Alang sa Kalig-on sa mga Kabatan-onan
Ako Adunay Pagpamatuod sa Pamilya
Mga tuig na ang milabay naminaw ko sa usa ka sister sa akong ward nga mihatag sa iyang pagpamatuod. Nakahinumdom ko unsay iyang gipakigbahin ug unsay akong gibati. Si Sister Reese mipasalamat sa iyang matarung nga pamilya ug sa kalipay ug sa kahupayan nga gikahatag kaniya sa kahibalo sa mahangturong pamilya. Akong gibati nga ang Espiritu mimatuod sa akong sinsero nga tinguha nga makabaton sa sama nga panalangin ug pagpamatuod mahitungod sa mga pamilya.
Motanyag ko og pipila ka mga sugyot sa pagtabang ninyo nga makaangkon og pagpamatuod sa kaimportante sa pamilya.
1. Pagmainampoon sa pagtinguha sa inspirasyon sa Ginoo ug sa pagsulat sa inyong mga impresyon samtang kamo magtuon. Himoang putli ang inyong kinabuhi pinaagi sa pagsunod sa mga sugo. Makatabang kini ninyo nga makabaton sa Espiritu, kinsa motabang ninyo sa inyong pagpangita.
2. Pagbasa sa “Ang Pamilya: Usa ka Pamahayag ngadto sa Kalibutan,”1 unang gihatag pinaagi sa usa ka propeta hapit 20 ka tuig na ang milabay. Ang akong pagpamatuod sa mga propeta, mga manalagna, ug mga tigpadayag nalig-on sa dihang akong gibasa kini nga dokumento ug naghunahuna sa mga kausaban nga nahitabo sa kalibutan kabahin sa pamilya. Samtang mobasa kamo sa pamahayag, isulat ang mga doktrina, tambag, mga pasidaan, ug sa gisaad nga mga panalangin ug unsay personal nga ipasabut niini diha kaninyo.
3. Pagtuon sa mga pulong sa mga propeta ug sa mga General Authority. Ang ilang mga pulong dinasig ug mopanalangin niadtong motuo ug mosunod niini. Pananglit, si Presidente Thomas S. Monson mitudlo: “Ang pamilya kinahanglang mabutang sa labing importante nga dapit sa atong pagpakabuhi tungod kay mao lamang kini ang baruganan diin ang katilingban sa responsable nga mga tawo nakakita niini nga posibling makatukod sa umaabut ug mapadayon ang mga mithi nga ilang gihambin karon.”2
4. Pagtuon sa mga kasulatan. Kini adunay daghang mga ehemplo sa mga pamilya nga naestablisar diha sa pundasyon sa pagkamatarung, pagkamasulundon, ug hugot nga pagtuo sa pagpamatuod kang Jesukristo. Basaha ang inyong mga kasulatan, ilabi na ang Basahon ni Mormon, uban sa pangutana, “Unsa nga mga pagtulun-an ang mopanalangin nako kon gamiton sa akong pamilya karon ug sa umaabut?”
5. Pagtuon sa Alang sa Kalig-on sa mga Kabatan-onan, ilabi na ang seksyon sa “Pamilya.” Pagkat-on sa mga responsibilidad ug mga panalangin sa usa ka pamilya. Hinumdumi ang trabaho nga gikinahanglan alang sa kada sakop sa paghimo ug pagpadayon sa nagkahiusa, nagsentro sa ebanghelyo nga pamilya. Ilha kon unsaon ninyo sa pagpalig-on ang mga relasyon sa inyong pamilya. Pangitaa ang kasiguroan ug kahupayan nga makita sa sidebar nga naa sa tuo.
Sa tinuod, ang kada seksyon sa Alang sa Kalig-on sa mga Kabatan-onan direktang naghisgot ug makapalambo sa mga relasyon sa pamilya. Samtang ang mga sumbanan ug mga sugo gisunod sa kada sakop, sila mapanalanginan sa pagpakig-uban sa Espiritu Santo ug makakuha sa sagrado nga mga ordinansa ug mga pakigsaad nga mopanalangin sa indibidwal nga mga pamilya karon ug sa kahangturan.
6. Pagbuhat sa unsay inyong nakat-unan sa inyong pagtuon ug gamita ang inyong nakat-unan sa inyong pamilya (tan-awa sa D&P 88:119).
Nakadungog ko og makapatandog nga mga pagpamatuod sa batan-ong mga babaye kinsa nagtrabaho sa ikatulo nga kasinatian diha sa mithi nga seksyon sa diosnong kinaiya sa Personal nga Kauswagan, diin ang batan-ong mga babaye gihangyo sa paghimo og espesyal nga pagpaningkamot sa paglig-on sa ilang pamilya sulod sa duha ka mga semana (ang batan-ong mga lalaki makakita sa susama nga plano sa Pagtuman sa Akong Katungdanan ngadto sa Dios [2010], 80–81). Usa ka batan-ong babaye mipakigbahin, “Nakasinati ko og milagro. Gimahal nako ang akong igsoong babaye, ug nahitabo kini mga duha lang ka semana! Gihimo nakong tumong nga masubli kini nga kasinatian alang sa kada miyembro sa akong pamilya kada tuig. Ngano man? Tungod kay nakapalipay kini nako pag-ayo!”
7. Pag-ampo ug tinguhaa ang kumpirmasyon pinaagi sa Espiritu sa kaimportante sa pamilya. Pagmapailubon ug pagmabinantayon. Ang pagpamatuod moabut pinaagi sa Espiritu tungod kay “ang pamilya gi-orden sa Dios” ug “kini ang labing importante nga unit karon ug sa kahangturan.”3
Nasayud ko nga pinaagi sa paghimo niining mga butanga moabut ang adlaw nga kamo sama ni Sister Reese, makahimo sa pagbarug ug mopakigbahin, “Ako dunay pagpamatuod sa pamilya, ug kini nga kahibalo naghatag nako og kahupayan ug kalipay.”
Paghulagway sa litrato pinaagi sa Publishing Services Department