Aoaoga mo Taitai i le Lalolagi Atoa—o se Faiga Fou

I masina o lumanai, o le a auai ai tagata o le Ekalesia i le lalolagi atoa i se faiga fou musuia i le Aoaoga mo Taitai i le Lalolagi.

E le pei o fonotaga o aoaoga na faia muamua, o le Aoaoga mo Taitai i le Lalolagi Atoa i le tausaga lenei o le a le faasalalauina o se faasalalauga atoa e tasi mo taitai o uarota ma siteki. Ae, o le a vaevaeina i ni vaega pupuu se iva—i luga o se DVD ma luga o le LDS.org—lea e uunaia ai talanoaga mai taitai uma, tagata, ma aiga i lenei tausaga atoa o le a sau ma le lumanai.

O le taulaiga o le aoaoga o le “Faamalolosia o le Aiga ma le Ekalesia e ala i le Perisitua.” I le aoaoga, e tuuina atu ai e sui o le Au Peresitene Sili ma le Korama a Aposetolo e Toasefululua, faatasi ai ma isi Pulega Aoao ma taitai aoao, ni aoaoga musuia i:

• Auala e mafai ai e aiga ona maua le malosi ma le filemu e ala i le mana o le perisitua.

• Auala e fesoasoani ai i aiga uma ia tofo i faamanuiaga o le perisitua.

• Auala e faamalolosia ai e i latou ua umia ki o le perisitua ia aiga ma auaiga.

• Auala e auauna atu ai i auala faaKeriso.

• Auala e tausi ai fanau i le malamalama ma le upumoni.

O le a maua e iunite uma o le Ekalesia ni kopi o le DVD, ma ua talosagaina ia aufono a uarota ma siteki ina ia maimoaina atoa. Ona tatau lea ona latou fefautuaai faatasi i auala e fesoasoani ai i tagata o le uarota ma le siteki ia manuia mai le aoaoga.

I fonotaga ma vasega, e mafai e le au paia ona maimoa ma talanoa i vaega taitasi o le DVD. E mafai e aiga ma tagata taitoatasi ona maimoa i vaega, faatasi ai ma punaoa faaopoopo e faaleleia atili ai a latou suesuega, i le wwlt.lds.org.

I tulaga uma lava, o le vaega e sili ona manana o le aoaoga o le a tupu pe a uma ona maimoa se vaega ona amata ai lea o le talanoaga. A o mafaufau loloto, faasoa atu, ma molimau atu taitai, le au paia, ma aiga e uiga i mea na latou faalogo i ai ma lagonaina, o le a musuia ma aoaoina i latou e le Agaga Paia i le auala e faatatau ai le aoaoga i o latou lava tulaga. E ala atu i nei aafiaga, o le a fesoasoani ai lenei Aoaoga mo Taitai i le Lalolagi Atoa e faamalolosia aiga ma le Ekalesia i le lalolagi atoa.

O le susuga ia Elder L. Tom Perry, Elder Donald L. Hallstrom, ma Epikopo Dean M. Davies e taitaia se felafolafoaiga faavaega i le taua o le faaaogaina o ki o le perisitua.

O loo tutu i fafo mai o le maota o le Mary Fielding Smith i le This Is the Place Heritage Park ia, Elder M. Russell Ballard, Linda K. Burton, Elder Ronald A. Rasband, Elaine S. Dalton, Rosemary M. Wixom, ma Epikopo Gary E. Stevenson ma felafolafoai ai i faamanuiaga o le i ai o le perisitua i totonu o aiga uma.