Filifilia o le Vaega e Sili Atu

Saunia e Matthew D. Flitton

Mekasini a le Ekalesia

O nisi taimi e tatau ai ona e tuua se mea lelei mo se mea e sili atu le lelei.

I se tasi aso, sa faateia ai e Zoltán Szücs o Szeged, Hanikeri, lona faiaoga vaaalo i le tauina atu ia te ia o le a le alu i Siamani mo se tauvaga.

“Sa faia i le aso tonu lava o lo’u papatisoga, o lea sa ou fai atu ai e leai,” o le tala lea a Zoltán.

I le 17 o ona tausaga, sa manumalo ai Zoltán i le tele o tauvaga i alogavaa. O se taaloga lauiloa i Hanikeri, ma sa lelei ai Zoltán—sa lelei tele ma o le avea ma se tagata polofesa o se mea e mafai moni lava. I tua atu o le filifili e misi mai le na o se tauvaga se tasi, o le a le umi ae tuu atoa e Zoltán le alovaa. Sa i ai se mea e sili atu le lelei na te faia.

Sa manaia lava le alovaa ia Zoltán. I tausaga sa galulue faatasi ai ma lona faiaoga, sa ia aoaoina ai le amio-pulea, usiusitai, ma le galue malosi. Sa aoao ai foi e Zoltán ia aloese mai fualaau faasaina ma vaisu e faaleagaina ai ana taumafaiga. Sa le o se olaga faigofie; sa tuuatoatasi, ma o le alu e taalo faapolofesa o le a sili atu se taimi e alu ai. O faataitaiga faapolofesa e tai 12 itula i le aso ma e tatau ona tauva i Aso Sa.

“O le alovaa sa alu ai le tele o lo’u taimi,” o le tala lea a Zoltán. “Sa matuai ou naunau lava i ai. Ona o lena mea, sa tele ai ni mea sa ou le faia i lo’u olaga.”

O le pogai lena sa filifili ai Zoltán e le mafai ona tuuto atu o ia lava i le talalelei ma le alovaa. I le 2004 sa ia ta’u atu ai i lona faiaoga na te le toe faia lava le taaloga o le alovaa.

O le amataga o le tausaga lena, sa amata ai ona aoao e faifeautalai le tina o Zoltán. Sa le’i auai o ia i lesona. Sa ia taliaina ma le musuā le valaaulia a lona tina i lona papatisoga. Ae sa ootia lona loto i mea sa ia lagonaina i le taimi lava na ia ulufale ai i le falelotu. Sa malie Zoltán e feiloai i faifeautalai, o se vaega ona e mafai ona talanoa atu ia i laua.

“Sa manaia faifeautalai ia te a’u aua o i latou o tagata masasni ae sa ola i se tulaga faatonuina maualuga atu,” o lana tala lea.

Ona o le tulaga faatonuina maualuga atu ua ola ai Zoltán i le avea ma se tagata alovaa, o lea sa ia talia fiafia ai aoaoga o le talalelei o ni mea taua. Sa papatisoina o ia i le lua masina mulimuli ane.

O le taimi muamua sa faapea o ia e mafai ona faaauau pea ona alovaa ae e le tauva i Aso Sa. Ae peitai, talu ai o ia o se ituaiga o tagata o lē, o le taimi lava e tautino ai i se gaoioiga po o se kosi, e manao ia maualuga lona taumafai i ai, o lea sa filifili ai e tuu ese atoa le alovaa.

E faatasi talu ona uma ona papatiso sa taumafai ai e alovaa tau lava o se mea e faapasi ai le taimi. Ina ua ia faia, sa talosaga atu lona faiaoga e fesoasoani i isi ma faatulaga malaga aua o le a le toe tauva o ia. Peitai sa le’i manao o ia e fai ni tautinoga i le alovaa—po o se isi lava gaoioiga—lea e ono faalavelave i le avea o ia ma se soo.

O lea sa tautau ai e Zoltán lana foe ae tuuto atu o ia lava e auauna i le Ekalesia i se filifiliga taua e pei o le filifiliga sa faia e Peresitene Howard W. Hunter (1907–95) ina ua faaipoipo o ia. O Peresitene Hunter o se tagata musika lauiloa o lē sa iloa ta ni meafaifaili se tele. I afiafi sa tātā ai o ia i se au faili toatele, ae peitai o ituaiga o olaga o i latou sa latou fegalegaleai faatasi sa feteenai ma tulaga faatonuina o le talalelei. O lea sa faataatiaese ai e Peresitene Hunter ana meafaifaili ma na o taimi lava e pepese ai lona aiga na te aumaia ai i fafo.¹

E misia lava e Zoltán le alovaa, ae ua ia iloaina o lona fiafia i le alovaa sa malosi tele e faatautavā ai, ma atonu e manumalo ai, i lona alofa mo le Alii pe afai e latalata tele atu o ia i le taaloga.

O lena lava foi mataupu faavae e mafai ona faatatau i soo se gaoioiga lea e aveesea mai ai i tatou mai ituaiga tagata e finagalo le Atua ia avea ai i tatou. Mo i tatou taitoatasi atonu e sili atu ona uia le olaga e aunoa ma nisi o mea faapitoa—e tusa lava pe o ni mea lelei—nai lo le lamatia o lo tatou ola e faavavau ina ia maua ai na mea.

“Sa avea le Ekalesia ma o’u olaga,” o le tala lea a Zoltán. “O le iloaina o le alovaa e le mafai ona avea ma se mea e ola ai pe afai ou te manao ia malosi [i le Ekalesia] ma o le a na o se mea faapasi taimi, o lea sa faigofie ai ona ou tuua. Nai lo lena, sa ou manao ia avea le Tama Faalelagi ma o’u taulaiga.”

Sa amata ona suesue Zoltán i le talalelei ma lena lava malosi lea sa ia aumaia i soo se taumafaiga. Sa ia faatuina se sini e fai se misiona. Sa manao e nofo pea i lona atunuu e aoao atu i isi.

Sa auauna atu o ia i Hanikeri ma o loo faigaluega nei o se faiaoga o le gagana Faaperetania i se aoga maualuga. O loo faaauau pea ona ia faatutuina mea e ave i ai lana faamuamua i le talalelei. “ E i ai mea e tatau ona tatou tuua ona e faalavelave i le ala a le Atua,” o lana tala lea. “E faigofie ona faataatia ese mea leaga i le taimi lava tatou te iloa ai e tatau ona tatou tuua. E masani ona tatou le iloa le taimi e tatau ona tatou tuua ai se mea lelei mo se mea e sili atu le lelei. Tatou te manatu faapea e le o se mea leaga, e mafai ona tatou taofimau i ai ma mulimuli pea i le fuafuaga a le Atua.” Ae ua iloa e Zoltán e ao ona tatou tuua le mea lelei pe afai e taofia ai i tatou mai le mulimuli atu i le fuafuaga a le Atua mo i tatou.

Sa tuua e Zoltán Szücs, o Szeged, Hanikeri, le alovaa ina ia lava ai lona taimi mo le talalelei.