“Niu sa Bula, Dou na Bula Talega”
Ena vukuna ga, na noda iVakabula o Jisu Karisito, na yalorarawa, galili, kei na veilecayaki oqori sa na vakaisosomitaki ena dua na siga ki na reki sa ka taucoko.
Niu a se cauravou daukaulotu voli mai Chile, au a lako yani kei na noqu itokani ki na dua na matavuvale lewe vitu ena tabana e kea. E ratou dau laki lotu yani ena veimacawa o marama tina kei na luvena. Keirau nanuma de ratou a sa lewe ni Lotu dede tiko. Ni oti e vica na macawa keirau qai kila ni ratou a se bera tiko ni papitaiso.
Keirau a laki raici iratou sara vakatotolo ka kerea ke rawa ni keirau gole yani i nodratou vale ka laki vakavulici iratou. A sega ni taleitaka o tamadratou me vulica na kosipeli ia a sega ni vakataotaka na neirau vakavulica na nona matavuvale.
E totolo sara na nona ciqoma o Sister Ramirez na lesoni. A maqusa sara me vulica na vunau taucoko keirau vakavulica. Ena dua na yakavi ni keitou veivosakitaka tiko na nodra papitaiso na gone dramidrami, keirau vakavulica kina ni ra sega ni ivalavala ca na gone lalai ka sega ni gadrevi me ra papitaiso. Keirau a sureti koya me wilika na ivola i Moronai:
“Raica au sa kaya vei iko, mo vunautaka me ra veivutuni ka papitaiso ko ira era sa kila ka rawa ni kitaka na ivalavala ca; io, mo vunautaka vei ira na itubutubu me ra veivutuni ka papitaiso, ka vakamalumalumutaki ira me vakataki ira na gone lalai ka vakabulai vata kei ira.
“Ia sa sega ni yaga na veivutuni se papitaiso vei ira na gone lalai. Raica na papitaiso sa yaga ga vei ira sa veivutuni ka muria na vunau me bokoci kina na nodra ivalavala ca.
“Ia ko ira na gone lalai era sa bula vei Karisito mai na ivakatekivu kei vuravura; ia kevaka e sega, sa sega ni Kalou dodonu na noda Kalou, sa Kalou dauveivukiyaki ka Kalou daudigidigi, ni ra sa mate oti e vuqa na gone lalai ka ra sega ni papitaiso!”1.
Ni wiliki oti na ivolanikalou oqo, sa tekivu tagi o Sister Ramirez. Keirau sa veilecayaki kina na veitokani. Au a taro sara, “Sister Ramirez, o ni rarawataka beka e dua na ka keirau a tukuna se cakava?”
A kaya mai, “Isa, e sega, Elder, drau sega ni cakava e dua na ka cala. Ena ono na yabaki sa oti a dua tiko na luvequ tagane lailai. A mate o koya ni bera ni keitou papitaisotaki koya. A kaya vei keitou na neitou italatala ena vuku gona ni nona a sega ni papitaiso, ena laki wasei tani me tawamudu. E ono na yabaki na noqu kauta voli tu na mosi kei na lomaleqa oqo. Ni sa mai wiliki na ivolanikalou oqo, au kila ena kaukauwa ni Yalo Tabu ni sa dina. Au vakila ni sa taluva mai vei au e dua na icolacola bibi levu, kau mai tagi oqo ena marau.”
E votu mai vei au na ivakavuvuli nei Parofita Josefa Simici, ka vakavulica na vunau veivakacegui oqo: “Na Turaga sa kauta tani e lewe vuqa, o ira sara mada ga na gone dramidrami, me rawa ni ra drotaka na lomaca ni tamata, kei na rarawa kei na cakaca ni vuravura ena gauna oqo; era sa rui savasava, rui totoka, me ra bula e vuravura; o koya gona, kevaka me vakasamataki vakadodonu, me isosomi ni vakaloloku, e sa tu vei keda na inaki me da marau kina me vaka ni ra sa vagalalataki mai na ivalavala ca, ka ra na suka tale mai vei keda ena dua na gauna totolo.”2
Ni oti nona sotava tu na rarawa kei na vutugu bibi ena ono na yabaki, na vunau dina, ka a vakatakilai mai vua na Tamada mai Lomalagi dauloloma vua e dua na parofita bula, e a kauta mai na vakacegu kamica kivua na marama vakararawataki oqo. Me vaka a kidavi, ratou sa mani papitaisotaki o Sister Ramirez kei ira na luvena yabaki walu ka qase cake.
Au nanuma sara niu a volavola ki na noqu matavuvale kau vakaraitaka kina na vakavinavinaka ni yaloqu niu sa mai kila na veika oqo kei na vuqa tale na veika dina, talei ka rawarawa ni kosipeli vakalesuimai i Jisu Karisito. Au a sega ni tadra na kena sa mai tarai au na ivakavuvuli dina ka totoka oqo ena noqu veiyabaki sa tu oqo e liu ka vakadinadinataka ni sa noqu ibotani mai Kiliati.
Au gadreva meu na vosa vei ira ka sa takali e dua na luvedra ka vakataroga tiko, “A cava me caka kina vei au?” se lomatarotarotaka tiko beka na nomu vakabauta na Tamada mai Lomalagi sa dauloloma. Sa noqu masu ena kaukauwa ni Yalo Tabu, meu na rawa ni kauta mai na veivakarautaki eso ni inuinui, ni vakacegu, kei na kila-ka. Sa noqu gagadre meu sa dua na iyaya ni kena vakalesuimai na nomuni vakabauta na Tamada mai Lomalagi sa dauloloma ka sa kila na veika kecega ka vakatara meda sotava na veika ni veivakatovolei me rawa ni da kila ka lomani Koya ka kila vakavinaka tiko, ke sega o Koya eda sa qai tawa yaga.
Ena ika 4 ni Feperueri ni 1990, a mai sucu kina na ikatolu ni luvei keirau tagane ka ika ono ni gone. Keirau a vakatokai koya me o Tyson. E gonetagane lailai totoka, ka kidavaki koya na matavuvale ena yalo marau kei na loloma. E ratou a vaqoroqoroi koya vakalevu na tacina kei na ganena. Keitou nanuma taucoko ni o koya e sa qai cauravou lailai totoka vakaoti me qai sucu.
Ni sa vula walu o Tyson, a tiloqata e dua na tiki ni joke a raica ena ibe. Sa laki tao tu na joke ena tagitagi nei Tyson, ka sega ni cegu rawa kina. A qai kauti Tyson cake yani o tacina, ka kacivaka ena domobula “Sa sega ni cegu rawa na gone. Sa sega ni cegu rawa na gone.” Keitou sa tekivu uvuca na gusuna ka qirita na 911.
Era yaco mai na vuniwai ka cicivaki Tyson yani ki valenibula. Ena rumu ni wawa, keitou sa masu tikoga ka kerea vua na Kalou e dua na cakamana. Ni oti e dua na gauna balavu, a gole mai na vuniwai ki na rumu ka kaya, “Dou vosoti au sara. Sa sega ni keitou cakava rawa tale e dua na ka. Dou taura na gauna kece dou gadreva” A qai gole yani.
Ni keitou curu yani ki na rumu e davo toka kina o Tyson, keitou raica na neitou isolisoli lailai rekitaki ni sa ciba no. E vaka me kune na rarama kei silesitieli ni robota tu na yagona lailai. E totoka ka savasava dina o koya.
Ena gauna o ya a vakilai ni vaka sa mai cava na inaki ni neitou bula. Me keirau na lesu rawa vakacava vei iratou na vo ni gone ka tovolea me vakamacalataka ni sa na sega ni lesu mai vale o Tyson?
Ena noqu nanuma ga au na tomana kina na veika sa mai yaco oqo. Au a sotava vata kei watiqu daulomani na veivakatovolei oqo, ia au sega ni matau ni vakamacalataka na lomana e dua na tina kau na sega ni tovolea meu cakava.
E ka dredre meu vakamacalataka na veimedreyaki ni lomaqu ena gauna o ya ni noqu bula. E vuqa na gauna au nanuma niu tatadra ca tiko kau dau yadra vakidacala mai ka yali yani na rai butobuto o ya. Au a sega ni moce rawa ena vuqa na bogi. Au sa qai dau wavoki voli mai na dua na rumu ki na dua tale ena loma ni bogi, meu raica ni ratou sa taqomaki taucoko tiko na gone.
Na vakilai ni yaloca e vakacacana na yaloqu. Au vakila niu sa yaloca. Au vakila niu dukadukali. Oi au na tamana; a dodonu meu taqomaki koya vakalevu. Kevaka ga meu a cakava va qo se va ya. Eso na gauna vaka nikua, ni oti e 22 na yabaki, era dau curuma mai vakamalua na yaloqu na yalo o ya, ka gadrevi meu biuti ira tani vakatotolo baleta ni rawa mera veivakacacani.
Ni oti e dua na vula na nona mate o Tyson, au a laki vakatarogi vei Elder Dean L. Larsen. A vakarorogo sara vagumatua vei au, kau na dau vakavinavinakataka tikoga na nona ivakasala kei na loloma. E kaya, “Au sega ni vakabauta ni vinakata na Turaga mo vakararawataki iko me baleta na mate nei nomu cauravou lailai.” Au a vakila na loloma nei Tamaqu Vakalomalagi mai vua e dua na nona iyaya digitaki.
Ia, se yaco tiko ga mai na vakanananu veivakararawataki, ka dau tuburi au mai na cudru. “Oqo e sega ni dodonu! Ena rawa vakacakava me cakava vei au oqo na Kalou? A cava me caka kina vei au? Na cava au cakava me yaco kina na ka oqo?” Au vakila niu sa laki cudruvi ira tale tiko ga na tamata era saga tiko mada ga mera vakacegui keitou. Au nanuma na nodra kaya na itokani, “Au kila na ituvaki ni yalomu.” Au qai dau vakasamataka, “o ni sega ni kila na ituvaki ni yaloqu. Laivi au tu mada ga.” Au a qai raica na noqu vakalomalomani au ena rawa me veivakacacani vakalevu talega. Au sa qai maduataki au niu mai vakanananutaki ira vakaca tiko na noqu itokani era saga tiko mada ga mera veivuke.
Na gauna au vakila kina niu sa solegi ena yaloca, cudru, ka vakalomalomani au, au sa masu sara me na veisautaki na yaloqu. Mai na veika tabu au sa sotava oti, a solia kina vei au na Turaga e dua na yalo vou, ka dina ga niu se galili voli ka rarawa tiko, sa mai veisautaki taucoko na itovo ni noqu rai. A vakatakilai vei au niu a sega ni butakoci ia sa dua na veivakalougatataki cecere sa waraki au tiko kevaka au na vakadeitaka na noqu vakabauta.
Sa tekivu me veisau na noqu bula, ka rawa meu kakavaki yani ena nuinui, ka sega ni rai ki muri ena veilecayaki. Au sa vakadinadinataka ni bula oqo e sega ni icavacava. E ka dina na vuravura ni yalo. E dina na nodra ivakavuvuli na parofita me baleta na bula ni oti na mate. Na bula oqo sa idewadewa ni kalawa ki liu ena noda ilakolako lesu vua na Tamada Vakalomalagi.
Sa isema bibi tiko ga ni neitou matavuvale o Tyson. Ena veiyabaki sa ka totoka dina meda raica na veisereki kei na yalovinaka ni dua na Tamada mai Lomalagi sa dauloloma, ka sa vakatara ki na neitou matavuvale me keitou vakila vakayago na veivakauqeti nei Tyson. Au sa vakadinadinataka ni sa mamare sara na ilati. Na yalo vata ga ni lomadina, loloma, kei na duavata vakamatavuvale e sega ni oti ni ra gole yani ki yasana ka dua na noda daulomani; ia e vakacerecerei ga na yalo vakaoqori.
Eso na gauna era na taroga na tamata, “Cava na balavu ni gauna e taura mo qai ra-wa kina?” Na kena dina, o na sega ni ra-wa taucoko me yacova ni dou sa laki duavata tale kei na nomudou daulomani era sa yali. Ena sega vakadua ni taucoko na noqu marau me yacova ni keitou sa duavata tale ena mataka ni iMatai ni Tucake Tale.
“Raica sa yalo na tamata. Sa sega ni mudu na vei-vu-ni-ka, ia ni rau sa coko vata na yalo kei na vei-vu-ni-ka, sa kune kina na marau sa uasivi sara;
“Ia ni rau sa veitawasei, ena sega ni rawata na marau ko ya na tamata.”3
Ia ena gauna oqo, me vaka sa vakavulica na iVakabula, meda lako voli ena vakacegu.4
Au sa vulica ni veika rarawa, kei na vutugu sega ni taqei rawa ena laki kamica ni ko gole yani vei Tamamu mai Lomalagi ka masuta na Nona veivakacegui e lako mai na Nona ituvatuva; na Luvena, o Jisu Karisito; kei na Nona Dauveivakacegui, sa ikoya na Yalo Tabu.
Sa qai dua dina na veivakalougatataki lagilagi ki na noda bula. Ena sega beka ni ka vakatani keda sega ni rarawataka vakalevu ni takali e dua na luveda? Au sa vakavinavinaka vakalevu vua na Tamaqu mai Lomalagi me vakatara meda loloma vakatitobu ka loloma tawamudu tiko. Au sa vakavinavinaka vakalevu ki na matavuvale tawamudu. Au vakavinavinaka vakalevu ni sa mai vakatakilai tale vei ira na Nona parofita bula na ituvatuva lagilagi ni veivueti.
Nanuma tiko ni gauna o veibulu kina vua e dua na nomu daulomani, na ituvaki ni yalomu ni ko sa gole tani mai na ibulubulu ka raicalesu na kisinimate galili o ya—ka vakananuma de na kavoro na utomu.
Au vakadinadinataka ena vukuna ga, na noda iVakabula o Jisu Karisito, na yalorarawa, galili, kei na veilecayaki oqori sa na vakaisosomitaki ena dua na siga ki na reki sa ka taucoko. Au vakadinadinataka ni sa rawa meda vakararavi ga Vua ena Nona a kaya:
“Au na sega ni laivi kemudou mo dou luveniyali: au na lako mai vei kemudou.
“Malua mada vakalailai, era na qai sega ni raici au tale na kai vuravura; ia dou sa raici au: niu sa bula, dou na bula talega.”5
Au vakadinadinataka, me vaka e tukuni tiko ena Vunautaka na Noqu Kosipeli, “me vaka ni da vakararavi tiko ki na Veisorovaki i Jisu Karisito, e rawa vei Koya me vukei keda meda vosota na noda vakatovolei, tauvimate, kei na mosi. E rawa ni da vakasinaiti ena reki, vakacegu, kei na veivinakati. Na veika taucoko sara e cala me baleta na bula e rawa me vakadodonutaki mai na Veisorovaki i Jisu Karisito.”6
Au vakadinadinataka ni ena mataka ramase lagilagi o ya ni iMatai ni Tucaketale, era na tu mai na nodra ibulubulu o ira na nomuni daulomani kei na noqu me vaka sa yalataka na Turaga Vakai Koya ka na yaco me taucoko na noda reki. Ni sa bula o Koya, o ira kei keda eda na bula talega. Ena yaca i Jisu Karisito, emeni.