Gikan sa Natad sa Misyon
Natandog sa usa ka Pagpamatuod
Michael Harken nagpuyo sa Utah, USA.
Paghulagway pinaagi ni Jim Madsen
Sa sinugdanan sa akong misyon, nagserbisyo ko sa usa ka gamay nga siyudad sa South Korea. Usa ka ulanon nga adlaw kami wala kaayoy nahimo apan gustong mopadayon sa pagtrabaho hangtud nga oras na sa pagpauli. Ang akong kompanyon ug ako nakahukom nga manuktok kami og pipila pa ka mga pultahan.
Sa usa ka pultahan usa ka babaye ang mitubag, ug ang akong kompanyon nagsugod sa pagpakig-istorya niya. Isip usa ka bag-ong misyonaryo, naglisud gyud ko sa pagsabut, apan paglabay sa pipila ka minuto nagsugod siya sa pagsulti og Iningles ngari namo. Among nahibaloan nga siya gikan sa Chicago, Illinois, USA, ug mibalhin dinhi uban sa iyang pamilya. Ang iyang bana usa ka tigsangyaw sa usa ka simbahan nga dili kaayo maayo og pagbati sa atong mga pagtuo.
Ang babaye buotan apan ganahan nga moprobar nga dili tinuod ang Basahon ni Mormon ug mikombinser namo nga ang atong simbahan dili ensakto. Nagbarug ko didto uban sa akong kompanyon samtang siya naningkamot sa pagtubag sa iyang lisud nga mga pangutana. Ang akong kompanyon naningkamot sa pagpamatuod ngadto niya nga ang Basahon ni Mormon tinuod ug nga kini makatabang kaniya, apan ang babaye miinsister sa pagtuo nga ang akong kompanyon dili eksakto.
Human sa mga 30 minutos sa panaghisgot diha sa pultahan, ang babaye nangutana sa akong kompanyon, “Asa man kita paingon human niining kinabuhia?” Akong nasabtan nga ang babaye gustong makiglalis sa pagtudlo sa akong kompanyon, sama sa iyang gibuhat kaganiha. Mipamatuod ang akong kompanyon sa plano sa kaluwasan ug nga kita makapuyo uban sa atong mga pamilya sa kahangturan didto sa celestial nga gingharian. Sa wala pa siya makapadayon, ang babaye mipahunong niya ug mihangyo niya sa pag-usab sa unsay iyang bag-o lang gisulti mahitungod sa pamilya nga magkahiusa. Gitubag sa akong kompanyon sa samang tubag. Kusog nakong gibati ang Espiritu, ug akong makita sa iyang mga mata nga adunay nakatandog kaniya. Human nianang mubo nga gamhanang pagpamatuod, mihunong ang babaye sa pagkiglalis namo, midawat sa Basahon ni Mormon, ug mihangyo namo nga mobalik sa pagpakigsulti niya ug sa iyang bana mahitunogd sa Basahon ni Mormon.
Nakahinumdom ko nga naglakaw uban sa akong kompanyon nianang gabhiona, natingala sa epekto sa pagpamatuod sa akong kompanyon. Nakasabut ko nga ang usa ka pagpamatuod inubanan sa Espiritu mao ang labing gamhanang himan nato sa pagtudlo. Dili gyud nako makalimtan ang akong kompanyon ug ang iyang pagpamatuod nianang gabhiona. Human niana nga kasinatian ako nakahukom nga, bisan sa akong limitado nga abilidad sa pagsulti og Korean, maningkamot ko sa paghatag sa akong pagpamatuod bisan unsa pay mahitabo. Sa dihang akong gibuhat, nagsugod ko sa pagbati sa Espiritu sa mas labaw pa. Akong nakat-unan nga ang labing maayong komunikasyon mahitabo kon magtudlo kamo pinaagi sa Espiritu.