Tebwina Kawai n Ataia bwa Ko a Rairaki

Iroun Tyler Orton

Tyler Orton e maeka i Java, Indonesia.

I reiakinna ni bowin te nakoanibonga bwa teuana mai buakon ana kantaninga te Nakoanibonga ae te Aaron bwa e na buokira “n rairaki nakon ana euangkerio Iesu Kristo ao ni maiuakin ana reirei.”¹ I aki koaua raoi bwa tera ae nanonaki n “rairaki raoi nakon ana euangkerio Iesu Kristo.” I titirakinikia au karo ao tariu ao mwaneu ake a ikawai bwa tera nanona irouia, ao ti ikotaki ni maroroakin tabeua kawai ake ko kona n ataia ngkana koa rairaki raoi.

Tao ana iai riki tabeua, ma aikai 10 kawai ake ti iangoi. Ngkai te rairaki bon te bwai ae teimaan, i nanon te maiu, ti aki nanona bwa ti na kororaoi ni katoai nako aro aikai n te tai aei, ma a kona ni buokira n ataia ngkana e reke iroura te rikirake.

Ngkana ko a rairaki, ko aki tii ata te bwai ae ko riai ni karaoi ma ko tangiria ni karaoa te bwai ae eti. E aki tau ti totokoan karaoan ae bure ibukina bwa ko ataia bwa ko na reke ke kona katuaeaki. Ngkana ko rairaki raoi, ko na tangiria n rinea te eti.
Te kanikina n atakin te rairaki bwa ai bon akea nanom ni kan karaoa ae bure. Antaai Nibwaai Riaai bon te banna ae korakora n aei. Ngke a rairaki nakon ana euangkerio Kristo, “a tia naba ni karaoa te berita ae tabu ma te Atua bwa a na toro irouna ma ni kawakin ana tua” (Motiaea 21:31). N ai aroia Nibwaite n reireiaki iroun te Uea are Beniamina, n te aro are akea te nano ni kan karaoa ae buakaka” (Motiaea 5:2). A rairaki ni koaua nakon ana euangkerio Kristo, ao ana kariri Tatan ai akea korakorana i aoia.

Ni kaotia bwa a bon koaua nakon aia berita aika tabu ni maiuakina te euangkerio, Remwanaite ake a rairaki a tauni aia bwai ni buaka (taraa Aramwa 24).
Ngkana ko a rairaki, ko a tabeaianga riki n ana kantaninga te Atua nakon are a iangoia tabeman ibukim. N au reirei i Indonesia, ataein te reirei a bwabwaina te moi manging. N tabetai e bon kona ni kariri te nako ni kukurei ibuakoia ngkai a bane ni karaoia ao a kukurei iai ao ni bwainingareiko ngkana ko aki nako. Tariu e kaoaki bwa e na moi manging ao n iri bukamaru aika aki tau n angin te tai, ma e bon aki iri—e kamanoa ao e maiuakina are e kaineti ma are e kakoaua. E bon kangaanga, e tiku ni mwenganana n ti ngaia n angin te tai. Ngke a kabo nakoina ataein te reirei n ana tai n angabeebwa, tabeman aomata a tibwa nanoia ni mimi irouna ngkai e kona ni katinanikua te kariri nimwairiri ma ana roro ao ni kakaonimaki nakon ana kainibaire. A tuangnga bwa a mataiakinna ibukin arona anne. E kaotia bwa e rairaki man totokoan te mwairiri n te maiu ni kairake.
Ngkana ko rairaki, ko kata am kabanea n tamaroa ni maiuakina te euangkerio n tainako—tiaki ti ni katoa Tabati ngke ngkana e angaraoi ma n tainako. Am mwakuri aki bitaki ni kaotiko bwa antai raom ke antai ae taraataraaiko. Ngkana a manikangare buaka raom ni kairake ke ni kan matakuakin tamnei aika aki raoiroi, ko aki iria tiaki ibukina bwa iai ae taraataraaiko; ma ko kamanoa ao ko maiu ni kaineti ma are ko kakoaua.
Ngkana ko a rairaki, ko a nanoanga riki ao ni mwamwannano ni kan reitaki ma tabeman. Ko aki motikitaeka ke ni kabuakaka ke ni wiinnanti. Ko tabe ma aia namakin tabeman, ao e na riki bwa anuam kakaeakin kawai ake ko na kona ni beku ao n ibuobuoki iai. Ngkana ko rianna ni kawain am reirei ao temanna e bwaka ana boki, ko aki riai n n iangoa te bwai ae ko na karaoia. Ko a bon karina naba n tei n ibuobuoki n te tai naba anne.
Ngkana ko a rairaki, nanom ni kan tataro e rikirake ao ko namakinna bwa ko kan reitaki ma te Atua ngkana ko tataro. Ko na karekea am tai n tataro n tainako n aki tabe ma aron am namakin ke tera are e riki i nanon maium. Beretitenti Ezra Taft Benson (1899–1994) e tuangira, “Ngkana ti aki namakinna bwa ti na tataro, ngkanne ti riai n tataro ni karokoa ti namakinna ni kan tataro.”²
Ngkana ko a rairaki, ko kakataninga te Tabati ibukina bwa bon te Tabati. Ngkana e a roko te Tabati, n oneanmwin ae ko iangoia, “O mwane! bon te bong are I aki kona n raraun ma raraou ke nakon taian tamnei,” ko taku inanom, “E tamaroa, te bong are I kona iai n ira te taromauri ao ni iangoi bwain te maiu n tamnei ao ni kabanea au tai ma au utu!”
Ngkana ko rairaki, ko kawakin tua ao ko aki manga karekei am anga, kataunara te aroaro, ke ni kataia ni kakaei taian kabwaka. Ko na aki imanono n riaon te tia nte bwai ae eti; ko na ti kawakin taian tua ibukina bwa ko bon ataia bwa te kawai ae tamaroa.
Ngkana ko rairaki, ko kakantaninga kabwakan am kabwianibwai. Ko taraaia bwa te kakabwaia ao n namakinna bwa te 10 te betienti e aki nang mwaiti ni kabotauaki ma taian kakabwaia ao te kakukurei are ko a tia ni karekei. Taian kakabwaia aikai a kakaawaki riki nakon te mwane are ko a tia ni kabwaka.
Ngkana koa rairaki, e korakorananom ni kan buokia tabeman n ata te koaua ao te kukurei are ko a tia ni kunea. Te katoto man koroboki aika a tabu bon min Riaai, are e korakora nanona ni kan tibwa kangkangin uan te kai ni kamaiu ma ana utu. Ngke e ana te uanikai, ana moan iango e aki kan karawatai riki ibukina ma e taraaia ana utu bwa a na karekea kanaia man te uanikai ao ni karekea te kukurei are e reke naba irouna (taraa 1 Nibwaai 8:12).

N tokina, ko ataia ae ko a tia n rairaki bwa ko a moana maiunakin tua aika rietata, ana euangkerio Iesu Kristo. Ko a maiuakina te ongotaeka n ana kamaiu te tamnei, ma bukina ae riai ke te nano ae eti. Ko a maiuakina te euangkerio i nanon wakin nako maium. Ko a maiuakina bwaninin te euangkerio, ti aki ibukina bwa ko na karaoia ma ibukina bwa ko bon tangiria. Ko a riki bwa te aomata ngkoe ae kukurei man tamaroa, ao ko a tangiria ni kan riki bwa te aomata are e tangiria te Tama are i Karawa. Ko tangiria ni kan riki bwa ai aron Iesu Kristo ao n iriri nako Ana katoto. Ngkana ko a riki bwa te aomata ngkoe anne, ao ngkanne ko a bon rairaki raoi.

Mai eta: kamatata n te tamnei © IRI; coins © isStockphoto.com/Thinkstock; MIIN RIAAI MA TE KAI NI KAMAIU, IROUN Robin Luch © IRI