Fesoasoani i Tamaiti e Saunia mo le Papatisoga
O le olaga faatamaitiiti o se vaitau o uluai fiafiaga O le taimi muamua o le tietie i se uila, alu i le aoga, po o le faataitaia o se meaai fou o ni nai mea mananaia ia e fiailoa e faapea ona mamanu ai le olaga o se tamaitiiti. I le avea ai ma ni tagata matutua tatou te maua le avanoa e fesoasoani ai i tamaiti i lena ala o le iloaina o mea. I le avea ai o ni tagata matutua i le Ekalesia, ua ia i tatou foi le avanoa e fesoasoani ai ia latou tutupu ae i le talalelei (tagai i le MF&F 68:25). O le a se mea e mafai ona tatou faia ia mautinoa ai o le papatisoga o se tamaitiiti—o le uluai feagaiga e faia e se tagata faatasi ma lo tatou Tama Faalelagi alofa—o se mea matagofie ma anoa?
Na aoao mai Peresitene Boyd K. Packer, “o le faavae autu o le Ekalesia lenei o le aoao lea o le autalavou: e muamua i totonu o le aiga ona sosoo ai lea ma totonu o le ekalesia.”1
I faataitaiga o loo i lalo, o loo faasoa mai ai e matua auala sa latou saunia ai a latou fanau mo sauniga ma feagaiga paia o le papatisoga ma le faamauga.
Tatou te Vave Amata
“O le tausaga e atoa i ai le taifitu tausaga o tamaiti taitoatasi o se taimi lea e fiafia ai,” o le tala lea a Lori, o se tina a se fanau e toafa. La te aoaoina ma lona toalua le la fanau e uiga i le papatisoga mai lava i le aso e fananau mai ai. Ae peitai, a atoa loa le fitu o tausaga o le tamaitiiti, ona amata loa lea e lo latou aiga ona faia ni sauniuniga e sili atu ona patino. Latou te faia se lesona o le afiafi faaleaiga i masina taitasi e uiga i autu eseese e faatatau i le papatisoga, e pei o feagaiga ma faataitaiga a Iesu.
Fai mai Lori, o lesona i le masina o le aso fanau e atoa i ai le valu tausaga o le tamaitiiti e sili atu ona pele. Na te faaali atu i tamaiti ia ofu sa latou ofuina ina ua latou maua se igoa ma se faamanuiaga, ma e talanoa o ia e uiga i le aso sa faataunuuina ai lena sauniga.
“O le taimi lelei lava lea e taulai atu ai i faamanuiaga o feagaiga o le malumalu,” o le tala mai lea a Lori. “Matou te faia i taimi uma se faamamafaga o le aoao atu e faapea, o le filifiliga ina ia papatisoina o le sitepu muamua lea o le saunia ai mo faamanuiaga o le malumalu.”
Matou te Faia o se Mataupu a le Aiga
O Monika, o se tina o se fanau e toafa, ua ia fautuaina mai le faaaofia ai o tamaiti matutua atu e fesoasoani i nai o latou tei laiti e saunia i soo se taimi e mafai ai. “O le faalogo atu o molimau ma faasoa mai e lo latou tuagane po o le uso matua ia ona aafiaga e matuai faaopoopo ai le malosi,” o lana tala lea. Fai mai Lori o nisi taimi la te fai atu ai i tamaiti ua sauni e papatiso e aoao atu mea ua latou iloaina i nai o latou tei laiti ifo.
Matou te Faaaogaina o se Meafaigaluega Faafaifeautalai
Ina ua atoa le valu tausaga o le afafine o Tanielu, sa ia iloaina o le a manao o ia e ta’u atu le aso o lona papatisoga i ana uo o e e le auai i le Ekalesia. O lea sa tonu ai i lo latou aiga e tuuina atu le valaaulia mo le papatisoga o Allison i uo mai le aoga ma le pitonuu. Sa talosagaina ia nei uo e aumai ni fuaitau e sili ona fiafia i ai mai le Tusi Paia i le papatisoga. Ina ua uma le papatisoga, sa faailoga e Allison ia fuaitau i lana seti fou o tusitusiga paia ma tusi ai igoa o ana uo i autafa o le mau.
“Ioe, i le avea ai ma lona aiga, sa matou aofia uma ai lava i lena aso. Ae sa matou tuu atu foi ia te ia ia faatasi ma ana uo mo sina taimi mulimuli ane ma talanoa atu ia i latou i ona lagona sa i ai,” o le tala lea a Tanielu. “Sa o se taimi sa sili ona pele le vaaia o le ma tama o faia se faataitaiga.”
Sa Matou Faataitaia le Faatalanoaga ma le Epikopo
O Kimberly, o se tina a se fanau o vaitausaga ua latalata ina papatiso, e manatua le savali atu i totonu o le ofisa o le epikopo mo le faatalanoaga mo lona papatisoga ina ua atoa lona valu tausaga. “Sa matuai ou fefe lava!” o le tala lea a Kimberly.
O le taimi nei ua taumafai ai o ia ia mautinoa e le fetaiai lana fanau ma lagona o le popolevale. E talanoa atu i laua ma lona toalua i le la fanau e uiga i faatalanoaga ma le epikopo ma fai atu ia i latou fesili e uiga i le papatisoga i se tulaga e foliga o se faatalanoaga. O nei faatalanoaga e sili atu nai lo na o le faamasani o tamaiti i le faiga o le faatalanoaga—la te uunaia ai foi tamaiti e mafaufau loloto i le uiga ia i latou o le feagaiga o le papatisoga.
Ua Ia Te i Tatou se Avanoa Matagofie
E vave lava ona faailoa mai e nei matua latou te le o faia ni mea e sili atu i le saunia o a latou fanau mo le papatisoga ma le faamauga, ae o le toatele o i latou sa faaaogaina ia upu e pei o le “maeaea” ma le “faia e le aunoa” e faamatala ai lesona sa latou aoaoina i le aluga o tausaga. “Ma te faia ia mautinoa na malamalama le ma fanau o se laasaga aupito taua lenei o o latou olaga, ma o se mea e sili ona maoae,” o le tala lea a Kimberly. “Sa ma faamautinoa i taimi uma o i maua tagata e saunia i latou, ae le na o le faamoemoe sa aoaoina i latou e o latou faiaoga o le Peraimeri.”
O se avanoa matagofie ua tuuina mai ia i tatou e fesoasoani ai e saunia fanau tatou te alolofa i ai mo le papatisoga ma le faamauga! A o tatou faia ma le agaga tatalo lea tulaga, o le a faatasi mai le Alii ia i tatou e faatulaga lenei aafiaga o le osi-feagaiga o se faavae mausali mo le tuputupu ae faaleagaga i le lumanai.
Ata na tusia e John Luke, Craig Dimond, ma Cody Bell