Sa i Ai se Mea sa Faaletonu o La’u Vaalele
Craig Willie, Iuta, ISA
I se tasi afiafi a o o’u aveina atu la’u vaalele e tumu i le pasese agai i le auala e masii ese ai vaalele, sa ou maua se lagona e i ai se mea ua faaletonu o le vaega e uli ai le vaalele. Ina ia faamaonia la’u uunaiga faaleagaga, sa ou aluese mai le auala e ui ai le vaalele ma fai ni nai liliuga faataamilo e 360 tikeri Sa foliga mai sa leai se mea na faaletonu.
Sa ou mafaufau, “Pe e tatau ona ou masii loa e momoli le pasese i lo latou nofoaga e faataunuu i ai i le taimi e tatau ai, pe e tatau ona ou toe foi i le faitotoa?” Sa ou iloaina o le toe foi o le a umi ai ona faatali. O auala e ui atu ai vaalele e tasi lava le ituala; o lea e tatau ai ona ou faatalitali i le pulega o le laueleele e fai se avanoa mo a’u e ui atu ai i le pisi o le auala. Ona matou faatalitali lea mo le vaega o enisinia e siaki le vaalele. O le tuai e ono aliae ai ni faafitauli mo le kamupani vaalele ma mo le pasese o e sa i ai tagata e faatalia i latou ma tagata e toe pue isi vaalele. Sa ou mafaufau foi pe o le a se tali mai a le matagaluega enisinia i la’u lipoti e faapea, sa i ai se faaletonu o le vaalele ae leai se mea e faamautu ai vagana ai se faalogoga malosi.
I le avea ai ma kapeteni o le vaalele, o a’u sa nafa ma lo matou saogalemu, o lea sa ou filifli ai e mulimuli i le uunaiga ma toe foi mai.
Ina ua matou taunuu i le faitotoa, sa ou fai atu i le enisinia sa ou maua se lagona sa i ai se mea na faaletonu i le vaalele ae sa ou le iloa po o le a le faafitauli. Sa le’i talitonu o ia sa i ai se faafitauli.
“Atonu ai lava ona o le susū o le auala,” o lana tala mai lea. “Atonu foi sa e sesee i le ta.” E ui i lea, sa malie e tilotilo i le kia o le ave i le pa’u pito i luma. Ina ua uma ona ia siakia, sa talosaga mai e toe o uma i fafo le pasese ina ia mafai ona ia aveina le vaalele e faataitai ai.
Ina ua foi mai i le 30 minute mulimuli ane, sa matuai popole lava o ia, I le taimi na alu ai e faataitai, sa ia faalogoina ai se pao motumotu o le oloia. Ina ua ia oomia taofi a o liliu e foi mai i le faitotoa, sa le mafai ona ia taofiofia le vaalele ma sa toeitiiti lava oso ese mai le auala e sesee ai le vaalele.
O se suesuega maeaea na faaalia ai sa le lelei le siakiina o taofi i le afiafi na muamua atu. Ana faapea ona ou faatulaueleeleina le vaalele i le taunuu ai o le matou faigamalaga, semanu e le aai taofi, ma le mafai ai ona ou taofiofia le vaalele.
Sa ou maua se isi vaalele e ave, ma sa ou momoliina ai ma le saogalemu la’u pasese i o latou nofoaga na faataunuu i ai e tolu itula na tuai ai.
Ua ou fiafia sa ou faalogo i musumusuga a le Agaga. Ou te iloa o le a taitaia i tatou e le Agaga pe afai tatou te sailia le taitaiga a le Alii ma faalogo i musumusuga.