Ang Ikapulo Makapalambo sa Pagtuo

Lourdes Soliz de Duran, Bolivia

Wala madugay human sa among kasal, ang akong bana ug ako mibalhin sa usa ka lungsod sa eastern Bolivia diin kami lang ang miyembro sa Simbahan. Ang akong bana bag-ong kinabig, ug gusto namong sundon ang tanang mga sugo sa Ginoo.

Matag bulan among tigimon ang among ikapulo sa usa ka sobre hangtud amo ning mahatag sa among bishop. Ang akong bana may kusog nga konbiksyon nga kon kami mosunod niining balaod, kami mapanalangin ug maprotektahan.

Nagpuyo mi sa init, mahal, dili komportabling kwarto sa hotel samtang nangita mi og kaabangan. Sulod sa daghang adlaw wala gyud mi makakita og kabalhinan. Ang bugtong namong nakit-an mao ang gamay, nindot nga balay nga ang tag-iya nagpuyo sa laing siyudad. Daghan ang misulay sa pag-abang sa balay, apan dili gyud nila makit-an ang tag-iya.

Usa ka buntag sa dihang bag-o lang mi nag-ampo kabahin sa among sitwasyon, may batan-ong lalaki nga nanuktok sa pultahan. Miingon siya namo nga ang tag-iya sa balay miuli aron mobisita og kadiyot. Nagdali-dali akong bana nga makigkita niya samtang ako nag-ampo nga unta kami ang makaabang sa balay. Sa iyang pag-uli, siya misulti nga ang babaye mipaabang sa balay kanamo sa labing ubos nga presyo. Ang nakadugang sa among kalipay kay ang balay aduna nay mga gamit. Adtong higayona, ang naa lang namo kay duha ka dagkong karton ug malita nga puno sa among gamit.

Ang balaod sa ikapulo walay kalabutan sa kwarta apan hinoon sa hugot nga pagtuo. Gamay lang ang sweldo sa akong bana, apan sa among matinud-anong pagbayad og ikapulo, ang Ginoo mipanalangin namo og nindot nga balay ug naghimo kanamo nga makasangkap sa among kaugalingon.