Maua e Talavou Faamisiona Fesoasoani a le Ekalesia le Olioli i le Auauna Atu
E fai e Elder Ernesto Sarabia se pine lanu uliuli a faifeautalai i aso taitasi o lana misiona. Peitai o lona tofiga faamisiona sa tulaga ese lava mai le toatele o isi—o Elder Sarabia sa auauna atu o se faifeau faamisiona mo auaunaga faale-Ekalesia (FFAE) i le ofisa o le Misiona i Mekisiko Hermosillo.
Na saunoa Elder M. Russell Ballard o le Korama a Aposetolo e Toasefululua, “Ua tatou iloa atonu o le a le o se mea atamai i nisi o o tatou alii ma tamaitai talavou ona fetaiai ma faigata ma luitau o se misiona talai.” Ae o lenei mea, na ia saunoa ai, e le faapea o le a le mafai ai ona latou auai i faamanuiaga o le auaunaga faafaifeautalai (“One More,” Liahona, Me 2005, 69).
Na saunoa Elder Russell M. Nelson o le Korama a Aposetolo e Toasefululua, “O le misiona o se faatinoga ofofua o le auaunaga i le Atua ma tagata” (“Fesili i Faifeautalai! E Mafai ona Latou Fesoasoani Atu ia te Oe!” Liahona, Nov. 2012, 18), ma e tele auala e ofoina atu ai lena auaunaga.
Mo i latou e faatagaina ma le mamalu ona lē auauna atu faamisiona talai, po o i latou o e e tatau lava ona toe taliu vave mai i le fale, o le polokalama o le FFAE e mafai ona tuuina atu ai ni aafiaga anoa faamisiona.
Tulaga Manaomia e Auauna Atu Ai
O FFAE e ao ona gafatia faaletino, faalemafaufau, faaleagaga, ma faalelagona e faatino tiute o o latou valaauga, ia e fetaui lelei ma i latou.
O tofiga FFAE e eseese mai le 6 i le 24 masina ma e mafai ona amata mai le auauna atu i ni aso se lua o le vaiaso e oo atu i le faigaluega tumau. O loo i ai foi avanoa e auauna ai i le nuu faapea foi ona auauna atu mai le fale. O tofiga e mafai ona faia i le FFAE e aofia ai suesuega o talafaasolopito o aiga, tekinolosi o faamatalaga, fesoasoani i ofisa o misiona, faleteuoloa o epikopo, ma le anoano o isi mea.
Lagolago a le Aiga ma le Perisitua
O matua, taitai perisitua, ma tagata o le Ekalesia e mafai ona fesoasoani i FFAE faamoemoeina e sauni e fai ni misiona.
O le aiga o Sister Eliza Joy Young sa avea ma se lagolago malosi mo ia, e momoliina atu ma toe aami mai mai le ofisa o le Ekalesia i Sini, Ausetalia.
Fai mai Elder Michael Hillam, o lē e faigaluega i le Faletusi a le Ekalesia i Hong Kong, “Sa fesoasoani o’u faiaoga seminare o taeao po ma taitai o Alii talavou ina ia ou saunia.”
O Le Ositaulaga e Aumai ai Faamanuiaga
Sa ositaulaga e Sister Young ona aso malolo mai lana galuega faavaitaimi e faamisiona ai mo auaunaga faale-Ekalesia. Fai mai o ia, “ou te lagona le latalata atili i lo’u Tama Faalelagi i le iloa o loo o’u fesoasoani atu ia te Ia.”
E le gata i faamanuiaga faaleagaga, ae o le faafaifeau faamisiona mo auaunaga faale-Ekalesia e tuuina atu ai i faifeau talavou ni avanoa taua faaagafesootai ma faapolofesa. “O la’u misiona ua faaali mai ai ia te a’u e mafai ona ou galue i galuega e le manaomia ai se fesoasoani faapitoa,” o le tala lea a Sister Young. (Sa na o galuega e manaomia ai le fesoasoani sa galue muamua ai o ia.)
E ui e le o talavou matutua uma o e e fia auauna atu e mafai ona galulue, ae ua faia se taumafaiga tele ia faaaoga ai talavou matutua agavaa uma. O alii ma tamaitai talavou o e fia auauna atu i lenei auala e mafai ona talanoa i o latou epikopo po o peresitene o paranesi, o e e mafai ona sailia ia avanoa talafeagai mo i latou.
Faitau atili i ai i le news.lds.org i le sueina o le “young church-service missionaries.”