Ataakin te Bwabetito

Iroun Marissa Widdison

Ana Maekatiin te Ekaretia

Antai ae e na bwabetitoai?

Antai are e bwabetitoiko e na riai n iai irouna te nakoanibonga—te mwaaka ni mwakuri n aran te Atua. Ngke e tangiria Iesu bwa e na bwabetitoaki, e nakon Ioane te Tia Bwabetito, are iai irouna te nakoanibonga (taraa Mataio 3:13).

Te aomata are e bwabetitoko e na karekea te kariaia mairoun am bitiobi ke te beretitenti n te mwaanga.

E riai bwa N na nako aan te ran bwa N na bwabetitoaki?

Iesu e bwabetitoaki n te kateboaki, are nanona bwa E mena rabwatana ni kabane iaan te ran ao ni waekoa ni manga otirake (taraa Mataio 3:16). Aio arom ngkana kona bwabetitoaki. Bwabetitoakira n aron aei e kauringiira bwa ti a katikui maiuira ni kawai ao ni moana te maiu ae boou ni kabanea ara tai ni beku ibukin te Atua ao Natina.

Tera berita aika I karaoi ngkana I bwabetitoaki?

Ngkana ko bwabetitoaki, ko karaoa te berita ae tabu, ke berita aika uoua kawaia, ma te Tama are i Karawa. Ko berita Nakoina bwa ko na karaoi bwaai tabeua, ao E berita bwa e na kakabwaiako. Te berita ae tabu aei e kabwarabwaraaki n te tataro n toa ake a tataekinaki ni katoa Tabati (taraa D&C 20:77–79). Ko berita:

Bwa ko na uringa Iesu Kristo.
Ni kawakin Ana tua.
Ni katoka iaom aran Kristo, are nanona bwa ko na iangoa Ana mwakuri bwa te bwai ae moan te kakawaki inanon maium ao ni karaoa te bwai ae E tangiria n onea mwiin te bwai are e tangiria te aonaaba.

Ngkana ko kawakina te berita aei, e berita te Tama are i Karawa bwa te Tamnei ae Raoiroi e na memena ma ngkoe ao am bure ana kabwaraaki.

Tera te Tamnei ae Raoiroi?

Ana bwaintangira te Tamnei ae Raoiroi bon teuana mai ibuakon ana bwaintangira te Tama are i Karawa ae moan te kakawaki. Am bwabetito n te ran e aki tia raoi ni karokoa ae anganiko te kakabwaia ni karekea te Tamnei ae Raoiroi mwaane ake iai irouia te Nakoanibonga ae te Merekitereka (taraa Ioane 3:5).

Te Tamnei ae Raoiroi bon te kateniman n Utu n Atua. E kakoaua te Tama are i Karawa ao Iesu Kristo ao a buokiira n ata te bwai ae koaua. E buokiira bwa ti na korakora n te tamnei. E kauringiira n te kabuanibwai. E buokiira n reireinira E buokiira te Tamnei ae Raoiroi n namakina ana tangira te Atua.

Ngkana ko a kamatoaaki bwa te membwa n te Ekaretia, te Tamnei ae Raoiroi e kona ni mena iroum n tainako ngkana ko rinea te eeti.

Bukin tera bwa e na riai ni koro wanua au ririki bwa n na bwabetitoaki?

E reirei te Uea bwa aki riai ataei ni bwabetitoaki ni karokoa ae a ikawai raoi n ata te kaokoro imarenan te bwai ae eti ao te bwai ae bure, are e taekinaki ni booki aika tabu bwa bon wanua te ririki (taraa Moronai 8:11–12; D&C 29:46–47; 68:27).