O Le Taua o Uo Lelei

O uo e malolosi tele a latou faatosinaga i a tatou amioga, ae maise lava i a tatou tupulaga talavou. “O le a latou faatosinaina lou mafaufau ma amioga, ma e fesoasoani foi e iloa ai le ituaiga tagata o le a avea ai oe.”¹ Ma a e filifilia ni uo lelei, “o le a avea i latou ma se malosiaga ma se faamanuiaga sili ia te oe. … O le a latou fesoasoani ia te oe e avea ma se tagata lelei atu ma o le a faigofie ai foi ona e ola i le talalelei a Iesu Keriso.”²

I itulau e 52–53 o le lomiga lenei, o loo aoao mai ai Elaine S. Dalton, o le peresitene aoao o Tamaitai Talavou, i le taua o le sailia ma le avea ma se uo lelei. Fai mai a ia, “o le sailia o uiga aupito sili ona lelei o le isi tagata o le ute lea o faauoga moni.”

O le fausia o faauoga i luga o nei mataupu faavae o le a fesoasoani ai i le autalavou e fausia ni mafutaga tumau ma ni tomai faaagafesootai o le a sili atu nai lo na o le avea ma ni “uo” i saite o upega o fesootaiga faaleagafesootai. I le avea ai ma matua e mafai ona e fesoasoani i lau fanau ia malamalama i le taua o le avea ma se uo lelei ma le filifilia o uo o le a uunaia i latou e ola i le talalelei. Atonu o le a aoga fautuaga nei.

Fautuaga mo le Aoaoina o le Autalavou

I le avea ai o se aiga, saili i tusitusiga paia mo faataitaiga o ni uo lelei. Talanoa po o a uiga na faamalosia ai na faauoga. Mafaufau ia Tavita ma Ionatana (tagai i le 1 Samuelu 18–23), Ruta ma Naomi (tagai i le Ruta 1–2), ma Alema ma atalii o Mosaea (tagai i le Mosaea 27–28; Alema 17–20).³
Suesue le vaega e faatatau i uo i le Mo Le Malosi o le Autalavou. Faasoa atu i lau autalavou le ala na faatosinaina ai lou olaga e faauoga. Fai atu ia i latou e faasoa atu pe na faapefea ona latou faatosinaina [a latou uo] ma pe na faapefea foi ona faatosina i latou e a latou uo.
Faitau le tusiga a Sister Dalton o loo i le lomiga lenei. Talanoa i le sini sa faatuina e lana tama teine o Emi, e saili ni [ana] uo lelei. Fesoasoani i lau fanau e faatutu ni sini e uiga i ituaiga uo latou te mananao e sue ma avea ai foi i latou.
Mafaufau e fai se afiafi faaleaiga e faasoa atu ai manatu mo le atiina ae o faauooga, e pei o le: “Ia i ai ni uo lelei, ia avea ma se uo lelei. Faaali atu le fiafia moni i isi; ataata ma faailoa atu ia i latou e te popole mo i latou. Fai tagata uma ma le agalelei ma le faaaloalo, ma ia aloese mai le faamasino atu ma le faitioina o i latou e siomia oe.”⁴

Fautuaga mo le Aoao Atu o Tamaiti

O le avea ma se uo e aofia ai le fesoasoani atu i isi. Faitau le “Tu Atu mo Kalepo” o loo i le Liahona o Mati 2009, ma talanoa faatasi ma lau fanau e uiga i auala e mafai ona latou agalelei atu ai i tagata uma latou te feiloai i ai.
I tulaga luma lava, e tatau ona tatou filifili po o le a le ituaiga uo o le a avea ai i tatou. Usu faatasi le pese “O Loo O’u Taumafai Avea e Pei o Iesu”⁵ ona outou talanoa lea ma lau fanau e uiga i auala e mafai ona latou filiflia e avea ai ma se uo lelei, e pei o le Faaola, i ni tulaga eseese.

Ata na tusia e Taia Morley