Ang Kaimportante sa Pamilya

Ang pamilya giatake karon dinhi sa kalibutan. Maong mas importante kaayo sa mga bata ug batan-on nga makaangkon og pagpamatuod sa kaimportante sa pamilya sa plano sa Langitnong Amahan (tan-awa ang Alang sa Kalig-on sa mga Kabatan-onan [2011], 14). Sa pahina 52 niini nga isyu, si Ann M. Dibb, ikaduhang magtatambag sa kinatibuk-ang kapangulohan sa Young Women, mirekomendar og mga pamaagi sa pagtabang sa mga batan-on nga makaangkon og pagpamatuod kabahin sa pamilya.

Sama pananglit, siya nagsulat, “Samtang nagbasa mo sa pamahayag [sa pamilya], ilista ang mga doktrina, tambag, pasidaan, ug gisaad nga mga panalangin ug personal nga kahulugan ini alang ninyo.”

Mga Sugyot sa Pagtudlo sa mga Batan-on

Basaha ang “Ang Pamilya: Usa ka Pamahayag ngadto sa Kalibutan” ug ang seksyon sa pamilya diha sa Alang sa Kalig-on sa mga Kabatan-onan. Paghisgut kon sa unsang paagi kining mga giya magamit sa inyong pamilya. Ikonsiderar sa pagpakigbahin sa inyong pagpamatuod kabahin sa pamilya.
Konsideraha nga mag-family home evening sa kaimportante sa pamilya (maayong kapanguhaan ang “Marriage and Family” sa bag-ong kurikulum sa kabatan-onan sa lds.org/youth/learn).
Bisitaha ang youth.lds.org. Pilia ang “For the Strength of Youth” ug dayon “Family” aron makakita og kapanguhaan sa pagtabang ninyo nga mas makasabut sa doktrina sa pamilya: mga pakisayran sa kasulatan, video (tan-awa, pananglitan, “Fathers and Sons”), programa sa radyo sa Mormon Channel, mga pangutana ug tubag, ug artikulo, lakip sa mga pakigpulong sa mga General Authority.

Mga Sugyot sa Pagtudlo sa mga Bata

Ania ang pipila ka ehemplo sa mga paagi nga masunod ninyo ang kalamboan sa inyong pamilya sa espirituhanong mga tumong”

Pagkuha og gamay, tin-aw nga garapon. Uban sa inyong mga anak, pagmugna og makab-ut nga tumong nga makapalig-on sa pamilya, sama sa mag-family home evening matag Lunes o magbasa kada adlaw sa kasulatan isip pamilya. Hangyoa ang inyong mga anak sa pag-label sa garapon nga gisulat ang tumong niini. Matag higayon nga inyong makompleto ang kalihokan, pagbutang og gamayng butang sama sa dyolin o bato sa sudlanan. Kon mapuno ang garapon, ikonsiderar sa pagsaulog pinaagi sa espesyal nga panihapon o kalihokan sa pamilya.
Paghangyo sa matag bata sa pag-drawing og litrato sa pamilya nga nagbuhat og kalihokan nga gusto nimong awhagon, sama sa pag-ampo o pagtuon sa kasulatan sa pamilya. I-display ang litrato asa makita sa tanan. Sugdi ang adlaw nga ang litrato nag-atubang sa ibabaw. Kon makompleto sa inyong pamilya ang kalihokan sama sa gipakita sa pahina, baliha kini. Ang mga litrato nga makita gihapon mopahinumdom sa inyong pamilya sa mga tumong ug sa ilang buhaton sa paglig-on sa pamilya anang adlawa. Dayon matag sugod sa adlaw ipaatubang sa ibabaw ang mga litrato.

Usab tabangi inyong mga anak nga makita ang mga panalangin nga miabut sa inyong pamilya sa pagbuhat ining kalihokan. Ang pagtabang sa inyong mga anak nga makaila sa maayong mga pagbati diha sa panimalay nga gikan sa Espiritu makapalambo sa ilang tinguha sa pagsunod sa sumbanan sa matarung nga batasan nga makalig-on sa pamilya.

Ang pagsunod sa tambag diha sa “Ang Pamilya: Usa ka Pamahayag ngadto sa Kalibutan” makalig-on ug makaprotekta sa atong pamilya.

Paghulagway pinaagi ni Taia Morley