Kaoakiu nakon te Kamaiuaki

Iroun Emerson José da Silva

Kamatata iroun Roger Motzkus

Ngke I kairake n ataeinimwane, I kawari aro aika a mwaiti ao I minotaki ibukina bwa a kakaokoro aia kabwarabwara n nanon koroboki aika a tabu. I bon aki nanoraoi n te aki karinerine are I kunea irouia tabeman mai rouia, ngaia are I kabwara nanou ni kataia ni kakaea te ekaretia are N na iria.

Tabeua te ririki imwina raraou ae, Cleiton Lima, e bwabetitoaki i nanon ana Ekaretia Iesu Kristo ibukiia Aika a Itiaki ni Boong Aika Kaitira. E aki taekina aei nakoiu e ngae ngke bon rao ngaira ni koaua, ma ngke e a maan, I a nori bitaki irouna. Ni katoa Tabati I nanakon ana auti n te moaningabong bwa ti na butiboro, ma bon akekea ngaia ni mwengana. Aio e riki uoua ke teniua te Tabati ae e ireiti. N tokina Cleiton e tuangai bwa e aki kona ni butiboro n te Tabati ibukina bwa e karinea ana bong te Uea I tuangnga, “Te ekaretia aei e kaburababako.”

I mwina Cleiton e kaoai bwa N na ira te taromauri. I karautaeka nakoina ibukina bwa I bon tuai ni butimwaea te aro. I nanon 10 te namwakaina, Cleiton e kairia mitinare nakou bwa a na reireinai, ma n tainako I kakarekea angau ni karautaeka ke I tuangia bwa I bon rangi n tabetabe. Ma e bon aki bwara nanona.

N te bong teuana i nanon Tuun, e kaoai bwa N na ira te taenti n te Aro. I bwainingareia. “Iai te amwarake ae aki kaboaki ao a mwaiti ataeinnaine?” Ngarengare, e kaeka eng!

I kakoaua ae I konaki n arou ni kan amwamwarake. I nakon te taromauri ao I tangiria. I butimwaeaki irouia aomata ni kabane, I buabeka n amwarake, ao e ri nanou n tangiria n iri botaki. Ngke I roko n te taromauri n te Tabati, I kaitibo ma aomata aika a mwaiti ao n ongora aia kakoaua. I aki rang n taneiai ma ana Boki Moomon, ma I namakina Tamnein te Uea ngkana kain te Ekaretia a kakoaua, “I ataia bwa ana Boki Moomon e bon koaua, ao aio ana Ekaretia Iesu Kristo, ao Iotebwa Timiti bon te burabeti are e weteaki iroun te Atua.” I tuai man namakina te kukurei mai mwaina. I bon tuai naba ni kan kaitibo ma mitinare, ma te botaki ni kaoti kakoaua arei e ringai n te iango ao n te maiu n tamnei.

Te wiki are i mwiina, e a manga kaoai naba Cleiton n nako n taromauri. I aki kona ibukina bwa iai te bwai ae I katabeaki iai n ingabongin te Tabati anne. I noria man taraakin moamoana bwa e nanokawaki ngke I tuangnga bwa I aki ataia ngkana I kona n nako.

E ngae n anne, ni moaningabongin te Tabati I teirake ma te nano ni kan nako n taromauri. I uti ngke 6:50, are e bon kangaanga irou, ao I katauraoai ao I tataninga rokon Cleiton. E bon tounako ngke e norai ma oneau n tataninga. N te Tabati anne te bitiobi e reireinai taekan te nakoanibonga. E korakora namakinan te Tamnei ao iai nanou ni kan reireinaki irouia mitinare. N tokin te reirei n aia bowi Kairake n Ataeinimwane, I ataia bwa N nang bon bwabetitoaki.

Ngke e bwara te taromauri, I tuanga Cleiton, “I kan bwabetitoaki!”

E taku bwa I manikangare. Ma i mwina ao e taku, “Ngkana I tareboon ni weteia mitinare, ko kona ni maroro ma ngaia?” I kaeka eng.

I reireinaki irouia mitinare aika a rianako rabakauia. Ngke I ongo rongorongon Kaokan te Ekaretia, I karekea riki te kamatoa ae korakora bwa I riai ni bwabetitoaki. Ma I kan ataia i bon irou koauan ana Boki Moomon. Mitinare a mwakena Moronai 10:3–5 n au boki ae ana Boki Moomon ao a kaoai bwa N na tataro ao ni butiate Atua ngkana e koaua.

Te tairiki are i mwina I uringnga bwa I tuai ni wareka ana Boki Moomon. Ngke I waaki ni wareware, I namakina te tamnei ae korakora. I tataro, ao imwain ae I bane, I ataia bwa ana Boki Moomon e bon koaua. I kakaitau ibukin kaekaan au tataro. I bwabetitoaki n Turai 2006.Imwiina

I beku bwa te mitinare i Brazil Cuiabá Mition, ao raoraou ae Cleiton e beku n te Brazil Santa Maria Mition. Ti karaoa are e karaoia Cleiton nakoiu: ni kaoia aomata nakon Kristo ao ni buokia ni karekea te euangkerio are e kaokaki rinanon kamwakuran aia onimaki iroun Iesu Kristo, rairannano, ni bwabetitoaki, ao ni karekea ana bwaintangira te Tamnei ae Raoiroi. Aio bon te kawai ae koaua nakon te kamaiuaki.

Ti na kaoia n tainako raraora ao ara koraki bwa a na reiakina te euangkerio aio, bwa te Tia Kamaiu e kaoia aomata nako ngke E kangai, “Bane mai nako Iu” (Mataio 11:28). I ataia bwa aio ana Ekaretia Iesu Kristo ao ngkai bon te tai ni kaoia ni kabane n roko nako Ina.