Mga Leaders Nagdasig sa mga Miyembro sa Pagsumpay sa Family history ngadto sa Templo
Niadtong Oktobre 2012 ang Unang Kapanguluhan nanawagan sa mga miyembro sa paggamit sa mga ngalan sa ilang pamilya alang sa buluhaton sa templo ug mihatag og lima ka giya pagtabang sa mga miyembro nga makakaplag og katumanan sa pagtrabaho sa family history ug pagtambong sa templo.
Mga miyembro makasanong sa tawag sa pagpangita, pagpangandam, ug pagpaambit sa mga pangalan alang sa templo pinaagi sa paggamit sa mga kapanguhaan nga gitanyag sa LDS.org ug FamilySearch.org. Ang mga tumong nga gilatid sa sulat sa unang kapanguluhan mao ang:
1. “Kon ang mga miyembro sa Simbahan makakaplag sa mga pangalan sa ilang mga katigulangan ug modala niadtong mga ngalan ngadto sa templo alang sa pagbuhat sa ordinansa, ang kasinatian sa templo mahimong mas maanindot.”
Si Elder Richard G. Scott sa Korum sa Napulog Duha ka Apostoles miingon, “Bisan unsang buhat nga inyong himoon sa templo maoy oras nga maayong pagkagahin, apan ang pagdawat og mga ordinansa alang sa usa sa imong katigulangan naghimo sa imong panahon sa templo nga mas sagrado, ug mas dagkong panalangin ang madawat. Ang Unang Kapanguluhan nag-ingon, ‘Ang atong pinakaimportanting obligasyon mao ang pagpangita ug pag-ila sa atong kaugalingong katigulangan.’” (“Ang Hingpit nga Kalipay sa Pagtubos sa mga Patay,” Liahona, Nob. 2012, 93–94).
Sa LDS.org, pagkat-on pa kon nganong gihangyo ta sa pag-andam og mga ngalan gikan sa atong pamilya aron dad-on sa templo pinaagi sa pagklik sa Resources, Family History, ug Nganong kinahanglan ta nga mohimo og buluhaton sa templo alang sa atong kaliwatan ? (ang video anaa ubos sa Why Do We Do Family History Work?).
2. “Mga miyembro nga limitado ang kahanas sa pagpangita sa ilang family history giawhag sa paghimo og mga ordinansa pinaagi sa mga ngalan nga gihatag sa ubang mga miyembro o sa templo.”
Daghang mga miyembro sa Simbahan nga layo ra sa mga templo. Mga lider sa simbahan modasig niini nga mga miyembro sa pagbuhat kutob sa ilang mahimo. Mga miyembro nga walay templo sa duol makahimo sa pagsiksik sa family history ug ipalihok sa uban ang mga ordinansa sa templo.
Ubang mga miyembro nahasol nga basin ang tanang mga pagsiksik sa family history ug mga buluhaton alang sa ilang mga katigulangan nahuman na. Kini nga mga miyembro gidasig sa pagsulod sa templo, labing maayo nga makadala og pangalan sa pamilya sa ubang mga miyembro.
Sa lds.org/temples, Find a Temple makatabang sa pagpangandam sa sunod nga pagtambong sa templo.
3. Ang kabatan-onan ug batan-ong mga single adult giawhag gyud sa “paggamit sa mga ngalan sa ilang pamilya o mga pangalan sa mga katigulangan sa mga miyembro sa ilang ward ug stake alang sa buluhaton sa templo.”
“Gusto ba ninyo mga kabatan-onan nga mawagtang ang impluwensya sa kaaway sa inyong kinabuhi?” Si Elder Scott nangutana. “Isubsob ang inyong kaugalingon sa pagpangita sa inyong mga katigulangan, pag-andam sa ilang mga ngalan alang sa sagradong mga ordinansa sa templo, ug dayon adto sa templo aron mobarug isip puli nila sa pagdawat sa mga ordinansa sa bunyag ug sa gasa sa Espiritu Santo. Sa inyong pagdako, makaapil na usab kamo sa pagdawat sa ubang mga ordinansa. Wala na akoy mahunahuna nga mas labawng makapanalipod gikan sa impluwensya sa kaaway sa inyong kinabuhi” (“Pagtubos sa mga Patay,” 94).
Usab diha sa seksyon sa Family History sa LDS.org, ubos sa Getting Started, pangitaa ang lima ka lakang sa pag-andam og mga ngalan sa pamilya alang sa templo.
4. Mga lider sa priesthood kinahanglan mosiguro nga ang mga miyembro “magkat-on sa doktrina nga mobati ngadto sa ilang mga amahan diha sa ilang mga kasingkasing ug sa mga panalangin sa pagsulod sa templo.”
Ang To Turn the Hearts usa ka giya sa lider nga gisuplementar ngadto sa Handbook 2: Administering the Church aron pagtabang sa mga lider sa priesthood sa ward ug stake nga makasuporta sa mga miyembro sa ilang mga kaakohan sa pagsiksik sa patay na nga mga kaliwatan ug mopahigayon sa mga makaluwas nga mga ordinansa sa templo. Naglakip kini og mga video ug dokumento kon giunsa sa ubang mga stake paggamit ang buluhaton sa templo ug family history aron malig-on ang tagsa-tagsa ug mga pamilya.
Suhira ang mga kapanguhaan sa lider diha sa LDS.org pinaagi sa pagklik sa Resources, All Callings, Family History, ug Leader Resources.
5. Kadtong adunay “daghang pundo nga mga ngalan sa pamilya [gi-awhag] sa pagpadala niini sa tukmang panahon aron ang gikinahanglang nga mga ordinansa mapahigayon.”
Kasamtangang adunay 12 ka milyon ka mga ngalan nga anaa sa FamilySearch.org nga gireserba sa mga sakop sa pamilya aron sila mismo ang mohimo sa mga ordinansa. Daghang ngalan, hinoon, ang gitipigan lang sa daghang mga katuigan.
“[Ang mga katigulangan] basin wala kaayo malipay nga magpadayon nga maghulat alang sa ilang mga ordinansa nga mapahigayon,” pulong ni Elder Scott. “Moawhag kami ninyo nga dunay daghang gipareserba nga ngalan nga ipakigbahin kini aron ang mga sakop sa inyong gipalapdang pamilya o ward ug stake makatabang ninyo sa pagkompleto niana nga buhat. Mabuhat ninyo kini pinaagi sa pagpang-apud apud og mga temple card ngadto sa mga miyembro sa ward o stake nga andam motabang o sa paggamit sa FamilySearch computer system sa pagsumiter og mga ngalan direkta sa templo” (“Pagtubos sa Patay,” 94).
Sa gihisgutang Getting Started nga seksyon, diha sa I Want to Share Names with Others, i-klik ang Watch Video, dayon tan-awa ang video Releasing Names for Temple Work alang sa impormasyon bahin sa pagreserba og mga ngalan.
Ang Simbahan adunay daghang kapanguhaan nga gi-imprinta ug anaa sa internet aron magpasabut sa mga miyembro sa rason nganong mag-andam og mga ngalan sa pamilya alang sa templo ug unsaon pagbuhat niini.
Paghulagway sa litrato pinaagi ni David Stoker