Pagmugna og mga Tradisyon sa Pasko sa Pagkabanhaw [Easter] nga Nakasentro kang Kristo

Marso 2013

Pagmugna og mga Tradisyon sa Pasko sa Pagkabanhaw [Easter] nga Nakasentro kang Kristo

Ni Diane L. Mangum

Si Diane L. Mangum nagpuyo sa Utah, USA.

Sa Pasko sa Pagkabanhaw kita magsaulog sa gasa sa atong Manluluwas: ang Pag-ula.

Usa ka Dominggo sa Pasko sa Pagkabanhaw pipila ka tuig ang milabay, ang kwatro anyos nakong anak nga si Ben miadto sa pasilyo sa meetinghouse human sa Primary, malipayong giwara-wara ang papel nga iyang gikoloran. Siya malipayong nanawag, “Ma, Ma, nakadungog ka ba sa Pagkabanhaw?” Gisiguro niya nga nakadungog ko sa maayong balita. May gisulti ang iyang magtutudlo sa Primary nga nakatandog gyud sa kasingkasing ni Ben nga malipayon siyang nakasabut sa Pagkabanhaw. Nindot gyud kaayo kon kitang tanan mobati sa samang kalipay kada Pasko sa Pagkabanhaw!

Ang Pag-ula ni Jesukristo, lakip sa Pagkabanhaw, mao ang labing mahinungdanon sa Pasko sa Pagkabanhaw. Ang pagmugna og mga tradisyon nga nakasentro kang Kristo maka-focus nato niining mga gasa sa atong Manluluwas.

Pagsimba panahon sa Dominggo ug mga Tradisyon

Walay mga fiesta, parada, o kalihokan, kitang mga Santos sa Ulahing mga Adlaw, dungang magsimba panahon sa Pasko sa Pagkabanhaw sama sa atong buhaton ma-Dominggo. Ang atong mga lider sa ward ug branch nagplano og mga speaker ug musical number nga naka-focus kang Jesukristo. Kabahin sa Dominggo sa Pasko sa Pagkabanhaw, si Elder L. Tom Perry sa Korum sa Napulog Duha ka mga Apostoles miingon: “Ang Ginoo wala maghatag nato og klarong relihiyusong kustombre sama sa mga fiesta aron sa pagpahinumdom sa mga panalangin nga atong nadawat Kaniya karon. Hinoon, ang pagbaton og mga tradisyon nga makapaduol nato sa panulundon nga atong tagamtamon kinahanglang anaa sa matag pamilya aron mapadayon” (“Family Traditions,” Ensign, Mayo 1990, 20).

Ang mosunod mao ang lain-laing tradisyon sa pamilya samtang ilang isaulog ang Pasko sa Pagkabanhaw ug magkasuod sa ilang gimahal.

Pagpakigbahin og Pagpamatuod sa Pagkabanhaw ni Kristo

Sila si Janice ug Kirk Nielson misugod og espesyal nga “Gabii alang sa mga Apohan” nga nahimong tradisyon sa Pasko sa Pagkabanhaw. Si Sister Nielson miingon, “Nagtuo ko nga ang labing epektibong butang nga mahimo isip mga apohan mao ang pag-adto sa balay sa among mga anak ug maglingkod tapad sa mga apo ug ipahibalo nga may pagpamatuod mi sa Manluluwas.”
Sa gagmay pa ang ilang mga anak, si Hector ug Sherilyn Alba mogahin og panahon atol sa semana sa wala pay Pasko sa Pagkabanhaw alang sa mubo nga leksyon sa mga nanghitabo sa katapusang semana sa kinabuhi sa Manluluwas.
Pipila ka pamilya mobisita sa mga lubnganan sa ilang gimahal. Sila maghisgut sa ilang mga anak bahin sa mga anhing sakop sa pamilya ug ipahayag ilang pasalamat sa Pagkabanhaw ni Jesukristo.

Ang itlog mao ang simbolo hapit sa tibuok kalibutan sa Pasko sa Pagkabanhaw nga nagrepresentar sa pagbugto sa Manluluwas sa higot sa kamatayon pinaagi sa Iyang Pagkabanhaw. Mao nga ang pagkolor ug pagtago og mga itlog para sa egg hunt sa Pasko sa Pagkabanhaw ug paghatag og basket alang Pasko sa Pagkabanhaw komon nga tradisyon sa tibuok kalibutan.

Sa Russia ang mga tawo motimbaya sa usag usa atol sa Pasko sa Pagkabanhaw pinaagi sa pagsulti, “Si Jesus nabanhaw.” Ang laing tawo motubag, “Tinuod, nabanhaw Siya.” Sa Albania susama ang tradisyon; ilang ipakong ang puwa nga mga bato daw itlog ug moingon, “Si Kristo nabanhaw.”
Gibahandi ni Karen Spencer ang panumduman sa pagsaulog sa Pasko sa Pagkabanhaw sa iyang Danish nga lola ug ganahang magtina og itlog sa pinabukalang tapol nga panit sa sibuyas sama sa gibuhat sa iyang lola. Ganahan ang iyang pamilya nga maghisgut sa itlog isip simbolo sa bag-ong kinabuhi ug Pagkabanhaw.
Pipila sa mga pamilya nga may mga bata malingaw sa egg hunt sa Pasko sa Pagkabanhaw nga may mensahe. Ilang sudlan ang plastik nga itlog og gamayng butang nga nagsimbolo sa kamatayon ug Pagkabanhaw ni Kristo ug kasulatan aron basahon. Dayon ilang numerohan ang itlog sumala sa dagan sa istorya sa Pasko sa Pagkabanhaw. Samtang ablihan sa mga bata ang itlog sumala sa han-ay, ilang makat-unan ang Pag-ula ug Pagkabanhaw ni Kristo.

Pagpakigbahin og Musika kabahin sa Pasko sa Pagkabanhaw

Ang musika talagsaong makaimpluwensya nato sa Pasko sa Pagkabanhaw.

Sila si David ug Joyce Beer motambong og mga konsiyerto nga may kalabutan sa Pasko sa Pagkabanhaw aron sa pagpahinumdom nila sa sakripisyo sa Manluluwas.
Sila si Dave ug Nancy Harmon malingaw sa pagpaminaw sa Messiah, ni George Frideric Handel diin si Sister Harmon mibati nga “mas kabahin ni sa Pasko sa Pagkabanhaw kaysa Pasko.”
Usa ka inahan nagdasig sa iyang mga anak nga nag-eskwela og musika sa pagpraktis og kanta sa Pasko sa Pagkabanhaw para adtong bulana.
Ang pamilyang Dale ug Sara Okerlund magpundok sa piano aron manganta og himno ug awit sa Primary bahin sa Pasko sa Pagkabanhaw.

Pagpanihapon og Dungan atol sa Pasko sa Pagkabanhaw

Ang panihapon sa pamilya laing makahuluganong tradisyon sa Pasko sa Pagkabanhaw sa tibuok kalibutan.

Usa ka pamilya nangaon og hamon ug maghisgut giunsa ni Kristo pagtuman ang balaod ni Moises. Laing pamilya nangaon og isda sa paghinumdom sa mga butang nga gikaon ni Kristo. Ang pamilyang Eliza ug Michael Pereira mangaon nga may karne sa karnero, ug maghisgut sa simbolo sa istorya sa Pagpalabay [Passover].
Human sa panihapon sa pamilya alang sa Pasko sa Pagkabanhaw , magpalitrato mi tibuok pamilya ug sa mga higala nga kauban namo sa panihapon. Aduna mi espesyal nga scrapbook sa Pasko sa Pagkabanhaw nga karon nagrekord sa sobrang 30 ka tuig sa malipayong panumduman sa pamilya.
Usa ka magtiayon nga dagko na ang mga anak midapit sa mga higala sa espesyal nga panihapon. Dinhi sila mipakigbahin sa mga panumduman ug mamalandong sa kahulugan sa Pasko sa Pagkabanhaw.
Sa ubang mga nasud ang holiday sa Pasko sa Pagkabanhaw naglakip sa Biyernes ug Lunes. Sa Tahiti, ang pamilya dungang magpiknik sa laing isla. Sa Central America, pipila sa mga miyembro mogahin sa sobrang panahon sa pagbisita sa pamilya, pakigbahin og pagkaon, ug dayon moadto sa templo.

Pagpakigbahin og Dili Relihiyusong mga Tradisyon sa Laing Adlaw

Ang mga Santos sa Ulahing mga Adlaw nga pamilya mopahigayon og dili relihiyusong kalihokan nga may kalabutan sa Pasko sa Pagkabanhaw gawas sa Dominggo.

Sa Brazil sa Biyernes o Sabado sa wala pay Pasko sa Pagkabanhaw, usa ka apohan nga Santos sa Ulahing mga Adlaw nagbilin og usa o duha ka giingkitan nga mga carrot sa makitang dapit ug nagtago og mga itlong alang sa Pasko sa Pagkabanhaw duol sa mga carrot.
Inig-Lunes human sa Pasko sa Pagkabanhaw, ang pamilyang Joyce ug Scott Hendricks malingaw nga magluto sa gawas ug maghimo og espesyal nga egg hunt sa Pasko sa Pagkabanhaw.

Paghimo nga Anaa kanunay si Kristo sa Pasko sa Pagkabanhaw

Ang pagkat-on kabahin ni Jesukristo sa family home evening, pagpaminaw og musika sa Pasko sa Pagkabanhaw, o pagtagamtam og espesyal nga pagkaon makadasig sa espiritwal sa bisan unsang bahin sa kinabuhi. Ang pagsaulog dili kinahanglang dako nga grupo. Ang personal nga tradisyon sa pagsaulog sa Pasko sa Pagkabanhaw diha sa usa ka balay o kasingkasing sama ka makahuluganon.

Kita usab makahinumdom ug makasaulog sa hingpit nga kalipay sa Pasko sa Pagkabanhaw sama ni Ben, nga miadto sa pasilyo sa meetinghouse gustong mopakigbahin sa maayong balita sa Pagkabanhaw.