Moi man te Koburake n ran

Iroun Aaron L. West

Eteta, Tieweti ni Boreti n te Ekaretia

Iesu Kristo bon te koburake n ran ae maiu.

Ngkana ti taekina tikiraoin taian tembora, ti taekin tabon kateitei ake a waiananau n tiki ni waerake, winto,ao tamnei aika bubura. Ti taetae ma te karinerine ibukin ruu n nei ni bwabetito, ruu n entaumente, ruu ni kabaebae, ao ruu ibukin te tiretio.

Ma ngke e katabui tembora te burabeti nakon te Uea, e katabua te kateitei ni kabane, tiaki ti mwakoro ake a tikiraoi ake a noraki irouia te koraki. I nanon te tataro ni katabu ibukin te Kansas City Missouri Tembora, Beretitenti Thomas S. Monson e taku: “Ti katabua aontano ae e tei iai te tembora aei. Ti katabui mwakoron nako te kateitei ae tikiraoi aei, man aana ake aki noraki nako taubukina n tamnein Moroni ae e tamaroa are te kabanea n rietata.”¹ Beretitenti Joseph Fielding Smith ngke e taekina te tataro ni katabu i aon te Ogden Utah Tembora e katabua “aontano, taian oo, te burooa, te tiiring, te taua, ao mwakoron nako te kateitei,” ao e tataro ibukin katanakin mwakoro ake a maiu man te iti, tauran ao bwai ni katamaroa, bwai ni kamwaitoro ao ereweita, ao bwai nako ake a kaineti ma taekan te kateitei aei.”²

I kakaitau bwa te Uea e kaungai nanoia ana burabeti ni katabui mwakoron nako taian tembora. E ngae ngke intitin te mataroa ke mwin taura e bon uarereke bonganaia nakon te bao ni karea n te ruu ni kabaebae, ni mwakorokoro aika uarereke a tibwatibwa naba nakon korakoran tian te tembora, ni kakoroan bukin bwai mai karawa.

Teuana te bwai ae uarereke e a tia ni buokai n reiakina te reirei n te nanomatoa. I mena n te Salt Lake Tembora n te bong teuana, n tauraoi ni kitana te ruu n onono imwin karaoan te otenanti ibukia mate. I nora te koburake n ran, ao I ataia bwa I taka, ngaia are I bobaraki ni moi. Iai te rongorongo ae roko n au iango:

Ko nima te ran aei i nanon te tembora, ma ko bon nima raoi te ran ni kamaiu are e tauraoi ikai?

Bon tiaki te kabuakakaki ae korakora—ti te kauring ae bebete ao te titiraki ae kateke nano.

Au kaeka nakon te titiraki anne bon tiaki. I bon aki moi raoi n ana ran ni kamaiu te tembora. I kaotia bwa au iango e a tia n taraataraanako ni miniti ake mai mwaina ngke I karekei otenanti ibukia mate. E ngae ngke I a tia ni karaoa te mwakuri ae raoiroi ibukia aomata ake a kainnanoa au ibuobuoki, I tuai karekea nakoiu ni kabane te ibuobuoki ake I kainnnanoi.

Ngkai, ni katoa te tai are I nako iai nakon te tembora, I taraataraanako ni kakaea te koburake n ran ao n tei ni moi iai. I titirakinai bwa nanora ae I kona iai ni moi man te koburake n ran ae maiu. Au kaeka, E bon tuai n rangi n nano. Ma e a korakora riki takau.