Feagaiga o le Malumalu

Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga. Mo nisi faamatalaga, alu i le reliefsociety.lds.org.

Faatuatua, Aiga, Toomaga

“O sauniga faaola e maua i le malumalu e mafai ai i se aso ona tatou toe foi atu i lo tatou Tama Faalelagi i se mafutaga faaleaiga e faavavau, ma faaeeina ai i faamanuiaga ma le mana mai luga, e matuai aoga ai lava a tatou osigataulaga uma ma taumafaiga uma,”¹ na saunoa mai ai Peresitene Thomas S. Monson. Afai e te le’i alu i le malumalu, e mafai ona e saunia e maua sauniga paia o le malumalu e ala i le:

Talitonu i le Tama Faalelagi, Iesu Keriso, ma le Agaga Paia.
Atiina ae se molimau i le Togiola a Iesu Keriso ma le talalelei toefuataiina.
Lagolago ma mulimuli i perofeta soifua.
O le agavaa mo se pepa malumalu e ala i le totogiina o le sefuluai, o le ola mama, o le faamaoni, tausia o le Upu o le Poto, ma ola e tusa ai ma aoaoga a le Ekalesia.
Tuu atu taimi, taleni, ma mea e maua e fesoasoani ai e fausia le malo o le Alii.
Auai i le faatinoina o le galuega o talafaasolopito o aiga.²

Sa aoao atili mai Peresitene Monson, “a tatou manatua feagaiga tatou te osia i totonu [o le malumalu], o le a sili atu ona tatou mafaia ona onosaia tofotofoga uma ma faatoilaloina faaosoosoga taitasi.”³

Mai Tusitusiga Paia

Mataupu Faavae ma Feagaiga 14:7; 25:13; 109:22

Mai lo Tatou Talafaasolopito

“E silia i le 5,000 le Au Paia sa lolofi atu i le Malumalu o Navu ina ua uma lona faapaiaga. …

“O le malosiaga, mana, ma faamanuiaga o feagaiga o le malumalu [sa lagolagoina] le Au Paia o Aso e Gata Ai i le taimi o la latou faigamalaga [i sisifo], ina ua latou [pagatia] i le malulu, vevela, fiaaai, matitiva, ma’i, faalavelave faafuasei, ma le oti.”⁴

E pei o le toatele o uso o le Aualofa, o Sarah Rich sa auauna atu o se tagata e galue i le malumalu. Sa ia saunoa e uiga i ona aafiaga: “Ana leai le faatuatua ma le malamalama sa faapea ona faaeeina i o matou luga i lena malumalu e … le Agaga o le Alii, semanu le matou faigamalaga e faapei o le puna ifo i le pouliuli. … Ae sa ia i matou le faatuatua i lo tatou Tama Faalelagi, … o le lagonaina o i matou o Ona tagata filifilia … , ma nai lo le faanoanoa, sa matou lagonaina le olioli ona sa oo mai le aso o lo matou laveaiga.”⁵

O le faigamalaga umi sa le o se “puna ifo i le pouliuli” mo tamaitai faamaoni o le Au Paia o Aso e Gata Ai. Sa lagolagoina i latou e a latou feagaiga o le malumalu.

O Le Mutaaga o le Auala o Parley, saunia e Glen S. Hopkinson, e le mafai ona kopiina