O Le Agaga Paia e Faamafanafana, Musuia, ma Molimauina

O le meaalofa o le Agaga Paia o se tasi o faamanuiaga silisili e mafai ona tatou maua i lenei olaga, aua o le Agaga Paia e faamafanafana, musuia, lapataia, faamama, ma taialaina i tatou. E mafai ona ia faatumuina i tatou “i le faamoemoe ma le alofa atoatoa” (Moronae 8:26). Na te aoao mai “le moni o mea uma lava” (Moronae 10:5). Tatou te maua faaaliga ma meaalofa faaleagaga mai le Atua e ala mai i le Agaga Paia. Ae o le mea e sili ona taua, tatou te maua a tatou molimau e uiga i le Tama Faalelagi ma Iesu Keriso e ala i le Agaga Paia.

Ae e te le’i papatiso, e mafai ona e lagona le Agaga mai lea taimi i lea taimi. Ae e na o le mauaina o le meaalofa o le Agaga Paia i le uma ai o lou papatisoga e mafai ai ona e olioli i le mafutaga tumau ma le Agaga Paia, pe afai lena e te agavaa. O lenei meaalofa sa tuuina atu e se tasi o loo umia le Perisitua Mekisateko e ala i le faaee atu o lima (tagai i le Galuega 19:6; MF&F 33:15). O aso Sapati uma lava la e sosoo mai ai, e mafai ona e faafouina au feagaiga o le papatisoga pe a e tagofia le faamanatuga ma faapea ona maua ai faamanuiaga a le Alii ina ia mafai ona e “maua pea Lona Agaga” e faatasi ma oe (MF&F 20:77).

O le Agaga Paia, lea e masani ona ta’ua o le Agaga, o le sui lona tolu o le Aigaatua. Na aoao mai le Perofeta o Iosefa Samita: “Ua i le Tama se tino o aano ma ivi e mafai ona pa’i i ai e pei o le tagata; ua faapea foi le Alo, ae o le Agaga Paia e leai se tino o aano ma ivi, ae o se peresona Agaga. A na le faapea, e le mafai e le Agaga Paia ona mau i totonu o i tatou” (MF&F 130:22).

E tatau ona tatou agavaa mo Lana mafutaga “aua e le afio le Agaga o le Alii i malumalu le paia” (Helamana 4:24). Tatou te faia lena mea, faatasi ai ma isi mea, i le i ai o mafaufauga mama, ola faamaoni, ma taumafai e tausi poloaiga.

A uma ona [tatou] maua le meaalofa o le Agaga Paia, e mafai ona tatou faia le tele o mea e valaaulia ai Lana uunaiga i o tatou olaga:

Tatalo.
Suesue i tusitusiga paia.
Aai ma feinu ma le agavaa i le faamanatuga.
Tapuai i le malumalu.
Matamata i faasalalauga lelei, faaaoga gagana mama, ma ia mama mafaufauga.

E Le Tatau Ona Tatou Manatu Faatauvaa i Lenei Meaalofa

“E pei lava o isi meaalofa uma, o le meaalofa lenei e tatau ona mauaina ma taliaina ina ia fiafia ai. Ina ua tuu lima o le au perisitua i luga o lou ulu e faamauina oe o se tagata o le Ekalesia, sa e faalogo i upu, ‘Talia le Agaga Paia.’ E le faapea la o lenei mea e faapea, o le a avea e le aunoa le Agaga Paia ma au soa tumau. O loo lapatai mai i tatou e tusitusiga paia e faapea, o le Agaga o le Alii o le a ‘le faavavau ona finau ma le tagata’ (Kenese 6:3). Pe a faamauina i tatou, ua tuuina mai ia i tatou le aia tatau i le mafutaga a le Agaga Paia, peitai o se aia tatau lea e tatau ona faaauau pea ona tatou maua e ala i le usiusitai ma le agavaa.”

Elder Joseph B. Wirthlin (1917–2008) o le Korama a Aposetolo e Toasefululua, “O Le Meaalofa e Le Matalatalaina,” Liahona, Me 2003, 28.

Ata na tusia e Christina Smith, Eve Tuft, Cody Bell, ma Matthew Reier