Na iYaya ni Cakacaka Vou e Vukei Ira na Lewenilotu me ra Vakarautaka na Yaca ni Matavuvale

Ena dua na ivola ena ika 8 ni Okotova, 2012, eratou veisureti kina na Mataveiliutaki Taumada vei ira na lewenilotu—vakauasivi vei ira na itabagone kei ira na itabagone qase cake—me ra ciqoma na taucoko ni veivakalougatataki ni valetabu ena nodra vakarautaka na nodra yaca ni matavuvale me ra kauta ki na valetabu.

Me kena ikuri, o ira era “biuta tu vakawawa e dua na iwiliwili levu ni yaca ni matavuvale [era sa vakayaloqaqataki] me ra na vagalalataka na veiyaca oqori ena dua na gauna taudonu me rawa ni caka na kedra cakacaka vakalotu veiganiti.”

Me vukei ira na lewenilotu me ra sotava na nodratou gagadre na Mataveiliutaki Taumada, sa cakava tiko na Lotu eso na ivurevure vovou kei na veika sotavi, ka rawa ni kunei ena 10 na vosa ena familysearch.org.

Taura mada e dua na veivakatorocaketaki walega oqo, ena new.familysearch.org ka vakatokai na Family Tree, e solia e dua na ituvatuva vinaka cake ki na noda ivolanikawa e vakatara vei ira era vakayagataka me (1) ra semati ka cakacaka vata ena laini wasei vakamatavuvale, (2) me ra vakadodonutaka ka bokoca na itukutuku cala, ka (3) rawarawa nodra vakauta na yacadra na tubudra me baleta na veicakacaka vakalotu ni valetabu. E rawa talega vei ira era vakayagataka me ra kunea na vidio eso ena “Assigning Names to the Temple” kei na veituberi tale eso ena familysearch.org/treetraining.