Tali atu i le Valaau mo ni Faifeautalai se Toatele: Faafaileleina o se Mafaufau Faifeautalai i le Aiga ma i le Ekalesia
E nofo ia Epikopo Nogales o le Uarota a Parque Chacabuco, Siteki a Buenos Aires Argentina Congreso, i luma o se laupapa o faaaliga ua lilo uma i ata o alii ma tamaitai talavou e 37 o lana uarota. A malaga ese se tasi o i latou mo se misiona, na te tuuina se faamatalaga i autafa o le ata.
Fai mai o ia, “E ese le fiafia o la’u autalavou pe a o mai i totonu o lo’u ofisa ma vaai i ata ma faamatalaga.” “E faaosofia ai i latou ia saunia mo a latou lava misiona.”
O le uarota lenei i Buenos Aires ua faaalia ai le agaga o le galuega faafaifeautalai. I uluai masina e ono o le 2012, e toa 19 le autalavou—o le 14 o i latou e liliu mai—ua tuua o latou aiga ina ia auauna atu faamisiona i ni atunuu se valu. E sili atu ma le 80 pasene o talavou agavaa ua tautino atu e faamisiona.
I tausaga e le’i mamao atu, sa fofoga mai ai e taitai o le Ekalesia ni talosaga e manaomia nisi tagata talavou se toatele e auauna atu faamisiona.
I le konafesi aoao ia Aperila 2005, ae le’i leva ona faalauiloa mai e le Ekalesia le Talai La’u Talalelei: O Se Taiala i le Galuega Faafaifeautalai, sa fautuaina ai e Elder M. Russell Ballard o le Korama a Aposetolo e Toasefululua ia aiga ma taitai ina ia faafailele se agaga faafaifeautalai ma saunia ni alii ma ni tamaitai se toatele atu e auauna atu ma le mamalu e ala i le fesoasoani ia i latou ia malamalama pe o ai i latou ma e ala i le aoaoina o i latou i aoaoga faavae (tagai i le “Toe Tasi,” Liahona, Me 2005, 69).
Sa fofogaina e Peresitene Thomas S. Monson i le taimi o le konafesi aoao ia Oketopa 2012 e faapea, o le a tuutuu i lalo tausaga faatapulaa, ua avea ma se tasi o faamanatu ua faanatinati e le Alii ia Lana galuega.
O le taimi nei, ua toatele aiga ma taitai o le Ekalesia ua teufatuina nei savali ma faatulagaina se aga masani anoa o auaunaga faafaifeautalai i o latou eria.
Fesoasoani i le Autalavou ia Malamalama Pe o Ai i Latou
I le tali i le fesili, “Na faapefea ona mafai ona e saunia le toatele o la outou autalavou ia naunau e auauna atu?” Sa tali Epikopo Nogales, “Ina ua valaauina au e avea ma se epikopo, o lo’u popolega muamua lava o tagata talavou o la’u uarota, ma sa ou faailoa manino atu i isi taitai o le uarota, e tatau ona avea i matou ma se vaega o o latou olaga.”
Mo se faataitaiga, o faifeautalai uma lava a Chacabuco sa i ai ni tofiga i le uarota ae latou te le’i malaga ese atu. Sa masani ona valaaulia ia tagata fou liliu mai ma tagata e le toaaga [i le lotu] e avea o ni faiaoga, lea sa fesoaoani ia i latou e saunia ai e aoao atu le talalelei.
Sa faatulagaina foi e Epikopo Nogales mo le autalavou ia saunia faaleagaga mo se misiona e ala i le galulue faatasi ma faifeautalai faamisiona i le lotoifale.
A o tuuto atu taitai o le Ekalesia ma le au paia i le lotoifale i latou lava i le autalavou o le uarota, ua tauia i latou i le vaaia o le tuputupu ae tele o le agaga faafaifeautalai.
O Se Aiga e Mafaufau-Faafaifeautalai
E iloa e Garth ma Eloise Andrus o Draper, Iuta, ISA, le uiga o le i ai o se aiga e mafaufau-faafaifeautalai. E i ai ni fanau tama e toa 17 a le la fanau ua uma ona faia ni misiona, ma o i laua foi ua faaono ona auauna atu faamisiona.
O le faafaileleina o se agaga o le galuega faafaifeautalai i totonu o lou aiga o se mea lea e amata mai lava i le taimi e laiti ai le fanau, o le tala lea a Brother Andrus.
Na ioeina foi e Sister Andrus. “E te le tuua le auauna atu i se misiona o se faamoemoega e gugu, ae e te talanoa atu i lau fanau ma fanau a lau fanau e uiga i ai e pei e le o se fesili—pe a e alu i lau misiona, ae le o le afai,” o lana tala lea.
O le aoaoina o le autalavou pe o ai i latou i le faia o se faataitaiga o le auauna atu faafaifeautalai e taua foi. Sa taliaina e Uso ma Tuafafine Andrus lo la valaauga muamua i le 1980, i le taimi tonu na alu ai lo la atalii laitiiti i lana misiona.
Sa tusi atu se tasi o atalii a le la tama ina ua ia mauaina se meaalofa sa la auina atu ia te ia e sauni ai mo lana misiona. “Sa faafetai mai o ia ia i maua [mo le meaalofa], ae na fai mai, ‘Ae e sili lava le taua o le faafetai atu ia te oulua mo le faataitaiga ua oulua faia,’” o le tala lea a Sister Andrus.
Aoao atu o le Aoaoga Faavae
“Ua i ai i o tatou tagata talavou se aia tatau e faamoemoe ai ia mautinoa e o latou matua ma taitai o le Ekalesia ma faiaoga ua latou iloa ma malamalama i le talalelei a Iesu Keriso,” o le saunoaga lea a Elder Ballard. “O le a faamautu e le Agaga Paia le upumoni i o latou loto ma o le a tutuina le Malamalama o Keriso i o latou agaga. Ma o le a e maua ai se isi tasi o faifeautalai ua saunia atoatoa” (M. Russell Ballard, “One More,” 71).
Pe a ma le 6,000 maila (9,600 km) le mamao mai i Buenos Aires, ua vaaia ai foi e le Paranesi maotua a Horseshoe Bend e lata i Boise, Idaho, ISA, se faateleina maoae i le galuega faafaifeautalai a o faia e aiga ma taitai ni taumafaiga malolosi e aoao atu ai le talalelei i o latou talavou.
Mai se paranesi toagaogao e 75 ona tagata, e toaiva tagata talavou o loo auauna atu faamisiona.
Ua faamamafaina mai e Elder Russell M. Nelson o le Korama a Aposetolo e Toasefululua ia mafuaaga ma faamanuiaga o le auauna atu faamisiona. “O faifeautalai uma … e auauna atu ma le faamoemoe e tasi ia faaleleia olaga o isi tagata,” o lana saunoaga lea. “O le faaiuga e auauna atu i se misiona o le a faafuaitino ai le taunuuga faaleagaga o le faifeautalai, o lona toalua, ma a la’ua fanau mo tupulaga a sau. O se manao e auauna atu o se fua faalenatura lea o le liua, agavaa, ma le sauniuniga a se tagata” (“Fesili i Faifeautalai! E Mafai ona Latou Fesoasoani Atu ia te Oe!” Liahona, Nov. 2012, 18).
E ioe foi i ai Martin Walker, o le peresitene o le Siteki a Emmett Idaho. “O le auauna atu i se misiona e tuu ai se tagata talavou i se ala o le a aafia ai augatupulaga,” o lana tala lea. “I le avea ai ma se siteki, matou te faia mea uma matou te mafaia e saunia ai tagata talavou mo le galuega faafaifeautalai.”
O se vaega o lena tapenaga e aofia ai le aoao atu i le autalavou o aoaoga faavae. O loo maua e le autalavou i le Paranesi a Horseshoe Bend le avanoa i vaiaso taitasi i se vasega e sauniuni ai faifeautalai e faia e se alii sa avea muamua ma peresitene o se misiona—o aoaoga e faaopoopo atu i aoaoga faafaifeautalai e tuuina atu faalemasina e le siteki mo le autalavou i fonotaga e sauniuni ai faifeautalai ma lana Tolauapiga faaletausaga a le Perisitua Arona.
O LaRene Adam—o se tasi o le fanau e toaono a Brother ma Sister Andrus—sa galulue faatasi ma lona toalua, o Simi, i le Misiona a Copenhagen Tenimaka mai le 2007 i le 2009. Sa molimau mai o ia i le taua o le aoao o fanau i le fale e uiga i le talalelei.
“O se tasi o mea e sili ona manaia e mafai ona e faia e fesoasoani ai i lau fanau e fausia se molimau i le galuega faafaifeautalai o le faia lea o a outou afiafi faaleaiga ma suesuega faaleaiga o tusitusiga paia,” o lana tala lea. “Afai e te tuu atu ia i latou lena faavae malosi o le suesue i le talalelei ma le malamalama o le talalelei, ua sili atu ona saunia lelei i latou ma iloa le tele o mea e uiga i le talalelei.
O Epikopo Victor Nogales o loo tu i le laupapa mo faaaliga o loo faaalia ai talavou uma o lana uarota, e aofia ai i latou o e o loo auauna atu i le taimi nei i ni misiona.
Ata mai le faaaloaloga a Paul L. Garvin