Sa Pe le Telefoni
Seda Meliksetyan, Aremania
Ia Mati 1997, a o ma nonofo ai i le aai o Rusia o Rostov-on-Don, sa ma papatiso ai ma lo’u toalua i Le Ekalesia a Iesu Keriso o le Au Paia o Aso e Gata Ai.
A o ou suesue i aoaoga faavae o le Ekalesia, e tele ni a’u fesili sa taliina ai. Sa manaia le aoao e uiga i le ata o le faaolataga, e aofia ai le faiga o le papatisoga mo e ua maliliu. Sa ou te’i i le iloa e mafai ona tatou papatiso mo o tatou tuaa ua maliliu.
O le tausaga talu ona uma ona ma papatiso, sa valaaulia ai i maua e le peresitene o le misiona e sauni e o atu i le malumalu. O se vaega o le ma sauniuniga, sa amata ai ona ma faia le sailiga o talafaasolopito o aiga. I se tasi aso a o ou mafaufau i le faiga o lenei galuega, sa tatagi le telefoni. O le tina o lo’u toalua. Sa ou fai atu i ai pe mafai ona ia auina mai se lisi o tuaa ua maliliu o le aiga o lo’u toalua. Sa ofo o ia ma fai mai ia te a’u o le papatisoina mo e ua oti e le o se aoaoga faavae a Keriso ae o se mea na faatupu fua e tagata Mamona. Sa ou le mautinoa pe faapefea ona ou tali atu ia te ia aua sa ou le masani i mau faaletusipaia sa lagolagoina ai le aoaoga faavae.
A o ou mafaufau i le auala e tali atu ai, sa pe le telefoni. Sa ou le mautinoa mo se minute po o le a le mea na tupu, ae sa ou tuuina i lalo le telefoni ae ou alu i lo’u potumoe. Sa ou uuina mai le Feagaiga Fou, tootuli e tatalo, ma ole atu i le Tama Faalelagi e faaali mai ia te a’u le mea e mafai ona ou maua ai le tali.
Ina ua uma la’u tatalo, sa ou susueina le Tusi Paia. Sa ou lagonaina le pei na ta’u mai e se isi ia te a’u e faitau le fuaiupu e 29 o le itulau tonu lea sa ou susue i ai. Sa ou i ai i le mataupu e 15 o le 1 Korinito, lea e talanoa mai ai e uiga i le aoaoga faavae o le papatisoina mo e ua oti.
Sa ootia lo’u loto ma faateia i le tali mai o le Tama Faalelagi i la’u tatalo i lena lava taimi. Sa o se faalogoga matagofie.
Sa ou mafaufau loloto e uiga i lenei aafiaga ae faafuasei ona toe tatagi mai le telefoni. O le tina o lo’u toalua, na fesili mai pe aisea na pe ai le telefoni. Sa ou fai atu i ai ou te le iloa ona ou fai atu lea e sue lana Tusi Paia ma faitau le 1 Korinito 15:29.
O ni nai aso mulimuli ane na taatia ai i luga o la’u laulau se lisi o tagata o aiga ua maliliu. Sa faitau le tina o lo’u toalua i le mau ma ua talitonu nei o le Faaola, e ala mai i le Aposetolo o Paulo, sa aoaoina mai le aoaoga faavae o le papatisoga mo e ua maliliu.
Ua folafola mai e le Atua ni faamanuiaga silisili ia i latou o e faia lenei galuega faaola. Ou te iloa e moni lea mea.