se eda na vakacava tu li ena Siga ni Lewa, ia au na kurabui sara vakalevu kevaka ena dua na maliwa ni gauna ni veitalanoa o ya me na sega kina ni taroga vei keda o Koya na ka vata ga a tarogi Pita kina o Karisito: “Ko sa lomani au, se segai?” Au nanuma ni o Koya ena vinakata me kila ni kevaka ena noda bula vakayago, takiveiyaga, vagonegonea, eda sa bau kila tu ni dua na imatai ka ivunau cecere duadua vei ira kece—“Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kece ga.”13 Kevaka me na dua na gauna vaka ko ya e rawa meda kaya yani kina, “Io, na Turaga, ko ni sa kila niu sa lomani kemuni,” ena qai taleva lesu vei keda o Koya ni ivakarau ni loloma cecere duadua sa ikoya na dau yalodina tu ga e veigauna.
“Kevaka dou sa lomani au, dou talairawarawa ki na noqu vunau,”14 a kaya o Jisu. Ia era tu na wekada mera vakalougatataki, gonelalai mera taqomaki, dravudravua mera vukei, kei na dina me taqomaki. Era tu eso na cala meda vakadodonutaka, dina me wasei, ka vinaka me vakayacori. Me vakalekalekataki, e gadrevi meda bula ena gugumatua vakatisaipeli me ivakaraitaki ni noda lomani Koya sa Vakalomalagi. Sa sega ni rawa meda biuta ka sega ni rawa meda lesuva tale. Ni oti noda mai sotava na Luvena na Kalou bula, sa na sega tale ni dua na ka me tautauvata kei na veika e liu. Na Lauvako ena Kauveilatai, Veisorovaki, kei na Tucaketale i Jisu e vakaraitaka na itekitekivu ni dua na bula va-Karisito, e sega ni kena itinitini. Sa ikoya na dina oqo, na kena dina, a rawa kina vei iratou e dua na iwiliwili ni dauqoli e Kaleli me yaco tale me ratou Apositolo ka sega mada ga ni bau dua na valenilotu se iseleiwau15 me tu vei ratou ka yaco me ratou vakaituvakitaka na itukutuku makawa ni vuravura eda sa bula tu kina oqo.
Na noqu ivakadinadina kivei kemuni kece sa ikoya ni ra sa vakalesuitale mai ki vuravura na idola vakaiapositolo oqori ka qai kunei ena Lotu i Jisu Karisito ni Yalododonu Edaidai. Vei kemuni na se bera ni duavata mai kei keimami ena sala oqo ka vakavuna na kena itinitini o Karisito, keimami kaya, “Yalovinaka ni gole mai” Vei kemuni o ni a tu mada kei keimami ena dua na gauna ka o ni sa vakasukasuka yani, ka sa digitaka mo ni vakadigia na itovo vakavanua mai na vata ni taucoko ni Veivakalesuitale mai ni kosipeli, au kaya, “O na sotava tiko e levu na bogi balavu kei na lala ni lawa ni qoli.” Keimami kacivi kemuni mo ni lesu mai, ni dina tiko, lomana na Kalou, ka veivuke ena yalodina. Au vakuria na veikacivi oqori ena yalodina vakadeitaki na daukaulotu kece ka ra sa bau tu ena tobu ni veipapitaisotaki ka laveliga ena sukuwea ka kaya, “Sa lesi au ko Jisu Karisito.”16 Na ilesilesi ko ya a dodonu me veisautaka vakadua na noda saumaki, ka sa dodonu me a veisautaki iko talega. Kivei kemuni na itabagone ni Lotu ko ni sa tubucake tiko mai ki na ilesilesi kei na valetabu kei na vakamau, keimami kaya, “Lomana na Kalou ka mo dau savasava tiko mai na dra kei na ivalavala ca ni itabatamata oqo. E tu na nomu cakacaka vakaitamera mo vakayacora, ka toqai ena itukutuku kaburaki vakasakiti ka vakaraitaka o Peresitedi Thomas S. Monson e nanoa. E namaka na Tamamu mai Lomalagi na nomu yalodina ena veitaba gauna yadua ni nomu bula.”
Au tukuna kivei kemuni kece o ni rogoca na noqu itukutuku, na domo i Karisito e rogoci ena veigauna taucoko ka tarogi keda vakayadua tiko, ni se vo tiko na gauna “Ko sa lomani au, se segai?” Ena vukuda kece sara, au sauma ena vakacegu ni yaloqu, “Io, na Turaga, ko ni sa kila niu sa lomani kemuni.” Kei na noda “taura na isiviyara,”17 eda na sega tale ni railesu me yacova ni sa mai cava na cakacaka ka sa veiliutaki e vuravura na noda lomana na Kalou kei ira na wekada. Ena yaca i Jisu Karisito, emeni.