Mafuaaga Tatou Te Manaomia ai le Tusi a Mamona

Ata na tusia e Bryan Beach; pueina o le vitio © 2001 IRI

Atonu e fesili atu ni isi o tagata pe aisea tatou te manaomia ai le Tusi a Mamona ae o lea ua i ai le Tusi Paia. O le mea moni, ua molimau mai Iesu Keriso o le a tupu lenei mea (tagai i le 2 Nifae 29:3). E tele mafuaaga e taua ai le Tusi a Mamona i o tatou aso (mo se faataitaiga, tagai i le 2 Nifae 29:7–11). O ni nai mafuaaga nei o le pogai e taua ai.

O Se Tasi Molimau ia Iesu Keriso

Ua faaali mai e tusitusiga paia ia i tatou se mamanu o le faaaogaina o molimau e tele e faamautu ai upumoni i le Ekalesia a Keriso. O le Tusi a Mamona ua faaopoopo ai se molimau lona lua i le Tusi Paia o se molimau ia Keriso Sa saunoa Elder Mark E. Petersen (1900–84) o le Korama a Aposetolo e Toasefululua e faapea, “O le pogai autu lava ua tatou maua ai le Tusi a Mamona ona e ala mai i fofoga o molimau e toalua pe toatolu e faavaeina ai mea uma. (Tagai i le 2 Kori. 13:1.) Ua ia i tatou le Tusi Paia; ua ia i tatou foi le Tusi a Mamona. Ua i ai ni leo se lua—voluma e lua o tusitusiga paia—mai ni nuu anamua e matuai eseese, ua taufai molimau mai i le paia o le Alii o Iesu Keriso.”¹ Na faaopoopo mai Peresitene Ezra Taft Benson (1899–1994), “E le tatau ona galo ia i tatou o le Alii lava Ia na tuuina mai le Tusi a Mamona o Lana molimau autu.”²

O Le Atoatoaga o le Talalelei

Ua tatou iloa o “mea manino ma pele … na aveesea mai” le Tusi Paia i le aluga o taimi (1 Nifae 13:40). O le Tusi a Mamona o loo faamanino mai ai aoaoga faavae a Keriso ma toe aumai ai le atoatoaga o le talalelei i le lalolagi (tagai i le 1 Nifae 13:38–41). Mo se faataitaiga, o le Tusi a Mamona e fesoasoani ia i tatou e iloa ai o le papatisoga e ao ona faataunuuina i le faatofu (tagai i le 3 Nifae 11:26) ma o tamaiti laiti e le manaomia ona papatisoina (tagai i le Moronae 8:4–26).

Tutotonu i le Ekalesia Toefuataiina

Sa molimau mai Iosefa Samita e faapea, o le Tusi a Mamona “o le maa’au’au o la tatou tapuaiga.”³ Talu ai ua tatou iloa lenei mea, e le foliga mai ai o se mea faafuasei le faavaeina O Le Ekalesia a Iesu Keriso o le Au Paia i Aso e Gata Ai i le aso 6 o Aperila, 1830, i le na o le 11 o aso talu ona uluai maua le Tusi a Mamona mo le faatauina i tagata lautele i le aso 26 o Mati, 1830. Sa le’i faavaeina le Ekalesia seiiloga e maua lona maa’au’au o le tusitusiga paia mo ona tagata.

O Se Faamanuiaga i o Tatou Olaga

E faatatau i le Tusi a Mamona, sa aoao mai ai Iosefa Samita e faapea “e sili foi ona latalata atili atu ai o le tagata i le Atua i lona ola ai i ona mataupu, nai lo se isi lava tusi.”⁴ O loo i ai le mana e suia ai olaga—e aofia ai oe ma i latou e te faasoa atu i ai le Tusi a Mamona. Ua molimau mai Peresitene Henry B. Eyring, Fesoasoani Muamua i le Au Peresitene Sili, “O le aafiaga o le Tusi a Mamona i lou tagata, malosi, ma le lototele e avea ai o se molimau mo le Atua e mautinoa lava. O le aoaoga faavae ma faataitaiga totoa o loo i lena tusi o le a siitia, taitaia, ma uunaia ai oe. … O le suesue ma le agaga tatalo i le Tusi a Mamona o le a atiina ae ai le faatuatua i le Atua le Tama, i Lona Alo Pele, ma i Lana talalelei. O le a atiina ae ai lou faatuatua i perofeta a le Atua, i aso anamua ma aso nei. … E mafai ona e latalata atili atu ai i le Atua, nai lo se isi lava tusi. E mafai ona suia ai lou olaga mo le lelei sili atu.”⁵

Faamatalaga

1. Mark E. Petersen, “Evidence of Things Not Seen,” Ensign, Me 1978, 63.

2. The Teachings of Ezra Taft Benson (1988), 204.

3. Iosefa Samita, i le faatomuaga o le Tusi a Mamona.

4. Iosefa Samita, i le faatomuaga o le Tusi a Mamona.

5. Henry B. Eyring, “O Se Molimau,” Liahona, Nov. 2011, 69–70.

O Molimau e Toalua

O le Tusi Paia o se molimau e tasi ia Iesu Keriso; o le Tusi a Mamona o le isi lea. Aisea e matuai taua ai lenei molimau lona lua? Atonu o le a fesoasoani le faataitaiga vaaia lenei: E fia ni laina sasao e mafai ona e tusia e ui atu i se togi se tasi i luga o se fasipepa? O le tali e le mafaitaulia. A faapea la mo se taimi, o lena togi e tasi ua faatusa i le Tusi Paia, ma o le faitau selau o na laina sasao e tusia e ui atu i lena togi e faatusa i faauigaga eseese o le Tusi Paia, ae o na faauigaga taitasi e faatusa i ekalesia eseese.

Ae peitai, o le a se mea e tupu, pe afai e i ai se togi lona lua i luga o lena fasipepa, e faatusa i le Tusi a Mamona? E fia ni laina sasao e mafai ona e tusia i le va o nei vaega e lua: le Tusi Paia ma le Tusi a Mamona? E na o le tasi lava. E na o le tasi le faauigaga o aoaoga faavae a Keriso e mafai ona i ai ona o le molimau a nei molimau e lua.

“Ma ua faafia ona fai le Tusi a Mamona ma se molimau faamaonia, faamanino, ma autasi o aoaoga faavae na aoaoina i le Tusi Paia.”

Elder Tad R. Callister o le Au Peresitene o Fitugafulu, “O Le Tusi a Mamona—o se Tusi mai le Atua,” Liahona, Nov. 2011, 75.

Auai i le Talanoaga

I le masina atoa o Aperila o le a outou suesue ai i le Liliuese ma le Toefuataiga i au vasega o korama o le perisitua ma Tamaitai Talavou ma le Aoga Sa (pe afai ua i ai i lau uarota po o le paranesi ia lesona fou i lau gagana). O le oo mai o le Tusi a Mamona o se vaega taua lea o le Toefuataiga. A uma ona faitau le tusiga lenei, mafaufau pe ua faapefea ona ese lou olaga ona ua ia te oe le Tusi a Mamona. E mafai ona e tusia i lalo ou lagona i lau api talaaga ma mafaufau e faasoa atu i isi e ala i le molimau atu i le aiga, i le lotu, po o luga o faasalalauga faaagafesootai.

Lesona i Aso Sa

Autu o le Masina Lenei: O Le Liliuese ma le Toefuataiga