O Fea e Mafai Ona Ou Maua Ai se Mekasini e Pei o Lenei?
Sharon Rather, Nevada, ISA
A o malaga le matou aiga mai Nevada, ISA, agai atu i Alaska, ISA, sa ma talanoa ai ma se tamaitai umi, lalelei, ma matamasani sa faasaga mai i le isi itu.
Sa fesili mai ia te au pe o fea sa ou alu i ai, ma sa ou fai atu sa matou o atu i Juneau, Alaska, e asi lo ma atalii ma lona aiga. Sa fai mai o ia e sau mai Las Vegas. Ma, o lona lagonaina o le ootia, sa faaopoopo mai ai o loo alu atu o ia i Juneau e asi matua o lona toalua e fai le sauniga faamanatu mo lona toalua, o lē sa faaipoipo i ai mo le 20 tausaga. E le’i leva atu ona maliu o ia i le kanesa.
Sa ou tilotilo atu i le isi itu ma ou mafaufau ifo ia te a’u lava, i lo’u laki i lo’u iloaina o le ata o le faaolataga ma le avea ai ma se tagata e galue i le Malumalu o Las Vegas Nevada. Sa ou mafaufau po o le a se mea e mafai ona ou faia mo lenei tamaitai e siitia ai lona agaga.
Sa faafuasei, i le manino e pei o se logo, ona ou manatuaina se upusii a le Perofeta o Iosefa Samita, sa ou tufaina atu i le Aualofa. Ina ua ia faavaeina le Aualofa, sa ia ta’ua e faapea o uso “o le a felelei atu i le toomaga o se tagata ese; o le a latou liligi atu le suauu ma le uaina i le loto mafatia o le tagata puapuagatia; o le a latou soloia loimata o le tamaitiiti matuaoti ma faafiafia le loto o se tina ua oti lana tane” (Teachings of Presidents of the Church: Joseph Smith [2007], 452).
Sa ou toe tilotilo atu i le isi itu o le auala. Sa ou vaaia ai se tagata ese ua pagatia, se tina ua oti lana tane ma se loto mafatia. Sa ou manatua se mea sa ou faitauina i le Ensign o Iulai 2011 i se taimi na muamua atu o lena aso. Sa i ai ni tusiga faagaeetia sa ou manatu o le a mafai ona tuuina atu ai ia te ia ni faamalosiauga ma le faamanafanafaga.
Sa ou aofaiina mai lo’u lototele, susue le mekasini i se tusiga, ma fai atu ia te ia e faitau i ai. Sa ou matuai mataituina o ia ma sa faateia au ona sa ia faitauina ma le totoa— laina uma. Ina ua uma, sa ia toe faitauina se isi tusiga.
E mautinoa lava sa pai atu se mea sa ia faitauina i lona loto. Sa ia opomauina le mekasini i lona fatafata ma soloi ese lomiata mai ona mata.
“O fea e mafai ona ou maua ai se mekasini e pei o lenei?” sa ia fesili mai ai. Sa ou fai atu ia te ia e mafai ona tuu ma ia. Ona ia faitau atili ai lea.
Ina ua matou taunuu i Juneau, sa tago mai o ia uu atu lou lima, ma tilotilo sa’o mai i o’u mata, ma fai mai, “Faafetai lava.”
Sa ou aoaoina se lesona maoae mai lena aafiaga. O loo siomia i tatou e tagata ese o i ai ni loto mafatia o e manaomia se upu agalelei faamalosiau ma o e e tatau ona iloa mea le mea ua tatou iloa i le avea ai o ni Au Paia o Aso e Gata Ai.