Ang Ikapulo Mobukas sa Tamboanan sa Langit

Jacqueline Kirbyson, England

Pipila ka tuig ang milabay akong bana nawad-an og trabaho. Kami naglisud sa pagbayad sa galastuhan ug pagpalit og pagkaon sa gamayng pension nga akong nadawat, apan nahimo ra namo.

Bisan nagsuporta siya sa akong pasalig sa Simbahan, ang akong bana nasagmuyo nga mobayad ko og ikapulo nga naglisud man mi. Apan, mibati ko, kinahanglang magpadayon ko sa pagsunod niini nga sugo.

Bisan gamay among kwarta, aduna mi gamayng hardin. Kon tingpamulak na, mananom mi og mga carrot, patatas, pea, tamatis, puwa nga sili, ug hilba, lakip sa ubang utanon. Tambok kaayo among hardin sa tibuok ting-init, ug daghan mi og naani. Ang among mga punoan sa plum hapit mabali tungod sa kabug-at sa bunga. Na-busy ko sa ting-init sa pagbinotilya ug pagpa-freeze sa mga prutas ug utanon, paghimo og jam, pag-bake og pies, ug pakigbahin sa mga sobra ngadto sa silingan.

Usa ka adlaw samtang naglakaw ko sa among gamayng hardin, nakahinumdom ko sa saad sa Dios nga ablihan ang tamboanan sa langit ug “buboan kamo sa panalangin, sa pagkaagi nga wala na unyay dapit nga igong kabutangan sa pagdawat niini” (Malaquias 3:10).

Naghunahuna sa akong freezer nga puno sa pagkaon, nakaamgo ko nga ang Langitnong Amahan sa tinuoray mipanalangin namo. Ang among gamay nga hardin nakasangkap sa among panginahanglan—paigo ug may sobra pa. Mapasalamaton ko nga ang Ginoo nagpanalangin namo dihang nagsunod mi sa Iyang mga sugo.