Rongorongo man te Moan Beretitentii
E A Tia N Uti
Te kakoaua ibukin koauan Mangautin Iesu Kristo bon ngaia te tabo are e reke iai te kantaninga ao te nano ae teimatoa. Ao e reke iai te kantaninga ao te nano ae teimatoa ibukiia natin te Atua ni kabane. Mangautin Iesu Kristo ngaia bon te tabo are e reke iai te kantaninga ao te nano ae teimatoa nakoiu n tain te tiamwa n Tuun 1969 ngke e mate tinau, e riki aei man te tai are e mate iai, ao e na teimatoa ni karokoa ae I a manga noria.
Te nanokawaki n te maenako ae kimototo e oneaki mwiina n te kukurei. E raka riki nakon te kantaninga ibukin te reitaki ae kakukurei. Bukina bwa E a tia te Uea ni kaoki bwaai aika bati rinanon Ana burabeti, ao bukina bwa e a tia te Tamnei ae Raoiroi ni kamatoa koauan te Mangauti nakoiu, I kona ni katamneia n au iango bwa e na kanga aron te manga katiteuanaki ma raora aika tangiraki aika a tia ni kaitiakaki ao ni mangauti:
“Aikai ngaia aika a na kautaki n tain mangautia aika raraoi. …
Aikai ngaia ake a koreaki araia i karawa, ike te Atua ao Kristo bon ngaia taan motikitaekaia ni kabane.
Aikai ngaia mwaane aika kakororaoaki rinanon Iesu te tia raoi n te berita ae tabu ae boou, are e kaota nako te mwakuri ni kamaiu ae kororaoi aei rinanon wawanakon raraana (taraa D&C 76:65, 68–69).
Ibukina bwa e tokanikai iaon te mate Iesu Kristo, ao ni kabane natin te Tama are i Karawa ake a bungiaki nakon te aonaaba a na manga kautaki n te rabwata are e na aki manga mate. Ngaia are au kakoaua ao ngkoe n te koaua ae mimitong anne e kona ni kanakoa te nanokawaki ni maten kaain te utu ke raoraora ae moan te tangiraki ao n onea mwina n te kantaninga ae ka kukurei ao te nanomatoa ae matoatoa.
E a tia te Uea n anganiira ni kabane ana bwaintituaraoi te mangauti, ike a katukaki iai tamneira inanon rabwata ake akea bureia (taraa Aramwa 11:42–44). E na kaoti tinau n ataei ao ni kukurei, kangaanga n te roro ao ririki n rawawata n rabwata a kamaunaaki. Anne e na roko nakon neienne ao nakoira bwa bwaintituaraoi.
Ma ngaira ake ti tangiria bwa ti na tiku ma ngaia n aki toki ti riai ni karaoi rinerine ake ti na kona iai n tau ibukin te reitaki anne, n te tabo are a uaia ni maeka iai te Tama ma Natina ae Tangiraki ae tia ni manga kautaki n te mimitong. Ti anne te tabo are e kona iai te maiu n utu n reitinako n aki toki. E a tia te kakoaua n te koaua anne ni karikirakea nanou ae matoatoa bwa N na tau ma naake I tangiria nakon te kabanea n rietata ni mimitong n te abanuea ae te tiretio rinanon ana Mwakuri ni Kamaiu Iesu Kristo ni mwakuri inanon maiura (taraa D&C 76:70).
E anganiira te Uea te kairi n te mwakuri aei ibukin te maiu are akea tokina n te tataro n toa are e buokai ao e kona ni buokiko. Ti kaoaki bwa ti na kaboui ara berita n te bwabetito ni katoai bootaki n toa ni kabane.
Ti berita bwa ti na ururinga te Tia Kamaiu n tainako. Te kanikina ibukin Ana karea e buokira ni kakaitaua aron te maraki are e rootaki iai n tokanikai iaon te mate, n anganira te nanoanga, ao ni karekea kabwaran ara bure ni kabane ngkana ti rineia bwa ti na rairananora.
Ti berita bwa ti na kawakin Ana tua. Warekan booki aika tabu ao aia taeka burabeti aika maiu ao ni kakauongo nakoia taan taetae aika kairaki ma ieta n ara bootaki n toa e kauringira nakon berita aika tabu aika ti riai ni karaoi. Te Tamnei ae Raoiroi e uoti nakon ara iango ao nanora tua aika ti rangi ni kainnanoi bwa ti na kawakin n te bong anne.
N te tataro n toa, ao e berita te Atua bwa e na kanakoa te Tamnei ae Raoiroi bwa e na memena iroura (taraa Moronai 4:3; 5:2; D&C 20:77, 79). I kunea n te tai anne bwa e anganai te Atua te bwai ae I namakinna ae kanga titebo ma te intawiu ibukiu. E kaira au kantaninga te bwai ae I a tia ni karaoia ae na Kakukureia, kainnanoan te rairannano ao te kakabwarabure irou, ao araia ao moamoaia aomata aika E tangiria bwa N na buokiia n tei Ibukina.
Inanon ririki aika bwakanako, te namakin ane e okioki anne e a tia ni bita te kantaninga nakon namakinan te tangira ae kororaoi ao ni uota te aki nano kokoraki bwa te nanoanga e katauraoaki ibukiu man Ana Mwakuri ni Kamaiu te Tia Kamaiu ao Kaokan bwai.
I kakoaua bwa Iesu Kristo bon te Kristo ae uti, ara Tia Kamaiu, ao ara banna ni katoto ao ara tia kairi ae kororaoi nakon te maiu are akea tokina.
Reirei man te Rongorongo Aei
Ti riai “ni kabotaui kanoan koroboki aika tabu nakon maiura, bwa ti aonga n raka man reireinaki iai.” (1 Nibwaai 19:23). Iangoia ni wareka te tataro n toa, ae kuneaki n Doctrine ao Covenants 20:76–79. Imwiin warekan ana reirei Beretitenti Eyring ibukin te tataro n toa, ko kona ni kaoia naake ko reireiniia n iangoi kawai ake a kona tataro aikai ni kairiia ni maiuia ao ni buokiia n oki ni maeka ma te Tama are i Karawa ao Iesu Kristo.
Tamnei iroun Matthew Reier; He Is Risen, iroun Del Parson, aki kona ni kaobinaki