Ua Malaga Taamilo Taitai Aoao o Tamaitai Talavou ma le Aualofa i le Eria a Asia
Mo le iva aso ia Novema 2012, sa aoaoina ma musuia ai e Mary N. Cook, fesoasoani muamua i le au peresitene aoao o Tamaitai Talavou, ma Linda S. Reeves, fesoaoani lua i le au peresitene aoao o le Aualofa, ia uso talavou ma matutua i le salafa atoa o le Eria a Asia.
O le malaga sa talafeauga lava ma le fofogaina o le toe iloiloina o mataupu aoaoina a le autalavou o le, O Mai, Mulimuli Mai Ia Te A’u, lea o le a amata faaaogaina ia Ianuari 2013, e Alii Talavou, Tamaitai Talavou, ma vasega a le autalavou i le Aoga Sa. O mataupu aoaoina fou ua mamanuina e fesoasoani ai i faiaoga ia aoao atili e faapei ona sa faia e le Faaola ma atiina ae ai sootaga malolosi atu ma tagata o le vasega.
Ina ua mavae le asiasiga a Sister Cook ma Sister Reeves i le Eria a Asia, e toatele le autalavou Asia ma o latou matua na ta’ua e faapea, ua atili faaosofia i latou i le taimi nei ia mama ma toe faatulaga o latou olaga ma avea ma ni faataitaiga i o latou lava nuu.
I Hong Kong, sa folafola atu ai e Sister Reeves i le autalavou, “Afai o le a e nofo mama i lou olaga, o le a mafai ona e tu ma le mautinoa i luma o soo se tagata!”
O le musuia ai i ana upu, sa faaalia ai e Tang Kak Kei e 12 tausaga le matua ina ua uma le fonotaga, “Ua ou iloa e tatau ona ou faitau i le Tusi a Mamona i aso uma. O le aoao ia salamo ma ola amiotonu o le mea lena na aoao mai e le Mo Le Malosi o le Autalavou ia te a’u e fai, ina ia mafai ona ala atu ia te a’u le susulu o le Malamalama o Keriso ma le fiafia moni.”
I Initia, sa feiloai ai Sister Cook ma le au paia i le falelotu fou i le Itu o Chennai Initia faapea ma tagata o le Siteki fou o Hyderabad Initia ma apoapoai atu i le autalavou matutua ia saunia mo le lumanai. “Ia faaagavaa outou lava faaleaoaoga,” sa ia uunai atu ai, “i tomai e fesoasoani ia te outou e fausia ai le malo. Ia taulai atu i lou aiga ma mea e mafai ona e faia e faamanuia ai tagata o lou aiga, ma i lou saunia faaleagaga ina ia e agavaa ai mo na uunaiga faaleagaga ma o le a e iloa ai le mea e agai i ai ma le mea e fai.”
I Initonesia, sa auai ai Sister Reeves i le uluai konafesi faalesiteki a le Siteki fou o Surakarta Initonesia. “Sa matou lagonaina o latou agaga lotomaualalo ma le agalelei. Ni au paia ina a faamaoni!” na ia fai mai ai.
Ona asiasi atu lea o Sister Reeves i Meleisia, lea sa latou talanoaina faatasi ai ma se vaega o uso o le Aualofa ia faafitauli e sili ona ogaoga mo le Aualofa i le avea ai o se faalapotopotoga i Meleisia ma auala e mafai ona tuuina atu ai e le Ekalesia le taitaiga ma musumusuga.
I Taiuani, sa ta’ua ai e Sister Reeves le malosi ma le tuuto o le au paia i le lotoifale. “Ua matou fiafia lava i le iloa o o latou olaga faamaoni ma le auai pea lava pea i le malumalu. … O le au paia o ni faataitaiga lelei i a latou uo ma tuaoi,” o lana tala lea.
I Taiuani, sa feiloai ai Mary N. Cook ma Linda S. Reeves ma taitai o le eria ma taitai perisitua ma le au paia i Taiuani.
Ata na pueina e Yang Chieh-wen