Savali a le Au Peresitene Sili
Ua Toetu o Ia
O se molimau i le moni o le Toetu a Iesu Keriso o se puna lea o le faamoemoe ma le naunautai. Ma e mafai ona maua e soo se atalii/afafine o le Atua. Sa ou mauaina i se aso o le taumafanafana ia Iuni 1969 ina ua maliu lo’u tina, ma sa ou mauaina lava i tausaga uma talu mai lena taimi, ma o le a ou mauaina lava seia oo ina ou toe vaai ia te ia.
O le faanoanoa ona o le valavala mo se taimi le tumau sa vave ona suia i le fiafia. Sa sili atu nai lo na o se faamoemoe mo se toe faatasiga fiafia. Ona o le tele o mea ua faaali mai e le Alii e ala i Ana perofeta, ma ona ua faamautu mai e le Agaga Paia le moni o le Toetutu ia te a’u, ua mafai ai ona ou vaai faalemafaufau foliga o le toe faatasia ma e e pele ia i tatou ua faapaiaina ma toetutu.
“O i latou ia o e o le a tutulai mai i le toetutu mai o e amiotonu. …
“O i latou ia o e o o latou igoa ua tusia i le lagi, i le mea e afifio ai le Atua ma Keriso o le faamasino o tagata uma.
“O i latou ia o e o tagata amiotonu ua faaatoatoaina e ala ia Iesu le puluvaga o le feagaiga fou, o lē na faia lenei togiola ua atoatoa e ala i le faamaligiina o lona lava toto” (MF&F 76:65, 68–69).
Ona sa motusia e Iesu Keriso noataga o le oti, o fanau uma a le Tama Faalelagi e fananau mai i le lalolagi o le a toetutu i se tino o le a le toe oti. O la’u molimau la ma lau molimau e uiga i lena upumoni mamalu e mafai ona aveese ai le tiga o le maliu o se tasi e pele o le aiga po o se uo ae suia i le faatalitali atu ma le olioli ma se naunautaiga mausali.
Ua tuuina mai e le Alii ia i tatou uma le meaalofa o le toetu, e faapea ai ona tuu o tatou agaga i ni tino ua saoloto mai le le atoatoa faaletino (tagai i le Alema 11:42–44). O lo’u tina o le a foliga talavou ma susulu, e aveesea aafiaga o le soifua matua ma tausaga o mafatiaga faaletino. O lena mea o le a oo mai o se meaalofa ia te ia ma ia i tatou.
Peitai o i tatou o e moomoo ia faatasi ma ia e faavavau e ao ona faia filifiliga ia agavaa ai mo lena mafutaga, ia nonofo i le mamalu i le nofoaga o le a i ai le Tama ma Lona Alo Pele. E na o le pau lena o le nofoaga e mafai ona faaauau ai e faavavau le olaga faaleaiga. O se molimau o le upumoni ua faateleina ai lo’u naunau ia ou agavaa a’u lava ma i latou ou te alofa i ai mo le tikeri aupito maualuga o le malo selesitila e ala i le Togiola a Iesu Keriso o loo galue i o tatou olaga (tagai i le MF&F 76:70).
Ua ofoina mai e le Alii ia i tatou se taiala i lenei tausinioga mo le ola e faavavau i tatalo o le faamanatuga, o loo fesoasoani ia te au ma e mafai foi ona fesoasoani ia te oe. Ua valaauliaina i tatou e faafou a tatou feagaiga o le papatisoga i sauniga faamanatuga uma.
Tatou te folafola atu e manatua pea le Faaola. O faatusa o Lana taulaga e fesoasoani tatou te talisapaia ai le telē o le tau sa Ia totogia e motusi ai noataga o le oti, e ofoina mai ia i tatou le alofa tunoa, ma tuuina mai ai le faamagaloga o a tatou agasala uma pe afai tatou te filifili e salamo.
Tatou te folafola atu o le a tatou tausia Ana poloaiga. O le faitauina o tusitusiga paia ma saunoaga a perofeta soifua ma faalogo i failauga musuia i a tatou sauniga faamanatuga e faamanatu mai ai ia i tatou a tatou feagaiga ina ia faia faapea. O le Agaga Paia na te aumaia i o tatou mafaufau ma loto ia poloaiga e sili ona manaomia ona tatou tausia i lena aso.
I tatalo o le faamanatuga, ua folafola mai e le Atua e auina mai le Agaga Paia e faatasi ma i tatou (tagai i le Moronae 4:3; 5:2; MF&F 20:77, 79). Sa ou iloaina i lena taimi e mafai e le Atua ona tuuina mai ia te au se mea ou te lagonaina e pei lava o se faatalanoaga patino. Na te ta’u mai ia te au mea sa ou faia na faafiafiaina ai o Ia, o lo’u manaomia ona salamo ma faamagalo atu, ma igoa ma foliga o tagata e finagalo o Ia ou te auauna atu i ai mo Ia.
I le aluga o tausaga, o lena aafiaga tupu soo ua liliuina le faamoemoe i lagona o le alofa mama ma aumaia ai se faamautinoaga o le alofa mutimutivale sa tatalaina mo au e le Togiola ma le Toetu a le Faaola.
Ou te molimau atu o Iesu o le Keriso toetu, o lo tatou Faaola, ma o lo tatou faataitai atoatoa ma le taiala i le ola faavavau.
Aoao Atu mai Lenei Savali
E tatau ona tatou “faatatauina tusitusiga paia uma ia te i [tatou], ina ia avea ma o [tatou] manuia ma aoaoga” (1 Nifae 19:23). Mafaufau e faitau ia tatalo o le faamanatuga, o loo maua i le Mataupu Faavae ma Feagaiga 20:76–79. A uma ona faitau aoaoga a Peresitene Eyring e uiga i tatalo o le faamanatuga, atonu e te manao e fai atu ia i latou o loo e aoaoina e mafaufau i ni auala e mafai ai e nei tatalo ona taialaina o latou olaga ma fesoasoani latou te toe foi atu ai e nonofo faatasi ma le Tama Faalelagi ma Iesu Keriso.
Ata na pueina e Matthew Reier; Ua Toetu o Ia, saunia e Del Parson, e le mafai ona kopiina