Anga reirei Ibukin Kakorakoraia Kairake,
Kakawakiia Raoraom aika Tamaroa
E korakora aia kairoro raao ni bwaai aika ti karaoi, riki n ara roronrikirake. “A ana nanom bwa ko na kanga n iango ao ni karaoia, ao riki ni buokia n iangoia bwa te aeka n aomata ra ae ko na katotonga.”1 Ao ngkana ko rineia raoraom aika tamaroa, “a na riki bwa korakora aika tamaroa ao kakabwaia nakoim. … A na buokiko n riki bwa te aomata ae nakoraoi riki ao n rangin ni kabebetea nakoim maiuakinan ana euangkerio Iesu Kristo.”2
Iaon iteraniba 52–53 n te beba aei, Elaine S. Dalton, te beretitenti ni kabuta n aia Bootaki Aine, e reirei kakawakin ukoukoran ao te riki bwa te rao ae tamaroa. “N taraakin ana warebea temanna moa bon oin raoi te waaki n iraorao ae koaua,” e taku.
Karikirakean te iraoraoi iaon reirei aikai e na buokia roronrikirake ni katea te reitaki ae teimatoa ao te konabwai ni bootaki are e raka riki bonganana nakon ae ti te riki bwa “raao” n te aro n reitaki iaon te tiaite. Ngkai te karo ngkoe ko kona ni buokia am ataei n ata aron kakaawakin te riki n rao ae tamaroa are e na kaungaia bwa a na maiuakin ana reirei te euangkerio. Iango aika oti imwiina a kona n ibuobuoki.
Iango ibukin Reiakinan te Kairake
-
N te utu, ukoukori booki aika tabu ibukin katoto irouia raao aika tamaroa. Maroroakin bwaai aika raraoi aika e karika te iraorao anne ni matoatoa. Iangoa Tawita ao Ionatan (taraa 1 Tamuera 18–23), Ruta ao Naomi (taraa Ruta 1–2), ao Aramwa ao natin Motiaea (taraa Motiaea 27–28; Aramwa 17–20).3
-
Rinanoa te tiekition iaoia raao inanon Ibukin Kakorakoraia Kairake. Tibwauaia ma te roro aika imarenan 13 ao 19 bwa e na kanga te iraorao ni kanakoraoa maium. Kaoia bwa a na tibwauaia bwa a kanga n tia n ana nanon ao n anaki nanona irouia raoraoia.
-
Wareka ana koroboki Titita Dalton n te beeba ni kaongora aei. Taekina taekan ana kouru natina te aine, Emi, e baireia bwa e na ukoukoria raoraona aika tamaroa. Buokia am ataei ni katei kouru ibukin te rao ae a riai ni ukoukoria ao n riki bwa ngaia.
-
Iangoa karaoan bootakin te utu n te tairiki n tibwauai iango ibukin katean aro n iraorao, n aron: “Ni karekeia raoraom aika tamaroa, ko na riki bwa te rao ngkoe ae tamaroa. Kaota te nano ae koaua irouia tabeman; maongare ao kaotia nakoia bwa ko tabe ibukiia. Tabeakiniia aomata ni kabane ma te tangira ao te karinerine, ao tai motikitaeka ao ni kabuakakaia naake irarikim.”4
Iango ibukin Reiakinaia Ataei
-
Te riki n rao e raonaki ma buokaia tabeman. Wareka “Standing Up for Caleb” inanon Maati 2009 Riaona ao taetae ma am ataei ibukin kawai aika a kona iai n tangira nakoia aomata ni kabane ake a kaitibo ma ngaia.
-
Inanon aaro ni kabane, ti na iangoia bwa te aeka n rao ra ae ti na katotonga. Bootaki n anenea “N Na Kataia ni Katotonga Iesu”5 ao ngkanne taetae ma am ataei iaon ae ana kanga ni kona n rineia bwa raao aika tamaroa, n aron te Tia Kamaiu, n anga aika kakaokoro.
Kamataata iroun Taia Morley