Suesue Faatasi i Saunoaga o le Konafesi

Saunia e Greg Batty

O Greg Batty e aumau i Iuta, ISA.

O le suia o le auala e toe faamanatu ai le konafesi e matuai faaleleia ai a tatou talanoaga faaleaiga e uiga i le talalelei.

Mo le tele o tausaga ua matou fiafia ai i le faitauina o se aiga o lomiga o le konafesi, e tasi le tusiga i le taimi. Pe a matou amataina, matou te faapotopoto faatasi i le laulau ma feauauai e faitau leotele se parakalafa. Peitai, sa matou iloa ai sa matou faitauina ina ia faauma ai, e aunoa ma le taofi ae mafaufau ma malamalama i savali.

Ina ia matou aoaoina ni mea se tele mai mea sa matou faitauina, sa ma faatauina mai ai ma lo’u toalua se kopi se tasi o le lomiga o le konafesi mo tagata taitoatasi o le aiga ma fuafua pe fia ni lauga o le a manaomia ona matou suesueina i vaiaso taitasi ina ia mafai ona matou faitauina uma a o le’i oo i le isi konafesi aoao e sosoo ai. O nisi vaiaso matou te faitauina ai se lauga se tasi, o isi vaiaso pe a ma le lua, ae e tatau i tagata uma ona suesue i le lauga ma faailoga vaega latou te fiafia i ai. Ma mo afiafi faaleaiga, matou te aoaoina atu ai le tasi ma le isi mai a matou vaega na faailogaina.

E masani ona i ai ni fesili a le ma fanau e faapea ona amataina ai a matou talanoaga, pe ma te faia atu foi ma lo’u toalua ni fesili mai a maua suesuega. Ma te faatauaina le faalogo atu i le ma fanau talavou o faamalamalama mai a latou tali i na fesili, ma faasoa mai mea sa latou aoaoina i le seminare, i le lotu, pe i a latou foi suesuega patino. Sa avea lenei mea ma se auala sili lava e faalogologo atu ai i molimau le aloaia a le tasi ma le isi i se tulaga faisoo, i se siosiomaga sili ona lagolelei ma faasamasamanoa.

E le’i umi ae matou iloa ai o a matou suesuega o tusitusiga paia i taeao sa faapena foi lona agaga. O nisi aso pe na o ni nai fuaiupu lava matou te faamaeaina ae vave lava ona uma le taimi i talanoaga e uiga i na fuaiupu ma auala e faatatau atu ai i mea sa tutupu ia i matou.

O o matou taeao ua faatumulia i talanoaga, taliega, ma le lotogatasi ae matou te le’i taape taitasi atu i a matou fuafuaga fai. O loo i ai ni a matou molimau malolosi e uiga i fautuaga a lo tatou perofeta ia suesue ma tatalo faatasi i aso uma. Ua suia lo matou aiga i se aiga e aoao mai ma faamalosia e le tasi le isi. O nei mea uma o se taunuuga o le manao ia maua mai teisi ni mea aoga mai konafesi aoao.