Fesili ma Tali o le Malumalu
Aisea ua fai ai a tatou malumalu?
O malumalu o Le Ekalesia a Iesu Keriso o le Au Paia o Aso e Gata Ai, o ni nofoaga paia ia tatou te aoao ai upumoni e faavavau ma auai i sauniga paia.
E faape’ī totonu o le malumalu?
O le malumalu o se nofoaga e toafilemu, faaaloalo ma matagofie. O mea uma o loo i totonu o le malumalu e mama ma faatulagaina lelei. E oofu tagata uma i ofu papae ma e tautatala i ni leo filemu.
O a mea e tutupu i totonu o malumalu?
E mafai ona faamau ai se avā i lana tane, ma e mafai ona faamau ai tamaiti i o latou matua. O le faamauga e mafai ai e aiga ona faatasi i le faavavau. I totonu o le malumalu, e maua ai foi e alii ma tamaitai se meaalofa o faamanuiaga faaleagaga e ta’ua o le faaeega paia. E mafai foi ona latou maua le faaeega paia ma faamauina mo i latou o e ua maliliu e aunoa ma le osia o feagaiga i le malumalu.
O a isi mea e tutupu i totonu o malumalu?
E ese mai le faamauga ma le faaeega paia, e fai foi isi sauniga i totonu o le malumalu. E mafai ona papatisoina ma faamauina tagata mo i latou o e sa le mafai ona auai i le Ekalesia a o ola. A atoa lou 12 tausaga ma agavaa e ulu atu i le malumalu, e mafai ona e maua le avanoa e papatiso ma faamau ai mo i latou o e ua maliliu e aunoa ma le talalelei.
Ae faapefea pe afai e le’i o lo’u aiga i le malumalu?
E silafia ma e alofa le Tama Faalelagi ia te oe ma lou aiga. E finagalo o Ia ia maua e tagata uma faamanuiaga o sauniga o le malumalu. Ola agavaa e ulu atu i le malumalu. Faatu nei loa se sini e i ai se aso o le a e maua ai le faaeega paia ma faaipoipo i le malumalu. O le a faamanuia oe ma lou aiga e lou Tama Faalelagi.
Ata na tusia e Brad Teare