Faifeautalai Laitiiti a Tinamatua Tene
O Emília Maria Guimarães Correa e nofo i le Itumalo Feterale, Pasila.
“Pe a tautala atu se tagata e ala i le mana o le Agaga Paia, e molioo e le mana o le Agaga Paia i loto o le fanauga a tagata” (2 Nifae 33:1).
Sa nonofo Vito ma lona tina ma lona tuafafine i le fale o lona Tinamatua o Tene. Sa oo ina ma’i le tinamatua o Vito ma lē mafai ai ona aluese ma lona moega mo le tele o vaiaso. Sa tuua toatasi na o ia i lona potu.
Sa tonu loa ia Vito e mafai ona fai o ia ma uo a Tinamatua Tene. O aso uma lava pe a sau o ia i le fale mai le aoga, na te aveina ai se kopi o le Liahona i totonu o le potu o Tinamatua ma faitau atu i ai tala mai le itulau a tamaiti.
Ina ua uma ona ia faitauina atu uma ia kopi o le Liahona sa i ai a lona aiga, sa amata ona ia faitau atu ia te ia le Tusi a Mamona ma le Tusi Paia. O Tinamatua Tene sa le o se tagata o le Ekalesia, ae sa fiafia o ia e faalogologo pe a faitau atu Vito ia te ia. Sa fiafia o ia e aoao e uiga i le talalelei.
Sa tele ni fesili sa fesiligia e Tinamatua. Afai sa le’i iloa e Vito ia tali, e fesili atu i lona faiaoga o le Peraimeri, pe sue foi i tusitusiga paia. Sa ta’u e Tinamatua ia Vito o lana faifeautalai laitiiti.
Sa ta’u atu e Tinamatua Tene ia Vito e tele ni mea sa ia aoaoina mai ia te ia. Sa ia folafola atu o le a la o i le lotu pe a malosi o ia. O le mea sa ia aoaoina sa mafua ai lona manao ia malosi ma suesue atili e uiga i le talalelei.
Ina ua toe manuia Tinamatua, sa tausisi o ia i lana folafolaga. Sa la o atu ma Vito i le lotu e aoao atili ai e uiga i mea sa ia aoao atu ia te ia. Sa le’i umi ae papatiso ma faamauina Tinamatua. Sa fesoasoani Vito ia ona iloa e moni le talalelei.
Ina ua matua Vito, sa avea o ia ma se faifeautalai faamisiona i le Misiona a Boston Massachusetts. A o le’i alu o ia [i le misiona], sa la o atu i le malumalu—ma Tinamatua Tene.
Ata mai faaaloaloga a Emilia Maria Guimarães Correa