O Le Misiona ma le Auaunaga a Iesu Keriso

Aperila 2013

O Le Misiona ma le Auaunaga a Iesu Keriso

Saunia e Elder Russell M. Nelson

O Le Korama a Aposetolo e Toasefululua

Mai se saunoaga i le faigalotu sa faia i le aso 18 Aokuso, 1998, i le Iunivesite o Polika Iaga. Mo le tusiga atoa i le gagana Peretania, asiasi i le speeches.byu.edu.

O le faamaoniga sili lava o lo tatou alolofa ia Iesu o lo tatou faataitai ia te Ia.

I le avea ai ma se tasi o “molimau faapitoa o le suafa o Keriso i le lalolagi atoa” (MF&F 107:23), ou te talitonu e sili atu ona lelei la’u auaunaga pe a ou aoao atu ma molimau atu e uiga ia te Ia. Muamua, atonu ou te fai atua ia fesili lava e tasi ia sa Ia fetalai atu ai i le au Faresaio: “Se a lo outou taofi ia Keriso? se atalii ea ia o ai?” (Mataio 22:42).

O nei fesili e masani ona manatua pe a ou feiloai atu i taitai o malo ma aulotu o tapuaiga eseese. E fai mai nisi “O Iesu o se faiaoga maoae.” E fai mai isi, “O Ia o se perofeta.” O isi latou te matuai le iloa lava o Ia. E le tatau ona tatou matuai tete’i ai. Aua foi, e toalaiti ni tagata ua latou maua upumoni o le talalelei toefuataiina lea ua tatou maua. O tagata o Le Ekalesia a Iesu Keriso o le Au Paia o Aso e Gata Ai, ua na o se aofaiga laitiiti lava ua aofia ai i e ua fai mai o i latou o ni Kerisiano.

O lo tatou tulaga i aso nei sa muai vaaia i seneturi ua mavae e Nifae:

“Ma sa oo ina ou vaai atu i le ekalesia a le Tamai Mamoe a le Atua, ma sa toaitiiti ona aofai … ; e ui i lea, sa ou vaai o le ekalesia a le Tamai Mamoe, o i latou ia o le au paia a le Atua, ua i ai foi i latou i luga o le lalolagi atoa; ma sa itiiti a latou puleaga i luga o le lalolagi. …

“Ma sa oo ina a’u vaai a’u o Nifae, i le mana o le Tamai Mamoe a le Atua, ua alu ifo i luga o le au paia o le ekalesia a le Tamai Mamoe, ma luga o tagata o le feagaiga a le Alii, o e sa faataapeapeina i luga o le lalolagi atoa; ma sa faaauupegaina i latou i le amiotonu ma le mana o le Atua i le mamalu tele” (1 Nifae 14:12, 14).

O lena amiotonu, lena mana, ma lena mamalu—e moni, o o tatou mau faamanuiaga—e afua mai lo tatou malamalama e uiga, usiusitai i le, ma le agaga faafetai ma le alofa mo le Alii o Iesu Keriso.

I le taimi puupuu sa Ia afea ai le lalolagi nei, e lua ni faamoemoega taua sa ausia e le Faaola O le tasi o Lana “galuega ma [Lona] mamalu—ia aumaia le tino ola pea ma le ola faavavau o le tagata” (Mose 1:39). O le isi sa Ia fetalai mai ai faapea: “Aua ua ou avatu le faaaoao ia te outou, e pei ona ou faia ia te outou, ia faapea lava e outou ona fai” (Ioane 13:15).

O Lona faamoemoega muamua ua tatou ta’ua o le Togiola. O Lana misiona maoae lenei i le tino. I tagata o Amerika anamua, sa tuuina atu i ai e le Alii toetu le faamatalaga o Lana misiona:

“Ua ou sau i le lalolagi e fai le finagalo o lo’u Tama, aua na auina mai a’u e lo’u Tama.

“Ma na auina mai a’u e lo’u Tama, ina ia sii ae a’u i luga o le satauro; ma a mavae ona sii ae o a’u i luga o le satauro, ina ia mafai ona ou aumai o tagata uma ia te au” (3 Nifae 27:13–14).

I le faaauau ai o Lana saunoaga, sa Ia faaalia ai Lona faamoemoega lona lua—ia avea ma o tatou faataitaiga: “Ua outou iloa mea e tatau ona outou faia … ; aua o mea na outou vaai ua ou faia o mea lava ia ia outou faia” (3 Nifae 27:21).

O Lona faamoemoega muamua ua ou faamatalaina o Lana misiona. O Lona faamoemoega lona lua ou te fia faailoa atu o Lana auaunaga. Sei o tatou iloiloina nei vaega o Lona soifuaga—Lana misiona ma Lana auaunaga.

O Le Misiona a Iesu Keriso—o le Togiola

O Lana misiona o le Togiola. O lena misiona o Lana lava e tulaga ese. O le soifua mai i se tina faaletino ma se Tama e faavavau, sa na o Ia ai lava e mafai ona ofo mai e tuuina ifo Lona soifua ma toe aumai ai (tagai i le Ioane 10:14–18). O taunuuga mamalu o Lana Togiola e le gata mai ma e faavavau. Ua Ia aveese mai le tui o le oti ma faia ai ia na o se taimi le tumau le faanoanoa o le tuugamau (tagai i le 1 Korinito 15:54–55). O Lona tiutetauave mo le Togiola ua loa ona iloa a o le’i oo i le Foafoaga ma le Pau. E le gata ina tuuina mai ai le toetutu ma le tino ola pea i tagata uma, ae ina ia mafai ai foi ona faamagaloina i tatou ia tatou agasala—e tusa ai lea ma tulaga sa Ia faatulagaina. Ma o lea, o Lana Togiola ua tatalaina ai le ala lea e mafai ai ona tatou toe faatasi ma Ia ma faatasi ai ma o tatou aiga e faavavau. O lenei vaaiga tatou te taua o le ola faavavau—o le meaalofa silisili a le Atua i le tagata (tagai i le MF&F 14:7).

E leai se isi tagata e mafai ona aumaia le Togiola. E leai se isi tagata, e tusa lava pe sili ona mauoa ma malosi, e mafai ona laveaiina se tagata se toatasi—e oo foi ia te ia lava (tagai i le Mataio 19:24–26). Ma e leai se isi tagata o le a manaomia pe faatagaina e faamaligi le toto mo le faaolataga e faavavau o se isi tagata ola. Sa “fai faatasi” e Iesu (Eperu 10:10).

E ui ina sa faamaeaina le Togiola i le taimi o le Feagaiga Fou, ae na muai ta’u soo mai i mea na tutupu i le Feagaiga Tuai ia lona taua. Na poloaiina Atamu ma Eva e osi ni taulaga e avea ma “se faatusa o le taulaga a le Toatasi na Fanaua e le Tama” (Mose 5:7). Faapefea? E ala i le faamaligiina o le toto. Mai o latou lava aafiaga sa latou faamautinoaina ai le mau e faapea “o i le toto le ola o le tino” (Levitiko 17:11).

Ua iloa e fomai soo se taimi lava e le tafe atu ai le toto i se totoga, ua amata le faalavelave. Afai e faalavelaveina le tafe atu o le toto i le vae, o le mea e sosoo ai o le matutu o le vae. Afai e taofia le tafe atu i le faiai, e mafai ona tulai mai ai le pe o le faiai ma le tino. Afai e le tafe lelei atu le toto i se alatoto o le fatu, e ono tulai mai ai se fatu pe. Ma afai foi e le mafai ona utu le palapala, o le oti e sosoo ai.

Sa aoaoina e Atamu, Eva, ma augatupulaga e mulimuli mai, soo se taimi lava latou te faamaligi ai le toto o se meaola, ua faamuta ai foi ma lona ola. Mo a latou osigataulaga, ae le o soo se meaola. Sa tatau ona o se uluai manu lava o le lafu ma o se meaola e leai sona pona (tagai, mo se faataitaiga i le, Esoto 12:5). O nei tulaga manaomia o se faatusa o le taulaga faaiu a le Tamai Mamoe e leai se pona a le Atua.

Sa tuuina atu ia Atamu ma Eva se poloaiga: “O le mea lea, ia e faia mea uma e te faia i le suafa o le Alo, ma ia e salamo ma valaau atu i le Atua i le suafa o le Alo e faavavau” (Mose 5:8). Mai lava i lena aso seia oo mai i le taulotoaiga o taimi, sa faaauau lava ona avea taulaga i manu ma se ituaiga ma faatusa o le Togiola faaiu a le Alo o le Atua.

Ina ua faataunuuina le Togiola, o lena osigataulaga tele ma faaiu ua faataunuuina ai le tulafono a Mose (tagai i le Alema 34:13–14) ma faaleaogaina ai le faiga masani o le osi o taulaga i manu, lea sa aoao mai ai “[sa] i le toto le ola o le tino” (Levitiko 17:11). Sa faamalamalama mai e Iesu le ala na faitaulia faatasi ai elemene o taulaga anamua i le Togiola ma le faamanatuina faafaatusa e le faamanatuga. Ia matau foi mau faasino i le ola, o le tino, ma le toto:

“Ona fetalai atu lea o Iesu ia te i latou, E moni e moni, ou te fai atu ia te outou, afai tou te le aai i le tino o le Atalii o le tagata, a le inu foi i lona toto, ua le i totonu ia te outou le ola.

“O lē ai i lo’u tino ma inu i lo’u toto, ua ia te ia le ola e faavavau; ou te toe faatuina foi o ia i le aso gataaga” (Ioane 6:53–54).

Ona o le Togiola a Iesu Keriso, o tagata uma—e tusa lava po o le a le toatele o le a—o le a togiolaina. Sa amata e le Faaola ona faamaligi Lona toto mo tagata uma, e le o luga o le satauro ae i totonu o le Faatoaga i Ketesemane. O iina sa Ia tauaveina ai i Ona luga le mamafa o agasala a i latou uma o le a ola. I lalo o lena avega mamafa, sa tafe toto ai Ona pu afu uma (tagai i le MF&F 19:18). O le tiga o le Togiola sa faamaeaina i luga o le satauro i Kalevaria.

Sa aoteleina e le Perofeta o Iosefa Samita le taua o le Togiola. Na ia fai mai, “O mataupu faavae autu o lo tatou talitonuga o le molimau a le au Aposetolo ma Perofeta, e faatatau ia Iesu Keriso, e faapea na maliu o Ia, ma tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo tatou talitonuga ua na o ni faaopoopoga i ai.”¹

Faatasi ai ma lena mana ma lena agaga faafetai o’oo’o, ou te aoao atu ma molimau atu ai ia te Ia.

O Le Auaunaga a Iesu Keriso—o le Faaaoao

O le faamoemoega alualu mamao lona lua a le Alii i le olaga nei o le auauna atu lea e fai ma se faataitaiga mo i tatou. O Lona soifuaga faaa’oa’o sa aofia ai Lana auaunaga i le tino. Na aofia ai Ana aoaoga, faataoto, ma lauga. E aofia ai Ana vavega, agalelei-alofa, ma le talitiga i le fanauga a tagata (tagai i le 1 Nifae 19:9). E aofia ai Lona faaaogaina ma le agaalofa o le mana o le perisitua. E aofia ai Lona toatamai tauamiotonuina ina ua Ia faasalaina ai le agasala (tagai i le Roma 8:3) ma ina ua Ia fuli i lalo laulau a e na faatau tupe (tagai i le Mataio 21:12). Na aofia ai Lona lotomafatia. Sa tauemuina, itagia, ma teenaina e Ona lava tagata (tagai i le Mosaea 15:5)—na oo lava ina faalataina e se tasi o soo ae faafitia e le isi (tagai i le Ioane 18:2–3, 25–27).

E ui i le matagofie o Ana galuega auauna atu, ae sa le avea o ni mea e tulaga ese ia te Ia. E leai se tapulaa o le aofai o tagata o e e mafai ona mulimui i le faataitaiga a Iesu. E faapena foi ni galuega ua faia e Ana perofeta ma aposetolo ma isi o Ana auauna faatagaina. E toatele na onosaia sauaga ona o Ia (tagai i le Mataio 5:10; 3 Nifae 12:10). I o tatou lava taimi, ua e iloa ni tuagane ma ni uso o e sa taumafai ma le naunautai—e oo lava i se tau matautia—e mulimuli i faataitaiga a le Alii.

O le mea lena e tatau ona i ai. O Lona faamoemoe lena mo i tatou. Na fetalai mai le Alii ia tatou mulimuli i Ana faataitaiga. E manino lelei Lana augani:

“Pe faapefea la outou amio e tatau ai? … E pei lava o a’u nei” (3 Nifae 27:27; tagai foi i le 3 Nifae 12:48).
“Ina mulimuli mai ia ia te a’u, ou te faia oulua ma fai faiva i tagata” (Mataio 4:19).
“Aua ua ou avatu le faaa’oa’o ia te outou, e pei ona ou faia ia te outou, ia faapea lava e outou ona fai” (Ioane 13:15; tagai foi i le Ioane 14:6).

O nei mau ma isi mau faapenei sa le’i tusia o ni fautuaga. O ni tulaga manaomia paia! E tatau ona tatou mulimuli i Ana faataitaiga!

Ina ia fesoasoani i lo tatou naunau e mulimuli ia te Ia, atonu e mafai ona tatou mafaufau i itu nei e lima o Lona soifuaga e mafai ona tatou mulimuli i ai.

Alofa

Afai ou te fesili atu po o le fea o uiga auaumama o Lona soifuaga e te ta’uina mai muamua, ou te manatu e te ono ta’u mai Lona uiga faaalia o le alofa. O lena e aofia ai Lona agaalofa, agalelei, alofa mama, tuuto, faamagalo atu, alofa tunoa, faamasino tonu, ma le anoano o isi mea. Sa alofa Iesu i Lona Tama ma Lona tina (tagai i le Ioane 19:25–27). Sa alofa o Ia i Lona aiga ma le Au Paia (tagai i le Ioane 13:1; 2 Tesalonia 2:16). Sa alofa o ia i le tagata agasala ae le ta’uamiotonuina le agasala (tagai i le Mataio 9:2; MF&F 24:2). Ma sa Ia aoao mai ia i tatou le ala e mafai ona faaali atu ai lo tatou alolofa ia te Ia. Na fetalai o Ia, “Afai tou te alolofa mai ia te au, ia outou tausi mai i au poloaiga” (Ioane 14:15). Ma, ina ia faamamafa mai o Lona alofa sa le le faatuaoia, sa Ia faaopoopo mai, “Afai tou te tausia a’u poloaiga ona tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa” (Ioane 15:10; tagai foi i le MF&F 95:12; 124:87).

O le isi faailoaga o le alofa o lo tatou Faaola o Lana auaunaga. Sa Ia auauna atu i Lona Tama, ma sa Ia auauna atu i tagata sa mafuta ma galulue faatasi ma Ia. I nei auala uma e tatau ai ona tatou mulimuli i Lana faataitaiga. E tatau ona tatou auauna atu i le Atua, “ina ia e savali i ona ala uma lava, ma ia e alofa atu ia te ia” (Teuteronome 10:12; tagai foi i le 11:13; Iosua 22:5; MF&F 20:31; 59:5). Ma e tatau ona tatou alolofa i o tatou tuaoi e ala i le auauna atu ia i latou (tagai i le Kalatia 5:13; Mosaea 4:15–16). Tatou te amata i o tatou aiga. O le alofa loloto lea e fusia ai matua i a latou fanau, e fausia e ala i le auauna atu ia i latou e ala i le taimi o le faalagolago atoatoa i ai. Mulimuli ane i le olaga, e maua ai e tamaiti usiusitai le avanoa e toe totogi atu ai lena alofa pe a latou tautuaina o latou matua matutua.

Sauniga

O le vaega lona lua o le soifuaga o faataitaiga a le Faaola o Lana faamamafa i sauniga paia. I Lana auaunaga i le tino, sa Ia faaalia ai le taua o sauniga o le faaolataga. Sa papatisoina o ia e Ioane i le Vaitafe o Ioritana. E oo lava foi ia Ioane sa fesili, “Aisea?”

Sa faamalamalama atu e Iesu, “Aua e faapea ona tatau ia te i tatou ona faataunuuina o mea tonu uma” (Mataio 3:15; ua faaopoopo le faamamafa). Sa le gata ina taua le sauniga, ae o le faataitaiga foi sa faia e Iesu ma Ioane sa faapena foi ona taua.

Mulimuli ane sa faailoa mai ai e le Alii le sauniga o le faamanatuga. Sa Ia faamalamalamaina le faatusa o le faamanatuga ma tufa atu ona faatusa paia i Ona soo (tagai i le Mataio 26:26–28; Mareko 14:22–24; Luka 24:30).

Sa tuuina mai foi e lo tatou Tama Faalelagi faatonuga e uiga i sauniga. Na fetalai o Ia: “E faapea lava ona tatau ona toe fanauina o outou i le malo o le lagi, i le vai, ma le Agaga, ma faamamaina i le toto, o le toto lava lea o la’u Toatasi na Fanaua; ina ia mafai ona faapaiaina outou mai agasala uma, ma olioli i afioga o le ola faavavau i le lalolagi a sau, o le mamalu ola pea lava” (Mose 6:59).

I le taimi o le galuega a le Alii ina ua mavae lona soifuaga i le tino, sa faapea ona faaali mai ai sauniga maualuluga atu o le faaeaga (MF&F 124:40–42). Ua Ia tuuina mai nei sauniga i totonu o Ona malumalu paia. I o tatou aso, o le mulumuluga, faauuina, ma faaeega paia e tuuina atu i tagata taitoatasi o e e saunia lelei (tagai i le MF&F 105:12, 18, 33; 110:9; 124:39). I totonu o le malumalu, e mafai ona faamauina ai se tagata i le tane po o le ava, i tuaa, ma i fanau (tagai i le MF&F 132:19). O lo tatou Matai o se Atua o le tulafono ma le maopoopo lelei (tagai i le MF&F 132:18). O Lana taulaiga i sauniga o se vaega mamana o Lana faataitaiga ia i tatou.

Tatalo

O se vaega lona tolu o le auaunaga faafaataitaiga a le Alii o le tatalo. Sa tatalo Iesu i Lona Tama oi le Lagi ma aoao mai foi i tatou i le ala e tatalo ai. Tatou te tatalo i le Atua le Tama Faavavau i le suafa o Lona Alo, o Iesu Keriso, e ala atu i le mana o le Agaga Paia (tagai i le Mataio 6:9–13; 3 Nifae 13:9–13; Faaliliuga Iosefa Samita, Mataio 6:9–15). Ese lo’u fiafia i le Tatalo Faatoga sa fofogaina e le Alii o loo tusia i le Ioane, mataupu e 17. O iina o loo saoloto lava le talanoa a le Alo ma Lona Tama e fai ma sui o Ona soo, o e e alofa tele i ai o Ia. O se faataitaiga o tatalo anoa ma le agaalofa.

Atamai

O le vaega lona fa o le faataitaiga a le Alii o le faaaogaina o Lona atamai faalelagi. E pei ona ta’ua muamua atu, e toatele tagata e le o ni Kerisiano ua latou ta’ua e faapea o Iesu o se faiaoga maoae. Ioe, e sa’o lelei. Ae peitai, o le a le mea sa lauiloa moni ai Ana aoaoga? Pe sa avea o Ia ma se faiaoga atamai o le faaenisinia, matematika, po o le faasaienisi? I le avea ai ma Foafoa o lenei lalolagi ma isi lalolagi (tagai i le Mose 1:33), e mautinoa lava e mafai ona avea ai o Ia. Po o o le, avea ai ma Tusitala o tusitusiga paia, semanu foi e sili atu le lelei o lona aoaoina o tusiga tala fatu.

O le tulaga na lauiloa ai Ana aoaoga e sili atu nai lo isi faiaoga uma, sa Ia aoao mai upumoni e faavavau le taua. E na o Ia lava e mafai ona faaalia mai lo tatou faamoemoega i le olaga. E na o Ia lava e mafai ona tatou aoao ai i o tatou olaga i le muai olaga ma o tatou gafatia i le olaga pe a mavae lenei olaga.

I se tasi taimi sa fetalai atu ai le Matai Faiaoga i Ana au faalogologo masalosalo e faapea, o loo ia i latou ni molimau se toatolu e uiga ia te Ia.

Ioane le Papatiso.
O faatinoga sa faataunuuina e Iesu.
O le afioga a le Atua le Tama Faavavau (tagai i le Ioane 5:33–39).

Ona Ia tuuina atu ai lea o le molimau lona fa: “E suesue outou i tusi; aua ua outou manatu tou te maua ai le ola e faavavau: o tusi foi ia o loo molimau ia te au” (Ioane 5:39).

O le upu manatu o loo i le fuaitau lena e pei e foliga mai i le taimi muamua e sese le mea o loo i ai. Ae e taua tele i le uiga sa taumafai Iesu e faailoa atu. Sa Ia silafia o le toatele o Lana au faalogologo sa manatu moni lava o le ola faavavau o loo i totonu o tusitusiga paia. Peitai, sa sese i latou. O tusitusiga paia lava ia e le mafai ona tuuina maia le ola faavavau. Ioe o loo i ai le mana i tusitusiga paia, ae o lena mana e sau mai ia Iesu lava Ia. O Ia o le Upu: Lokou. O le mana o le ola faavavau o loo i totonu ia te Ia, o lē “sa i le amataga le Lokou, sa i le Atua le Lokou, o le Atua foi le Lokou” (Ioane 1:1; tagai foi i le 2 Nifae 31:20; 32:3). Ona, talu ai o le le maluelue o le tulaga o Lana au masalosalo, o lea sa aoai ai i latou e Iesu: “A e le mafafai outou ina o mai ia te au, ia outou maua ai le ola [faavavau]” (Ioane 5:40).

E mafai lava e le Matai ona lofituina i tatou i Lona poto faalelagi, ae Na te le faia. E faamamalu o Ia i lo tatou faitalia. Na te tuu i tatou e olioli pe a iloaina se mea. Na te uunaia i tatou ia salamo i a tatou lava mea sese. Na te faatagaina i tatou e oo i le saolotoga lea e maua mai le usiusitai ma le naunautai i Lana tulafono paia. Ioe, o le auala Na te faaaogaina ai Lona atamai ua tuuina mai ai se faataitaiga maoae mo i tatou.

Tumau

O le vaega lona lima o le auaunaga a le Alii o Lona tautino e tumau seia oo i le iuga. E le’i faapea lava na aluese mai o Ia mai Lona tofiga. E ui ina sa oo o Ia i mafatiaga e sili atu nai lo mea tatou te malamalama i ai, ae sa le o Ia o se tagata e fiugofie. E ui lava i tofotofoga o’oo’o, ae sa tumau lava o Ia seia oo i le iuga: ia togiola mo agasala a tagata ola uma. O Ana fetalaiga faaiu a o tautau o Ia mai le satauro o le, “Ua taunuu” (Ioane 19:30).

Faatatauga i o Tatou Olaga

O nei vaega e lima o Lana auaunaga e mafai ona faatatau i o tatou lava olaga. E mautinoa lava o le faamaoniga sili o lo tatou faamemelo ia Iesu o lo tatou faaaoao ia te Ia.

A amata ona tatou iloa ai po o ai Iesu, ae o a foi mea ua Ia faia mo i tatou, e mafai ona tatou malamalama, i se itu, i le alagatatau o le poloaiga muamua ma le sili: “Ia e alofa foi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa” (Mareko 12:30). I se isi faaupuga, o mea uma tatou te mafaufau i ai ma fai ma tautatala ai e tatau ona lofiaina i lo tatou alolofa ia te Ia ma Lona Tama.

Fesili ifo ia te oe lava, “E i ai se isi e sili atu ona ou alofa i ai nai lo o le Alii?” Ona faatusatusa lea o lau tali i tulaga faatonuina nei ua faatulagaina e le Alii:

“O lē ua tele lona alofa i lona tama po o lona tina a e itiiti ia te a’u, e le aoga lea ia te a’u.”
“O lē ua tele foi lona alofa i lona atalii po o lona afafine, a e itiiti ia te a’u, e le aoga foi lea ia te a’u” (Mataio 10:37).

O le alofa mo aiga ma uo, po o le a lava le tele, e sili atu ona loloto pe a taula i le alofa o Iesu Keriso. O le alofa faamatua mo tamaiti e sili atu ona anoa iinei ma le olaga a sau ona o Ia. O mafutaga alofa uma e faateteleina ona o Ia. O le alofa i lo tatou Tama Faalelagi ma Iesu Keriso e tuuina mai ai le malamalama, musumusuga, ma uunaiga ia alofa atu ai i isi i se auala e sili atu le mamalu.

O sauniga e tuuina mai ai se taulaiga mo auaunaga e faavavau le taua. E tatau i matua ona tagai po o le fea sauniga e sosoo ai e manaomia e tamaiti taitoatasi. E tatau i faiaoga o aiga ona mafaufau i se sauniga talafeagai e sosoo ai e manaomia e aiga taitoatasi o loo latou tautuaina.

O le faataitaiga a le Faaola o le tatalo ua faamanatu mai ai ia i tatou o tatalo faaletagata lava ia, tatalo faaleaiga, ma le taumafaiga i le agaga tatalo o o tatou tofiga i le Ekalesia e tatau ona avea ma se vaega o o tatou olaga. O le iloa ma le faia o le finagalo o le Tama e aumai ai le malosi faaleagaga tele ma le talitonu o le tagata ia te ia lava (tagai i le MF&F 121:45). O le itu a le Alii o le itu lena tatou te fia i ai.

O le Atamai “o mea e pei ona i ai moni lava, ma e uiga i mea e pei o le a i ai moni lava” (Iakopo 4:13) e mafai ai ona tatou galulue i luga o mataupu ma aoaoga faavae moni. O lena atamai o le a siitia ai le maualuga o amioga. O amioga lea e ono faaosofia e le manao ma lagona o le a suia i galuega faatino e mamanuina e mafuaaga ma le sa’o.

O se tautinoga e tumau seia oo i le iuga o lona uiga o le a tatou le fesili mo se faamalologa mai se valaauga e auauna atu ai. O lona uiga o le a tatou tumau i le sailiga o se sini tauaogaina. O lona uiga o le a tatou le fiu lava i se tagata tatou te alolofa i ai ua se ese. Ma o lona uiga o le a tatou teufatuina e le aunoa a tatou sootaga faaleaiga e faavavau, e oo lava i aso faigata o faama’i, lē atoatoa, po o le oti.

Faatasi ai ma lo’u loto atoa, ou te tatalo ai mo lena uunaiga a le Alii e suia ai, ina ia mafai ona faia se eseesega o’oo’o i lou olaga. O Lana misiona ma Lana auaunaga e mafai ona manuia ai i tatou taitoatasi i le taimi nei ma le faavavau.

Ua maliu atu Iesu i Petania i le Afiafi, na saunia e James Tissot

Sena e, Faauta o Lau Tama (Stabat Mater), saunia e James Tissot © Brooklyn Museum, Brooklyn, New York; ata faaopoopo: faamatalaga mai le I le Faatoaga o Ketesemane, na saunia e Carl Heinrich Bloch

O Le Lauga i luga o le Mauga, saunia e James Tissot; ata faaopoopo: faamatalaga mai le Keriso ma le Taulealea Mauoa, saunia e Heinrich Hofmann, faaaloaloga a le C. Harrison Conroy Co.

Ua Faapotopoto Faatasi le Nuu, saunia e James Tissot