Wala Makita nga mga Kakuyaw
Sa paglikay nga mahulog ngadto sa wala makita nga mga lungag, pabilin diha sa agianan.
Duol sa kinatumyan sa Santa Cruz, usa ka isla sa Galápagos, anaa ang Los Gemelos, “ang Kaluha.” Ang kada usa niining duha ka dagkong mga lungag dako kaayo nga masulod ang pipila ka mga football field. Gikan sa ngilit, kini morag karaan nga kinawtan nga hinimo sa tawo nga nag-suplay og bato alang sa mga templo nga dugay nang nawala.
Bisan pa sa natural nga kaanindot sa dapit, dili tanan nga ingon niini. Baga nga mga tanom nagtabon sa tropikal nga yuta gawas sa mga dalan nga subayon. Ang mga dalan maayo kaayo pagkapili sa lig-on nga kaagian. Ang yuta sa isig ka kilid sa dalan, bisan og natabunan sa kasagbutan, mga tanom, ug kakahoyan, dili tingali sama ka lig-on.
Kon kamo mosimang sa dalan nga naglibut sa Los Gemelos aron pagsuhid sa lasang, bisan unsang orasa mahimong makatunob kamo sa dili lig-on nga bahin nga dili makadaog sa inyong gibug-aton. Unsay gitas-on sa inyong pagkatagak? Dili mo makahibalo hangtud moabut mo sa ubos. Ang ubang mga lungag sa Santa Cruz labaw sa 100 ka pye (30 m) ang giladmon. Sumala sa lokal nga mga istorya, usa ka lungag lawom kaayo nga ang ubos dili gayud makit-an.
Ang mga dalan nagsunod og piho nga rota—dalan nga sa inyong hunahuna dili ninyo gustong sundon. Apan dunay kaluwasan diha sa mga dalan ug kasiguroan asa kini paingon.
Pagbantay sa Nipis nga Yuta
Sa ebanghelyo nga pagsabut, kadtong mga dalan libut sa Los Gemelos mahimong simbolo sa daghang mga butang, sama sa mga sugo, sa mga pagtulun-an sa mga propeta, tambag sa Katungdanan ngadto sa Dios ug sa Personal nga Kauswagan, sa mga sumbanan sa Alang sa Kalig-on sa mga Kabatan-onan, ug sa ebanghelyo mismo. Kon kita moapil diha sa ebanghelyo, kon kita mosunod sa mga pagtulun-an sa mga propeta, kon kita magpuyo sumala sa giya sa mga sugo, makakaplag kita og kasiguroan ug kalinaw. Kon dili kita … nan, medyo adunay gamay nga kapeligro.
Usahay matintal kita sa paghunong sa pagsunod sa mga sugo o sa pagbaliwala sa mga pagtulun-an sa Simbahan tungod kay atong gibati nga kini nagpugong. Gusto kitang mopili sa atong kaugalingong agianan sa kinabuhi.
Apan sama sa mga dalan libut sa Los Gemelos nga nakatabang sa mga tawo nga dili mahulog sa nipis nga yuta, ang mga sugo wala magpugong sa atong kabubut-on—hinoon, naghatag kini sa labing maayong kahigayunan alang sa kalipay ug kalampusan. Makapili kita kanunay sa pagbuhat unsay gusto natong buhaton. Makahimo kita og desisyon sa paglakaw sa atong kaugalingong agianan kay sa pagsunod sa gihatag sa Langitnong Amahan alang nato. Sigurado nga dili kita makaabut sa atong destinasyon sa mas dali kay sa pagsubay sa naprobahan nga dalan, ug ang pagpangita sa atong kaugalingong agianan tingali masakit ug malisud.
Ang samang butang magamit ngadto sa mga sugo, sama sa Pulong sa Kaalam. Ang Langitnong Amahan ug ang Iyang Simbahan dili mokuha sa atong kabubut-on pinaagi sa pagdemanda nga kita mohunong sa pag-inom og alkohol. Makapili kita kon mosunod ba kita niana nga sugo o dili. Apan kon mopili kita niana nga pagpili, nagpili usab kita sa mga sangputanan nga nag-uban niini.
Kon mopili kita sa pagsupak niadto nga mga sugo, nan atong girisgo ang tanan niadto nga mga panalangin. Ang pagpili dili mahitungod kon gitugutan ba kita sa pag-inom og alkohol o pagbuhat niining butanga o nianang butanga. Mahitungod kini kon gusto ba kita o dili sa mga panalangin sa gingharian sa langit ug mahitungod sa pagbuhat unsay gisugo sa Ginoo tungod kay gihigugma nato Siya ug nakabig ngadto Kaniya.
Kaluwasan diha sa Dalan
Si Jessica P. ug Nory A., duha ka batan-ong mga babaye nga nagpuyo sa Santa Cruz, personal nga nakahibalo niini. Pareho silang mga kinabig ug parihong nakakita sa kalainan nga ikahatag sa pagsunod sa mga sugo. Dili kaayo daghan ang mga miyembro sa Galápagos Islands (mga 125 lang ka mga miyembro sa ilang branch gikan sa mga 25,000 ka mga tawo sa ilang isla). Malisud ang pagpabilin sa higpit ug pig-ot nga dalan (tan-awa sa 1 Nephi 8:20; 2 Nephi 4:33; 31:17–19; Alma 7:19) uban sa mga tintasyon sama sa alkohol ug drugas nga anaa sa palibut.
Nakita ni Nory ang mga hagit diha sa iyang kaugalingong pamilya. Usa ka tuig human mabunyagi ang iyang pamilya, nabugkos sila didto sa Templo sa Guayaquil Ecuador. Bisan pa niana, sa wala madugay, pipila sa mga sakop sa iyang pamilya wala na magsimba. Dihay mga higayon nga siya ug iyang mama ra ang magsimbahan. Giunsa niya pagpabilin nga lig-on?
“Family home evening,” miingon siya. “Sa makadiyot, ang akong mama ug ako ra ang maghimo niini. Dayon ang akong magulang nga lalaki ug ang akong papa nagsugod sa pag-apil. Ug kada higayon nga magtuon kami sa ebanghelyo, ang akong papa moingon, ‘Alang kini nako.’ Karon nagkalig-on na siya ug akong igsoong lalaki usab.”
Si Jessica nag-atubang og laing pakigbisog. “Ang pagkabugtong miyembro sa akong pamilya sa Simbahan malisud,” mipasabut siya. Ang pipila ka mga sakop sa iyang pamilya dili gusto nga siya mosimba. Gani, mosangpot kini sa panaglalis.
“Usahay manghinaut ka nga ang imong mga ginikanan, imong pamilya, mga miyembro sa Simbahan,” miingon siya, “aron makapaambit ka og mga butang uban nila. Lisud kana.
“Kon duna kay problema, dili ka makapangita ngadto sa kadalanan o sa alkohol tungod kay dili gayud kini makatabang. Moadto hinoon ko sa simbahan, diin duna koy buotang mga higala.
“Nakatabang sila nako og dako. Kon ako magsubo, anaa kanunay si Nory o ang ubang batan-ong mga babaye. Kon moadto ko sa simbahan, mobati ko og kalagsik. Mobati ko og kahupay gikan sa tanan nga mga problema sa akong kinabuhi.”
Pagpili sa Matarung nga Dalan
Si Jessica ug Nory nakakaplag og kalipay sa pagsunod sa ebanghelyo. O hinoon, nakakaplag sila og kalipay tungod kay sila nagsunod sa ebanghelyo.
Ang mga sugo, sama sa mga dalan sa palibut sa Los Gemelos, wala magpugong nato. Naghatag kini og giya nga gikinahanglan aron mahimo kitang hingpit pinaagi sa Pag-ula sa Manluluwas (tan-awa sa D&P 82:8–9). Kon kita mopili sa pagsunod sa mga sugo, nagpili kita sa pagpakita og gugma ug debosyon ngadto sa Dios. Nagpili kita nga mahimong takus sa panag-uban sa Espiritu Santo. Nagpili kita nga mahimong takus sa pagdawat og inspirasyon, makahimo sa pagserbisyo, makahimo sa pagsulod sa templo, ug sa pagtahud sa priesthood.
Labing importante, nagpili kita sa pagpaningkamot sa pagkab-ot sa kinabuhing dayon sa celestial nga gingharian uban sa atong Amahan sa Langit. Mao kana ang dalan sa kalinaw ug kalipay.
MGA LITRATO SA BATAN-ONG MGA BABAYE UG BACKGROUND PINAAGI ni Joshua J. Perkey