Ang Gahum sa Pulong sa Dios

Ni Elder Michael John U. Teh

Sa Seventy

Gikan sa usa ka pakigpulong nga gihatag sa Brigham Young University–Hawaii niadtong Marso 22, 2011. Alang sa tibuok nga pakigpulong sa Iningles, adto sa devotional.byuh.edu/archive.

Pipila lang ka mga kalihokan ang mas makahatag og espirituhanong kaayohan kaysa inadlaw, kanunayng pagtuon sa kasulatan.

Dihang bishop ko kaniadto, ang akong mga magtatambag ug ako mihukom nga bisitahon ang tanang balay sa mga miyembro kausa sa usa ka tuig. Atol sa usa namo ka pagbisita nanlakaw mi sa may giabandonar nga riles nga may mga balay nga hinimo sa karton nga dili modako sa unom ka pye por unom ka pye (mga 2 m per 2 m). Kining gamay nga lugar mao ang sala, kan-anan, tulganan, ug kusina sa pamilya.

Ang mga hamtong nga nagpuyo niini nga dapit may naandang paagi ug buluhaton. Kasagaran sa mga lalaki walay trabaho o dili tukma ang trabaho. Sila mas mogahin og panahon nga magpundok aron manigarilyo ug mag-inom. Magpundok usab ang mga babaye, mag-istoryahanay kabahin sa kontrobersyal nga mga balita, apilan sa pagpanglibak. Ang pagsugal paboritong kalingawan sa batan-on ug hamtong.

Ang nakapalibog gyud nako kay ingon og ang mga tawo kontento na nga ingon ini ilang kahimtang sa kinabuhi. Sa katapusan nakahunahuna ko nga tingali alang sa kadaghanan nila, ang pagkawalay paglaum nagpatoo kanila nga mao lang kini ang ilang kapaingnan. Kini sa tinuoray makapasubo lantawon.

Sa wala madugay nasayran nako nga ang akong magtatambag, nga usa ka engineer, nagpuyo adtong lugara sa una. Dili gyud ko makatag-an kay ang iyang pamilya lahi ra kaayo sa mga pamilya nga akong nakita didto. Tanang niyang mga igsoon naedukar ug nagpadako og maayong mga pamilya.

Ang iyang amahan simple nga tawo. Human nako siya mahimamat, nakapangutana ko. Giunsa niya pagpalambo sa iyang kaugalingon? Giunsa niya paghaw-as sa iyang pamilya gikan adto nga mga kahimtang? Unsay nakapadasig niya og panglantaw sa unsay pwedeng mahimo? Asa siya nakakaplag og paglaum sa diha nga ang tanan ingon og wala nay paglaum?

Daghang tuig ang milabay, sa Templo sa Manila Philippines, mitambong ko og panagpundok sa tanang presidente sa misyon ug ilang asawa nga nagserbisyo sa Philippines. Nasurprisa ko pag-ayo sa dihang misulod ko sa usa sa kwarto sa templo. Nagbarug atubangan nako mao ang amahan sa akong magtatambag—kadtong hilum, mapainubsanong tawo—nakaputi.

Adtong higayona nakapanglantaw ko og duha ka eksena. Ang unang eksena mao ang tawo nga nakig-inom sa iyang mga barkada ug nag-usik-usik sa iyang kinabuhi. Ang ikaduhang eksena nagpakita sa samang tawo nakaputi ug nagpahigayon sa mga ordinansa sa balaang templo. Ang kalainan sa ikaduhang mahimayaong eksena mahangturong magpabilin sa akong kasingkasing ug hunahuna.

Ang Gahum sa Pulong

Unsay nakapalambo niining buotang brother sa iyang kaugalingon ug sa iyang pamilya? Ang tubag anaa sa gahum sa pulong sa Dios.

Nagtuo ako nga pipila lamang ka mga kalihokan ang mas makahatag og espirituhanong kaayohan kaysa inadlaw, kanunayng pagtuon sa kasulatan. Sa seksyon 26 sa Doktrina ug mga Pakigsaad—usa ka pagpadayag ang gihatag “sa paglig-on, pagdasig, ug pagtudlo”¹ ni Propeta Joseph Smith ug sa uban—ang Ginoo mitambag, “Tan-awa, Ako moingon nganha kaninyo nga kamo mohatag sa inyong panahon sa paghalad ngadto sa pagtuon sa mga kasulatan” (bersikulo 1).

Ang Basahon ni Mormon naghisgot kanato, “Ang pagsangyaw sa pulong … adunay labaw nga gamhanan nga sangputanan diha sa mga hunahuna sa mga katawhan kay sa espada, o sa bisan unsa pa, diin nahitabo ngadto kanila” (Alma 31:5).

Si Presidente Boyd K. Packer, Presidente sa Korum sa Napulog Duha ka mga Apostoles, mitudlo: “Ang tinuod nga doktrina, unya nasabtan, mopausab sa mga kinaiya ug pamatasan. Ang pagtuon sa mga doktrina sa ebanghelyo mas dali nga makapalambo sa pamatasan kay sa pagtuon bahin sa pamatasan aron mapalambo kini.”²

Si Presidente Ezra Taft Benson (1899–1994) miingon: “Ang Ginoo molihok gikan sa sulod padulong sa gawas. Ang kalibutan molihok gikan sa gawas padulong sa sulod. Ang kalibutan mopagawas sa tawo gikan sa hugaw nga mga dapit. Si Kristo mokuha sa kahugaw gikan sa mga tawo, ug sila mismo mogawas gikan sa hugaw nga mga dapit. Hulmahon sa kalibutan ang tawo pinaagi sa pag-usab sa iyang palibut. Bag-ohon ni Kristo ang tawo, kinsa mousab sa ilang palibut. Hulmahon sa kalibutan ang pamatasan sa tawo, apan si Kristo ang makausab sa kinaiya sa tawo.”³

Nagdako sa Pilipinas, akong nasayran nga sa sayong mga 1900, ang pagbasa sa Biblia limitado lang ngadto sa relihiyusong mga lider. Ang mga tawo dili makabasa o makapanag-iya sa sagradong kasulatan.

Agi’g kalainan, kita nagpuyo sa panahon nga ang pagkaanaa sa kasulatan walay sama. Wala pa sa kasaysayan sa kalibutan nga ang mga anak sa Dios may kahigayunan sa pagtagamtan niining sagradong materyal sama karon. Ang mga sinulat nga mga kopya sa kasulatan daling mapalit sa bookstore o sa internet. Mga elekronik nga kopya makuha dayon pinaagi sa World Wide Web ug ma-download sa daghang mga himan. Ang pagpangandam og pakigpulong, pagsulat og mga artikulo, ug pagsiksik og impormasyon sayon na kaayo.

Gihatag sa Dios kining bag-ong teknolohiya alang sa maalamong katuyoan. Ang kaaway, hinoon, mipalambo usab sa kadautan ug migamit sa teknolohiya—nga gituyo sa Dios sa pagtabang nato—sa pagpalambo sa iyang katuyoan nga kita “mauyamot sama ngadto kaniya” (2 Nephi 2:27).

Busa, kita may responsibilidad sa pagkat-on sa paggamit sa gihatag nato sa Langitnong Amahan sa epektibo, makanunayon, ug hustong pamaagi.

Ang Kasagrado sa Pulong

Kita mga Santos sa Ulahing mga Adlaw midawat ug mihatag og bili sa kasulatan, apan ang atong lihok ug pagtratar niini usahay nasukwahi. Ang kakulang sa pagsabut sa bili ug kaimportante sa kasulatan maayong pagkahulagway sa damgo ni Lehi:

“Ug ako nakakita og dili maihap nga mga pundok sa mga katawhan, kadaghanan kanila mipadayon paingon ngadto sa unahan, nga unta sila makaabut sa dalan paingon ngadto sa kahoy diin ako nagbarug.

“Ug nahinabo nga sila miduol, ug misugod sa pagsubay sa dalan paingon sa kahoy.

“Ug nahinabo nga dihay mitungha nga usa ka gabon sa kangitngit; oo, gani hilabihan ka dako sa gabon sa kangitngit, hangtud nga sila kinsa misugod sa pagsubay sa agianan, nangawala sa ilang agianan, nga sila nangasaag ug nangawala” (1 Nephi 8:21–23).

Ang paghunahuna nga igo lang mosugod sa dalan nga dili mogunit sa gunitanan nga puthaw binuang ug siguradong makalaglag. Gipasabut ni Nephi unsay ipasabut sa paggunit og maayo sa gunitanan nga puthaw: “Busa, kamo kinahanglan gayud mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum, ug usa ka gugma sa Dios ug sa tanan nga mga tawo. Busa, kon kamo mopadayon sa unahan, magbusog sa pulong ni Kristo, ug molahutay hangtud sa katapusan, tan-awa, sa ingon miingon ang Amahan: Kamo makabaton og kinabuhi nga dayon” (2 Nephi 31:20; emphasis gidugang).

Atong eksaminon unsay nahitabo adtong miila sa kaimportante sa gunitanan nga puthaw samtang naningkamot silang makaduol sa kahoy sa kinabuhi:

“Ug si kinsa kadto nga mopatalinghug sa pulong sa Dios, ug hugot nga mogunit niini, dili gayud sila malaglag; ni ang mga pagtintal ug ang nagdilaab nga mga pana sa kaaway makabuntog kanila ngadto sa pagkabuta, sa pagdala kanila sa kalaglagan” (1 Nephi 15:24).

Sa basahon ni Alma atong mabasa:

“Kini gihatag ngadto sa kadaghanan aron masayud sa mga misteryo sa Dios, bisan pa niana sila gipahimutang ubos sa mahigpit nga sugo nga sila dili makigbahin gawas sumala niana nga bahin sa iyang pulong diin siya mihatag ngadto sa mga kaliwatan, sumala sa pagpaminaw ug kakugi nga sila mihatag ngadto kaniya.

“Ug busa, siya nga mopatig-a sa iyang kasingkasing, ang mao modawat sa gamay nga bahin sa pulong; ug siya nga dili mopatig-a sa iyang kasingkasing, ngadto kaniya ihatag ang dako nga bahin sa pulong, hangtud kini ihatag ngadto kaniya ang kasayuran sa mga misteryo sa Dios hangtud siya masayud kanila sa hingpit.

“Ug sila nga mopatig-a sa ilang mga kasingkasing, ngadto kanila ihatag ang gamay nga bahin sa pulong hangtud sila wala nay masayran mahitungod sa iyang mga misteryo; ug unya sila pagadad-on nga mga bihag sa yawa, ug pagadad-on pinaagi sa iyang kabubut-on ubos ngadto sa kalaglagan” (Alma 12:9–11).

Nagtuo ko nga ang kanunayng pagbaliwala sa pagtuon sa kasulatan usa ka paagi sa pagpatig-a sa atong kasingkasing. Nahadlok ko nga kon ato ning ipadayon, kita hatagan sa mas gamayng bahin sa pulong ug sa katapusan walay masayran sa misteryo sa Dios. Ang pagtuon sa kasulatan kada adlaw, sa laing bahin, makatabang nato sa pagpalambo og espirituhanong kalig-on ug kahibalo, makadiskobre sa pagpangilad sa yawa, ug makapadiskobre sa mga lit-ag nga iyang giandam para nato.

Samtang kamo mangutana niini sa inyong kaugalingon, dapiton ko kamo sa pagtugot sa Espiritu Santo nga motandog sa inyong hunahuna ug kasingkasing:

Naggahin ba ako og panahon sa pagtuon sa mga kasulatan kada adlaw?
Kon wala, unsay akong pasumangil sa wala pagbuhat niini?
Ang ako bang pasumangil dawaton sa Ginoo?

Ako mohagit ninyo sa pagsugod sa pagtuon sa mga kasulatan kada adlaw. Ayaw pagkatulog karong gabii hangtud nga makabasa mo. Samtang kamo magbasa, kamo may mas dakong tinguha sa pagbuhat sa kabubut-on sa Ginoo ug mohimo og mga kausaban sa inyong kinabuhi.

Paghulagway pinaagi ni Jim Madsen

Gilitratohan ni Tim Taggart