Feinu mai le Punavai

Saunia e Aaron L. West

Faatonu, Tautua o Lomiga a le Ekalesia

O Iesu Keriso o le punavai o le vai ola.

A tatou talanoa e uiga i le matagofie o malumalu, e masani ona tatou ta’ua tumutumu, faamalama, ma atavali tetele. Tatou te talanoa faaaloalo e uiga i faatanoa o le vai papatisoga, potu o faaeega paia, potu o faamauga, ma potu selesitila.

Ae a faapaia e se perofeta se malumalu i le Alii, na te faapaiaina le maota atoa, ae le na o vaega matagofie e iloa atu e tagata. I le tatalo o le faapaiaga mo le Malumalu o Kansas City Misuri, sa saunoa ai Peresitene Thomas S. Monson: “Tatou te faapaiaina le laueleele o loo tu ai lenei malumalu. Tatou te faapaiaina vaega uma o lenei fausaga matagofie, mai fusi faavae e le vaaia e oo i le faatusa mamalu o Moronae ua i le tumutumu o lona vaega aupito maualuga.¹ Ina ua fofogaina e Peresitene Iosefa Filitia Samita le tatalo o le faapaiaga o le Malumalu o Ogden Iuta, sa ia faapaiaina “ia faavae, o puipui, o fola, o taualuga, o le olo, ma vaega uma o le maota,” ma sa ia tatalo mo le puipuiga “o vaega uma e faaaoga ai masini, o fesootaiga o moli ma totoga, o le faiga e avatu ai le ea fou [i totonu o le malumalu] ma lifi, ma mea uma e faatatau i lenei maota.”²

Ou te faafetai ona e musuia e le Alii ia Ana perofeta e faapaia itu uma o malumalu uma. E ui lava o se taofi o se faitotoa po o se totoga o se moli e mautinoa lava e itiiti sona faamoemoega nai lo se fatafaitaulaga i totonu o se potu o faamauga, o na vaega iti e saofaga uma i le faamoemoega tupito, ma faaeaina o le malumalu.

O se tasi o nei vaega itiiti na fesoasoani ou te aoaoina ai se lesona tumau. Sa ou i ai i totonu o le Malumalu o Sate Leki i se tasi aso, sa ou sauni e aluese mai le potu e sui ai ina ua uma ona ou auai i se sauniga mo e ua maliliu. O lo’u iloa atu o se masini e feinu ai, sa ou iloaina ai sa ou fiainu, o lea sa ou punou ifo ai mo se inu faatopetope. Sa oo mai se savali i lo’u mafaufau:

Ua e inu i le vai lenei i totonu o le malumalu, ae pe ua e inu moni ea i le vai ola o loo maua iinei?

Sa le o se tausalaga malosi—na o se aoaiga malie lava ma se fesili na ati i lo’u loto.

O la’u tali i lena fesili o le leai. Sa ou le inu atoatoa i le vai ola o le malumalu. Ou te tautino atu, sa feosofai solo lo’u mafaufau i minute na muamua atu a o ou mauaina sauniga mo e ua maliliu. E ui ina sa ou faia se galuega lelei mo tagata sa manaomia la’u fesoasoani, ae ou te le’i faatagaina a’u lava e maua uma le fesoasoani sa ou manaomia.

O le taimi nei, o soo se taimi lava ou te alu ai i le malumalu, ou te vaavaai mo se masini e feinu ai ma ou tu ou te inu. Ou te fesili ifo ia te a’u lava, o le a le tele o la’u inu mai le punavai o le vai ola. O la’u tali: E le o lava lava. Ae ua faateteleina lo’u fiainu.