Unsay Mahitabo human Kita Mamatay?

Marso 2013

Unsay Mahitabo human Kita Mamatay?

Usa kini ka sukaranan nga pangutana, ug pinaagi sa karaan ug moderno nga mga propeta, ang Dios mihatag nato sa mga tubag.

Ang atong mahigugmaong Langitnong Amahan mihatag nato og kahibalo og unsay atong mapaabut kon kita motaliwan na niining kinabuhia. Aniay mga kamatuoran nga makatabang ninyo nga makasabut asa na karon ang namatay na ninyong mga minahal ug asa moadto ta katapusan.

Unsay Atong Nahibaloan mahitungod sa Kalibutan sa Espiritu?

Asa ang kalibutan sa espiritu?

Si Presidente Brigham Young (1801–77) mitudlo nga ang mga espiritu niadtong kanhi nagpuyo sa kalibutan magpabilin uban nato niini nga kalibutan, bisan og dili kita makakita nila.¹

Unsay hitsura sa kalibutan sa espiritu?

Depende kana. Ang matarung makasinati og paraiso—kalipay, kapahulayan, ug kalinaw, nga wala nay kasamok, kabalaka, ug kagul-anan (tan-awa sa Alma 40:12). Ang dautan makasinati og impyerno (tan-awa sa Alma 40:13–14). Ang impyerno mahimong mapasabut nga “ang pag-antus sa pagkapakyas nga anaa sulod sa hunahuna sa tawo.”²

Unsay hitsura sa mga espiritu?

Hamtong ang porma sa mga espiritu sa kinabuhi nga wala pa dinhi sa yuta ug makabaton sa samang porma sa kalibutan sa espiritu, bisan kon namatay sila nga masuso o mga bata.³

Ang mga espiritu ba diha sa kalibutan sa espiritu makakita nato?

Oo, kon gikinahanglan. Si Presidente Joseph F. Smith (1838–1918) miingon nga kadtong anaa sa kalibutan sa espiritu klarong makakita nato kay sa kita makakita nila ug nga “ang ilang pagbati alang nato ug ang ilang gugma ug ang ilang tinguha sa atong kaayohan mas dako kay sa atong mabati alang sa atong kaugalingon.”⁴

Ang mga espiritu ba sa kalibutan sa espiritu matintal gihapon?

Kon matinud-anon mo niining kinabuhia, si Satanas walay gahum ibabaw ninyo didto sa kalibutan sa espiritu. Ang dautan ulipon ni Satanas didto sama nga sila dinhi sa yuta.⁵ Sama sa gipasabut ni Elder M. Russell Ballard sa Korum sa Napulog Duha ka mga Apostoles, kini nga kinabuhi mao ang panahon sa paghinulsol, tungod kay “ania kita sa pagkamortal nga ang lawas ug ang espiritu magkadungan sa pagkat-on.”⁶

Unsay gibuhat sa mga espiritu didto sa kalibutan sa espiritu?

Usa pa ka butang, nasayud kita nga ang mga espiritu sa matinud-anon nga wala pa mabanhaw naghimo og misyonaryo nga buhat didto sa mga espiritu sa bilanggoan.⁷ Nasayud usab kita nga tali niadtong mga matinud-anon, estraktura sa pamilya ug organisasyon sa Simbahan atua didto.⁸

Unsay Atong Nahibaloan mahitungod sa Pagkabanhaw?

Pila ka mga tawo ang mabanhaw?

Ang tanang mga tawo nga nakapuyo sa yuta mabanhaw (tan-awa sa 1 Mga Taga-Corinto 15:21–23).

Kinsa ang mabanhaw, ug kanus-a?

Unang Pagkabanhaw, o “Pagkabanhaw sa Makiangayon” (D&P 76:17)

Sa Pagkabanhaw ni Kristo

Ang mga propeta ug pipila ka laing matarung nga mga tawo kinsa makadawat og celestial nga himaya (tan-awa sa Mosiah 15:21–25).

Sa Ikaduhang Pag-anhi ni Kristo

Kadtong makadawat og celestial nga himaya (tan-awa sa D&P 76:50–70; 88:96–98).

Sa Sinugdanan sa Milenyum

Kadtong makadawat sa terrestrial nga himaya (tan-awa sa D&P 88:99).

Ikaduhang Pagkabanhaw, o “Pagkabanhaw sa Dili Makiangayon” (D&P 76:17)

Sa Katapusan sa Milenyum

Kadtong makadawat og telestial nga himaya (tan-awa sa D&P 76:85; 88:100 –101).

Mga anak sa kapildihan (tan-awa sa D&P 76:43–48; 88:102).

Unsay hitsura sa nabanhaw nga lawas?

Ang usa ka nabanhaw nga lawas:

Imortal “Kini nga mortal nga lawas pagabanhawon ngadto sa pagka-imortal nga lawas, … nga sila dili na mamatay” (Alma 11:45).
Hingpit. “Ang espiritu ug ang lawas pagahiusahon pag-usab diha sa iyang hingpit nga kahimtang” (Alma 11:43). Mipasabut si Presidente Joseph F. Smith, “Pagkadaot pagakuhaon; mga depekto ayohon, ug ang mga lalaki ug babaye makakab-ot og kahingpitan sa ilang mga espiritu, ngadto sa kahingpitan nga gidesenyo sa Dios sa sinugdanan.”⁹
Maanindot. Miingon si Presidente Lorenzo Snow (1814–1901), “Walay lain mas nindot tan-awon kay sa usa ka lalaki o babaye nga nabanhaw.”¹⁰
Mahimayaon. Si Presidente Boyd K. Packer, Presidente sa Korum sa Napulog Duha ka mga Apostoles, miingon. “Ang imong espiritu batan-on ug baskog ug maanindot. Bisan kon ang imong lawas tigulang ug adunay sakit o baldado sa bisan unsang paagi, kon ang espiritu ug ang lawas pagausahon sa Pagkabanhaw, nan ikaw mahimayaon; dayon ikaw pagahimayaon; dayon ikaw mahimaya.¹¹
Walay kasubo o kasakit. “Ang kamatayon wala na, ug wala na usab unyay pagminatay, ni paghilak, ni kasakit” (Pinadayag 21:4).

Unsay mahitabo sa mga tawo nga namatay nga mga bata pa?

Sumala ni Propeta Joseph Smith, ang mga ginikanan sa bata nga namatay sa bata pa “maangkon ang hingpit nga kalipay, ang kahimuot ug katagbawan sa pag-amuma [kaniya], human sa iyang pagkabanhaw, hangtud nga siya hingpit nga motubo sa espiritu.”¹²

Unsay mahitabo sa mga tawo nga gi-cremate o wala malubong?

Bisan og ang Simbahan wala mag-awhag og cremation, nagtuo kita nga bisan unsa pa, ang tanang mga tawo mabanhaw uban sa hingpit nga lawas. Si Presidente Brigham Young mitudlo nga sa pagkabanhaw “ang talagsaon nga mahinungdanong mga tipik nga naghulma sa atong mga lawas dinhi, kon kita mihatag og pagtahud, bisan og kini gibutang sa kahiladman sa dagat, ug bisan ang usa ka tipik atua sa amihanan, ang lain atua sa habagatan, ang lain sa silangan, ug ang lain sa kasadpan, maghiusa pag-usab sa usa ka pagpamilok sa mata, ug ang atong mga espiritu mosulod niini.”¹³

Nganong Pisikal nga Pagkabanhaw?

Ang pisikal nga pagkabanhaw kabahin sa plano sa Dios ug gitudlo sa mga propeta sukad sa panahon ni Adan (tan-awa sa Moises 5:10). Apan “ang yawa walay lawas, ug kini ang iyang silot,”¹⁴ mao nga iyang tuison kini nga pagtulun-an aron nga ang mga tawo dili motuo sa usa ka pisikal nga pagkabanhaw.

Daghang mga tawo nagtuo nga ang pisikal nga lawas sama sa prisohan alang sa espiritu ug nga tinud-anay kitang magmalipayon lamang kon ang espiritu makalingkawas gikan sa lawas, apan dili kini tinuod. Ang Ginoo mipadayag nga ang pisikal nga pagkabanhaw gikinahanglan tungod kay:

Mao kini ang paagi nga kita makadawat og kahingpitan sa kalipay. Ang “espiritu ug elemento [usa ka pisikal nga lawas] lamang, dili gayud mabulag, makadawat sa kahingpitan sa himaya” (D&P 93:33). Nasayud usab kita nga kadtong namatay ug naghulat didto sa kalibutan sa espiritu alang sa Pagkabanhaw ni Kristo “nagtan-aw diha sa dugay nga pagkawala sa ilang mga espiritu gikan sa ilang mga lawas ingon sa usa ka ulipon” (D&P 138:50).
Usa kini ka panalangin sa atong pagpili sa plano sa Langitnong Amahan. Sa wala pa kita matawo dinhi sa kalibutan, ang tanang espiritu nga mopuyo dinhi sa kalibutan mipili sa pagsunod sa plano sa Langitnong Amahan kay sa rebelyon ni Satanas (tan-awa sa Abraham 3:23–28). Isip resulta, nakadawat kita og mortal nga lawas ug dayon, pinaagi sa gasa sa Pagkabanhaw ni Kristo, kita mabanhaw uban sa imortal nga lawas. Kadtong misunod ni Satanas didto sa kalibutan nga wala pa dinhi sa yuta dili gayud makadawat sa bisan unsa nga matang sa pisikal nga lawas.
Magdala kini kanato balik sa atubangan sa Dios aron pagahukman. Ang Basahon ni Mormon klarong nagtudlo nga ang gahum sa pagkabanhaw nga nakapahimo nato sa pagsulod sa atubangan sa Dios aron hukman sumala sa mga binuhatan.¹⁵
Gikinahanglan ni alang sa kaluwasan. Mitudlo si Joseph Smith, “Walay tawo nga makaangkon … og kaluwasan gawas pinaagi sa tabernakulo [sa pisikal nga lawas].”¹⁶
Mao kana ang paagi nga kita mahimong sama sa Langitnong Amahan ug ni Jesukristo. “Ang Amahan adunay lawas nga unod ug mga bukog nga mahikap ingon sa tawo; ang Anak usab” (D&P 130:22).

Mga Leksyon sa Dominggo

Ang Hilisgutan Niining Bulana: Ang Pag-ula ni Jesukristo

MGA PAGHULAGWAY PINAAGI NI G. BJORN THORKELSON; O Akong Amahan, ni Simon Dewey

Siya Buhi, ni Simon Dewey; SA TUO: PAGHULAGWAY PINAAGI NI G. BJORN THORKELSON