Unahon ang Among Ikapulo
Carrie Dalby Cox, Alabama, USA
Sa ting-init sa 2006, ang akong bana nagtrabaho isip drayber sa truck. Tungod kay tag-duha ka semana siyang wala sa balay, ang responsibilidad sa pagbayad sa galastuhon anaa gyud nako. Sa iyang trabaho dili magparehas ang kinitaan matag bulan, maong lisud gyud ang pagbadyet.
Kadto nga Hulyo, ang iyang sweldo mas gamay kaysa naandan ug sa akong nabadyet. Human nako madeposito iyang tseke, gikompara nako ang kantidad sa bangko ngadto sa among bayrunon. Nakita nako nga kon akong bayaran ang tanan, apil ang ikapulo, makulangan mi og $30. Kami tigbayad og full-tithe, nakat-on sa leksyon sa lisud nga paagi mga pipila ka tuig ang milabay dihang nalaktawon namo ang pagbayad sa ikapulo. Ang dili pagbayad sa ikapulo karon dili opsyon.
Kahinumdom ko og mga istorya sa mga tawo nga giuna ang ilang ikapulo sa dihang lisud kaayo ang kwarta ug nakadawat og kwarta sa milagrusong paagi. Kasagaran sulatan nako ang mga tseke nga kinahanglang i-mail anang adlawa, mao nga ang tseke para sa ikapulo panagsa rang unang masulat. Apan adtong adlawa mihukom kong unahon ang tseke para sa ikapulo, nasayud nga ang Ginoo mosangkap namo og paagi nga mabayaran among galastuhon.
Pagka-Lunes nasayran nako nga ang community class nga gipaapilan nako sa akong kinamagulangang anak wala madayon, ug ang $20 nga tseke nga akong gibayad iuli. Sa dihang akong gibalanse akong checkbook, gikwenta’g apil ang giuli nga $20, nakaamgo ko nga nasayop ko og kwenta og $23 sa milabayng semana. Dugang pa, duha ka adlaw human niadto nakadawat mi og refund nga tseke nga $36 gikan sa among pediatrician kay sobra ang bayad. Karon, imbis nga nagkulang og $30, kami may hapit $50 nga sobra.
Ang Ginoo mituman sa Iyang saad sa Malaquias 3:8–12 nga kon kita mobayad sa atong ikapulo, Siya mobu-bu og panalangin. Nasayud ko nga tungod sa among pagsunod sa sugo sa Ginoo nga unahon og bayad ang ikapulo nga kami napanalanginan.