Kona kanga ni Beku ni Weteam i nanon te Nakoa ae te Nakoanibonga

Iroun Beretitenti Thomas S. Monson

Man te maroro n te maungatabu ni kabuta n Eberi 1987.

Ko a tia n iangoa raoi kakaawakin tamnein te aomata? Ko a tia ni miiakinna ibukin konabwai are a mena i nanora n tatabemaniira?

I kaea n te taina te maungatabu n te titeiki ike au beretitenti n te titeiki mai mwaaina ae Paul C. Child e taraa Doctrine ao Covenants 18 ao ni moanna ni wareka are e taekinna te Uea bwa tamnei a rangin ni kakawaki i matana (taraa mwakoro 10).

Beretitenti Child ngkanne e titiraki, “Terana kakaawakin tamnein te aomata?” E aki wetea te bitiobi, titeiki beretitenti, ke kauntira aika rietata ibukin te kaeka. N oneanmwina, e rinea te beretitenti n aia kooram unimwaane.

Te aomata ae kubanako aio e tiku n aki kakarongoa n taraakina ae e rangi ni maan ao i mwiina e katanoata, “Kakaawakin tamnein te aomata bon ana konabwai n riki n aron te Atua.”

Ni kabane ake a roko a iangoa raoi te kaeka anne. Beretitenti Child e waaki nako ma ana rongorongo, ma I reitinako ni kaoka au taraataraa i aon te kaeka ae kairaki anne.

Ni buokia, n anga reirei, n ring nanoia taian tamnei aika kakaawaki are Tamara e a tia ni katauraoia ibukin Ana rongorongo bon te mwakuri ae bubura. Te tokanikai e karako ae e bebete. N angiin te tai e moanaki man te tang, te kakatai, te onimakinaki, ao te kakoaua.

Ana toro te Atua a taua te karaunano man ana koaua te Mwatita: “I memena naba i roumi ni boong ni kabane” (Mataio 28:20). Te berita ae rangi ni tamaroa aio e taui ngkami taari n te Nakoanibonga ae te Aaron ake a weteaki nakon nakoa ni kairiiri n te kooram n riikan, taan reirei, ao ibonga. E kaungako n am katauraoi ni mwakuri n te tabo ae wakina te mwakuri ni mitinare. E karaua nanom i nanon taai ake e a bwarananom iai, ao e roko nakoira nikabane.

“Ai ngaia are, tai kua i nanon karaoan ae tamaroa,” e taku te Uea, “ibukina bwa kam a kawenea aan te mwakuri ae kakannato. Ao man bwaai aika uarereke a riki aika korakora.

Taraaia, te Uea e tangira nano ao te iango ae tauraoi” (D&C 64:33–34). Te onimaki ae tiku, te onimakinaki ae teimatoa, ao te tangira mai nanomi are n taainako e kaotaki irouia ake a beku ibukin te Uea ma nanoia ni kabane.

Ngkana iai te tari are e kona n ongo bwanaau n namakina te aki tauraoi, ao n aki kona ni kaeka te wewete nakon te mwakuri, n angakarea, ni kakabwaiaia maiuia tabeman, uringa te koaua: “Are e weteia te Atua, e tau iroun te Atua.”