Mauaina o le Olioli i le Olaga
Karen Rockwood, Idaho, ISA
I se tasi taimi sa ou faitau ai i se lauga o le konafesi aoao na saunia e Elder Richard G. Scott o le Korama a Aposetolo e Toasefululua. E ui sa ou faalogo ma faitau muamua i lenei lauga, e tasi se fuaitau sa ou tosina i ai ma nofo ai i lo’u mafaufau.
O ni nai itula mulimuli ane, sa sau ai lo’u atalii o lē sa nonofo ma ana uo i se fale mautotogi, e asiasi mai. Sa avea o ia o se faifeautalai faamisiona ma sa auai foi i le kolisi mo ni nai semesa. Sa le mautonu o ia po o le fea le itu faaleaoaoga e tatau ona ia uia ae pe o le a foi le matata e tatau ona ia tulitulimatagauina. Talu ai ona sa le fiafia o ia ma manatu faapea o le aoga, mo le taimi nei, sa o se faamaumau taimi ma tupe, sa ia taofia ai ana aoga ma amata ai ona faigaluega tumau.
Sa ia fai mai ia te a’u, sa fautua atu e se tasi o ana uo la te o i se motu i le Bahamas po o le Karepiane, sue ni galuega, ma fiafia ai mo ni nai masina. Sa fiafia lo’u atalii e uiga i lea faamoemoe. Sa faigofie ona ou iloa le i ai o le faatosina o sea aafiaga saoloto i se alii talavou.
O le taimi tonu lena, sa oo mai ai i lo’u mafaufau le savali musuia a Elder Scott. Sa ou aumai le Ensign ma faitau atu i lo’u atalii le vaega lenei: “Ua e i ai iinei i le lalolagi mo se faamoemoega paia. E le ina ia faafiafiaina e le muta po o le ia tulitulimatagauina atoa i taimi uma ia tuinanau. Ua e i ai iinei ina ia tofotofoina, ia faamaonia oe lava ina ia mafai ona e maua faamanuiaga faaopoopo o loo i ai i le Atua mo oe. E manaomia ai le faatosinaga agavaivai o le onosai” (“Mauaina o le Olioli i le Olaga,” Ensign, Me 1996, 25).
E aunoa ma se upu, sa ave e lo’u atalii le mekasini, savali ese atu, ma faitau le lauga atoa. Mulimuli ane, na pau lava lana tala na fai mai, o le a le alu i lana sailiga fiafia i le motu.
E le’i umi ae ulufale loa i le aoga faaleoleo, o se auala sa faapea ona taitaiina atu ai o ia e feiloai i lana avā o le lumanai. Sa la faaipoipo i le Malumalu o Mesa Arisona ma o le asō o loo la tausia ai se fanau aulelei e toatolu. I le 2010 sa faamaea ai e lo’u atalii lona tikeri o le tagatamalaga ma ua ia “mauaina [moni] le olioli i le olaga.”
O le malaga saili fiafia sa fuafuaina e lo’u atalii atonu o se aafiaga manaia; ae i le isi itu, atonu e ono matautia foi faaleagaga. O taimi uma ou te tomanatu ai i lenei aafiaga, e pai mai ai le Agaga i lo’u loto.
Ou te faafetai mo saunoaga a perofeta ma sa musuia a’u e manatua se saunoaga sa faapea ona fesoasoani ia te a’u e tuuina atu ai le taitaiga. Ou te matuai faafetai ona sa faalogo lo’u atalii i se avefeau a le Alii ma faataga le Agaga e musuia o ia. Ou te iloa e oo mai faamanuaiga e tele ma musumusuga pe a tatou faalogo atu ma mulimuli i aoaoga a le Faaola ma Ana auauna.