Pagpabilin sa Cape Town
Nicky Burgoyne Smith, Utah, USA
Sukad nga nakaserbisyo ko og misyon sa England London Mission, ganahan kong mobalik ug motrabaho didto. Bag-ohay lang nga nakahuman og master’s degree, mihukom ko nga panahon na para mobalhin sa London. Nakakuha ko og trabaho ug positibo ang akong pagbati sa pagbalhin.
Apan, usa ka gabii, nag-ampo ko sa pagsuta sa kabubut-on sa Ginoo ug kon sakto ba nga mobalhin sa London. Sa dayon nakong pagkatulog, kanunay nakong mahunahunaan: “Kinahanglan kang magpabilin sa Cape Town.” Kini nga hunahuna mibalik-balik sulod sa pipila ka oras. Sa katapusan mihukom ko nga ang Dios gustong magpabilin ko sa Cape Town. Bisan ganahan kong mobalhin, mipili kong magpabilin. Diha-diha nakatulog ko.
Pagkasunod adlaw nagsugod ko sa pagpangatarungan sa nahitabo sa miaging gabii ug naglibog kon moadto ba gyud ko sa London. Apan ang kasinatian sa miaging gabii nausab adtong gabhiuna. Ang hunahuna nga “Kinahanglan kang magpabilin sa Cape Town” mibalik-balik kanako. Sa akong pagpamalandong niini, nakombinser ko nga gusto sa Ginoo nga magpabilin gyud ko sa Cape Town, ug gusto ko nga motuman unsay ipabuhat sa Ginoo ngari nako.
Pagkasunod semana gitawagan ko sa presidente sa stake ug mihangyo nga makigkita siya nako. Diha dayon nasayud ko nga ang Ginoo adunay calling alang nako. Ang Espiritu mipamatuod nga ang rason nga kinahanglang magpabilin ko sa Cape Town kay ang Ginoo adunay ipabuhat nako.
Gidawat nako ang calling isip presidente sa Young Women sa stake, ug samtang nagserbisyo sa sunod katuigan, nahimo kong instrumento sa mga kamot sa Ginoo. Isip resulta, ang akong kinabuhi ug kinabuhi sa mga tawo nga akong giserbisyohan napanalanginan. Milambo ko sa abilidad sa pagpangulo, ug ang Ginoo mitudlo nako og daghang butang pinaagi sa akong pagserbisyo sa uban.
Sukad adto mas masaligon nako sa Ginoo. Mapasalamaton kaayo ko sa hilum nga pagdasig sa Espiritu nga naggiya kanako sa pagkasayud ug pagbuhat sa Iyang kabubut-on. Pinaagi sa dili kaayo pagduha-duha ug kaandam nga mosunod sa inspirasyon nga akong madawat, nakasinati ko og hingpit nga kalipay ug kalinaw, nasayud nga ang akong Langitnong Amahan nalipay sa akong kinabuhi.