Ayaw Pagsul-ob og Maskara

Ni Elder Quentin L. Cook

Sa Korum sa Napulog Duha ka mga Apostoles

Gikan sa debosyonal sa Church Educational System alang sa mga young adult gihatag niadtong Marso 4, 2012, sa Brigham Young University–Idaho.

Usa sa inyong dakong panalipod batok sa paghimo og dili maayo nga mga pagpili mao ang dili pagbutang og bisan unsang maskara sa pagtago-tago.

Sa akong pagpamalandong kon kinsa kamo, miabut nako ang pagbati nga kamo tingali wala sa hingpit makapasalamat sa kaimportante sa inyong henerasyon. Nagtuo ko nga kamo adunay kahibalo ug pundasyon nga mahimong labing maayong henerasyon sukad, ilabi na sa pagpalambo sa plano sa atong Langitnong Amahan.

Tungod sa inyong dakong potensyal sa kaayo nga anaa ninyo, unsa man diay ang akong gikabalak-an sa inyong umaabut? Unsa nga tambag ang akong ikahatag ninyo? Adunay dakong pagpamugos sa matag usa ninyo sa paglihok nga dili mao ang inyong kinaiya—gani sa pasul-ob og maskara—ug mahimong usa ka tawo nga wala magpakita kinsa kamo o sa gusto ninyong mamahimo.

Usa ka Ehemplo gikan sa Kasaysayan sa Estados Unidos

Niadtong 2011, si Elder L. Tom Perry ug ako nakigkita ni Abraham Foxman, ang nasyonal direktor sa Anti-Defamation League. Ang misyon niini mao ang pagpahunong sa pag-insulto sa katawhang Judeo.

Sa among miting uban ni Mr. Foxman, nangutana ako niya kon unsay iyang ikatambag namo kalabut sa among mga responsibilidad sa public affairs alang sa Simbahan. Namalandong siya sa makadiyot ug dayon mipasabut sa kaimportante sa pag-awhag sa mga tawo nga dili magsul-ob og maskara. Iyang gihulagway ang Ku Klux Klan. Usa kini ka organisasyon nga dako kaayog impluwensya ug makahadlok sa daghang mga Amerikano sa unang bahin sa ika-20 nga siglo. Magsul-ob sila og parehas nga mga kupo ug mga maskara nga imposible nga mailhan ang mga partisipante, magsunog sila og mga krus diha sa nataran sa ilang biktimahon ug mitawag sa ilang mga kaugalingong nga moral watchdogs. Kadtong mga biktimahon mao ang African Americans, pero mga Katoliko, mga Judeo, ug mga immigrant usab. Ang labing militante sa mga sakop sa Klan nalambigit sa mga paglatigo, pisikal nga pag-abuso, ug gani pagpatay. Si Mr. Foxman mipasabut nga ang kadaghanan sa Klan, kon walay mga maskara, sa kasagaran normal nga mga tawo, nga naglakip sa mga negosyante ug mga tigsimba. Iyang giingon nga ang pagtago sa ilang pagkatawo ug pagsul-ob og maskara makahimo nila sa pag-apil sa mga kalihokan nga sa kasagaran ilang likayan. Ang ilang binuhatan adunay grabing epekto sa katilingbang Amerikanhon.

Ang tambag ni Mr. Foxman mao ang pagpasabut sa importansya sa mga tawo nga maglikay nga magmaskara nga nagtago sa ilang pagkatawo.¹

Mga Ehemplo gikan sa Kasaysayan sa Simbahan

Sa sayong bahin sa kasaysayan sa atong Simbahan, si Propeta Joseph Smith, Emma, ug ang ilang 11 anyos nga kaluha nga sila si Joseph ug Julia didto sa Hiram, Ohio, sa umahan sa mga Johnson.

Usa ka Sabado sa gabii usa ka pundok sa mga lalaki nga nagpintal og itom sa mga nawong midasmag sa pultahan ug miguroy sa Propeta ngadto sa gawas, diin ilang gibunal-bunal ug gibutangan og alkitran siya ug si Sidney Rigdon.

“Bisan og ang Propeta nawagtangan og ngipon, grabe nga nabun-og sa kilid, napahak ang buhok, ug nasunog sa nitric nga asedo, nagsangyaw gihapon siya sa tulumanon sa Dominggo. Uban sa mga Santos nga nagpundok may dili mominus upat ka sakop sa manggugubot ang naa didto.”²

Makapaikag usab nga kadtong miapil sa Pagkamartir ni Propeta Joseph Smith ug sa iyang igsoong lalaki nga si Hyrum nagpintal sa ilang mga nawong aron matago ang ilang tinuod nga pagkatawo.³

Likaye ang Pagsul-ob og Maskara ug Paglihok sa Dili Naandang Kinaiya

Wala ko magsugyot nga bisan kinsa ninyo moapil niining terible nga mga panghitabo nga akong gihulagway. Nagtuo ko, sa atong panahon, nga ang dili pagpaila mas sayon kay sa una, nga dunay importante nga mga baruganan nga naglakip sa dili pagsul-ob og maskara ug ang “pagkamatinud-anon sa tinuohan … diin ang mga martir namatay.”⁴

Usa sa inyong dakong panalipod batok sa paghimo og dili maayo nga mga pagpili mao ang dili pagbutang og bisan unsang maskara sa pagtago-tago. Kon kamo makahunahuna nga mobuhat niini, palihug hibaloi nga seryoso kini nga timailhan sa kakuyaw ug usa sa mga himan sa kaaway sa pagpabuhat ninyo og butang nga dili ninyo angay nga buhaton.

Makapaikag nga ang mga tawo nga nalambigit sa pornograpiya sa kasagaran magtakuban ug motago sa ilang partisipasyon. Ilang maskarahan ang ilang kinaiya, nga sila nasayud nga salawayon ug makadaot sa tanan nga ilang gimahal. Ang pornograpiya usa ka sakit nga makadaot dili lamang sa moral nga kahimtang sa usa ka tawo uban sa Dios, apan makadaot kini sa mga kaminyoon ug mga pamilya ug adunay dautang epekto sa katilingban.

Alang niadtong nagumon niining makadaot nga kinaiya, palihug hibaloi nga kamo makahinulsol, ug mahimong maalim. Ang paghinulsol kinahanglang mag-una sa pagkaalim. Ang pagkaalim mahimong usa ka taas nga proseso. Ang imong bishop o presidente sa branch makatambag ninyo unsaon nga makadawat og tabang nga inyong gikinahanglan aron maalim.

Lihok Sumala sa Inyong mga Pagtuo

Komon kini karon nga itago ang pagkatawo kon magsulat og ngil-ad, masakit, mabutang-butangon nga komunikasyon diha sa internet nga dili magpaila. Ang uban motawag niini nga pagpangdaut. Ang ubang mga institusyon maningkamot sa paghas-has sa mga komentaryo. Pananglit, ang New York Times dili motugot og mga komentaryo diin dunay “personal nga mga pag-ataki, pagkalaw-ay, pagkabulgar, pagpanamastamas, … pagpanundog, pagkayabag ug PAGSINGGIT. …

“Ang Times nag-awhag usab sa paggamit sa tinuod nga pangalan tungod kay, ‘Among nahibaloan nga ang mga tawo nga mogamit sa ilang mga pangalan mopatunhay, matinahuron sa panagsultihanay.’”⁵

Si Apostol Pablo misulat:

“Ayaw na kamo pagpahisalaag: dautang pakighugoyhugoy makadaut sa maayong pamatasan.

“Pagpahiuli kamo sa tarung nga panimuot, ug ayaw na kamo pagpakasala; kay ang uban kaninyo wala kahibalo mahitungod sa Dios” (1 Mga Taga-Corinto 15:33–34).

Klaro nga ang dautang komunikasyon dili lang butang sa dili maayo nga pamatasan, apan, kon buhaton sa mga Santos sa Ulahing mga Adlaw, makaapekto kini pag-ayo niadtong walay kahibalo sa Dios o pagpamatuod sa Manluluwas.

Ang bisan unsang paggamit sa Internet aron sa pagpanlupig, pagguba og reputasyon, o pagdaut sa usa ka tawo salawayon. Atong nakita sa katilingban nga kon ang mga tawo magsul-ob og maskara sa pagtago-tago, mas mobuhat sila niining matanga sa buhat, nga makadaot kaayo sa sibil nga panag-istorya. Nagsupak usab kini sa sukaranang mga baruganan nga gitudlo sa Manluluwas.

Ang mga matarung dili kinahanglang magsul-ob og mga maskara aron sa pagtago sa ilang pagkatawo.

Tarunga Pagbuhat ang Inyong Bahin

Kami adunay dakong pagsalig kaninyo. Ang kapangulohan sa Simbahan sa tinuoray nagtuo nga kamo makatukod sa gingharian nga labaw pa sa nangaging henerasyon. Dili lamang nga anaa ninyo ang among gugma ug pagsalig apan sa among mga pag-ampo ug mga panalangin usab. Nasayud kami nga ang kalampusan sa inyong henerasyon importante sa nagpadayon nga katukuran sa Simbahan ug pagtubo sa gingharian. Nag-ampo kami nga inyong buhaton og maayo ang inyong bahin samtang maglikay kamo sa pagsul-ob og maskara.

Mga paghulagway sa litrato pinaagi ni Craig Dimond