Tuputupua’e i Eleele Lafulemu: Talavou Faamaoni i Uganda
Sa nofo Cindy Smith i Uganda a o faigaluega ai iina lona toalua, ae o lea ua nonofo nei i Iuta, ISA.
Ina ua latou talia ma ola i le talalelei a Iesu Keriso, ua vaaia e le autalavou i Uganada le tuputupua’e o le faatuatua ma le faamoemoe ia i latou uma.
I le fatu o Aferika i Sasae, ua faamanuiaina ai le atunuu matagofie o Uganda i mauga faataamilo o tolo ma fa’i—faapea ma tagata talavou ua saunia e talia ma ola i le talalelei a Iesu Keriso.
O le uluai siteki i Uganda sa faavaeina i le 2010. Ua vave le tuputupua’e o le Ekalesia, faatasi ai ma le toatele o alii ma tamaitai talavou i uarota taitasi ma paranesi.
Sisiina A’e o se Tagavai, Avea ma se Faataitaiga
Sa musuia ni tamaitai talavou o se tasi o uarota i aoaoga a Sister Elaine S. Dalton, peresitene aoao o Tamaitai Talavou, e uiga i le mama: “O le taimi lenei mo i tatou taitoatasi e tulai ae ma faailoa atu se tagavai i le lalolagi ma valaau atu mo se toe foi i le mama.”1 Sa sopo tamaitai talavou i se maupuepue e vaai ifo ai i le aai ma sisi ae tagavai auro ua faatusa i la latou tautinoga ia avea ma faataitaiga o le mama. Sa latou usuina faatasi le “I Luga o Mauga” (Viiga, nu. 5).
Ua sii a’e e nei tamaitai talavou o latou tulaga faatonuina patino o le amiotonu. O lo latou usiusitai ua faamalosia ai a latou molimau ma uunaia ai isi. Ua saunoa Sister Dalton, “Aua ne’i taufaatauvaaina le mana o au uunaiga amiotonu.”2 Ma e pei o se tagavai, o le faataitaiga a nei tamaitai talavou ua talotalo atu i le lalolagi atoa.
Sandra
E pei o le toatele o tamaitai talavou i Uganda, o Sandra e savali atu i le silia ma le maila i le lotu, fesoasoani e tapena le falelotu i Aso Faraile, ma auai i le seminare i Aso Toonai. I le aluga o le vaiaso, e ala o ia a o le’i taina le 5:00 i le taeao, e faitau ana meaaoga, ona savali lea i le aoga, foi mai i le fale i le te’a o le 6:00 i le afiafi. Sa ia misia se tausaga aoga ona o faigata tautupe, ae sa ia faafetauia ana luitau ma se uiga faaalia lelei: “O le talalelei ua matuai fesoasoani ia te au ou te tumau ai ma le le mafaagaeetia.”
E na o Sandra lava le tagata o le Ekalesia o lona aiga, ae e lagolago lava e ona matua o ia i ana auaunaga i le Ekalesia, e pei o le fesoasoani pe a tapena e le uarota ia lotoa o se fale i le lotoifale mo tamaiti matuaoti. Ua vaaia e lona aiga le ala ua fesoasoani ai le talalelei ia te ia ia malosi, e tusa lava pe feagai ma ni faafitauli e le mafai ona foiaina. O le manatunatu i ai i le puna o lena malosiaga, fai mai Sandra, “A ou alu i le lotu, ou te lagona e pei lava o loo ou ofuina le ofutau o le Atua” (tagai i le Efeso 6:11–17).
O Susana e le’i leva ona liliu mai, ae e alofa i le Ekalesia. O lo latou aiga e malaga mai i Sudan i Saute, ma sa sosola ese mai lona aiga ona o tulaga faigata ma sa faamanuiaina i le mauaina o faifeautalai i Uganda. I le avea ai ma se tagata sulufai, sa ia maua ai le toafilemu ma le puipuia i totonu o le talalelei. O Aso Sa e sau ai ma aumai nai ona tei i le lotu, e oo lava i le toa 10 o isi tamaiti e le o ni tagata o le Ekalesia. Ina ua mavae le maliu faafuasei o se tagata o lona aiga, sa toe foi atu ai i Sudan i Saute, lea o loo faatalitali ai mo le faatuina o le Ekalesia i lana eria. Sa feagai uma Susana ma Sandra ma ni luitau, ae sa la faalagolago i le Atua ma fiafia i fua o le ola ai i le talalelei a Iesu Keriso (tagai i le Alema 32:6–8, 43).
Ositaulaga e Auauna Atu i se Misiona
O alii talavou i Uganda e amata ona taaalo soka a o laiti lava, e faaaoga ai ni fasilaau ua saisai mau e fai ma polo. A o laitiiti lava o ia, sa maua ai e Tenisi se meaalofa mo le taaloga, ma sa tuuina atu ai e lana aoga maualuga ia te ia se sikolasipi e taalo ai mo le latou au. Ina ua uma lana aoga maualuga, sa ofo atu e se au faapolofesa ia te ia se totogi, potu, ma le tupe e totogi ai lona potu. Sa o se miti ua taunuu, ae sa iloa e Tenisi o lenei mea e ono faalavelave ai i ana fuafuaga e alu i se misiona i se taimi mulimuli ane o le tausaga.
Tenisi
Sa matuai malosi le manao o Tenisi e fai le mea sa finagalo lona Tama Faalelagi na te faia, o lea sa le manao ai ia tofotofoina o ia e nofo i le au pe a oo mai le taimi e alu ai o ia e auauna atu i se misiona. Sa toatele tagata sa fesiligia lenei filifiliga, ae ua mautinoa lelei e Tenisi ua ia faia le filifiliga sa’o—mo ia ma isi. “O o’u uso laiti e toalua ma lo’u tuafafine laitiiti na faatoa papatiso lava,” o lana tala lea. “Ou te le’i manatu lava o le a faalogo lo’u tuafafine i le talalelei. A ou vaai i le faia e le Atua o vavega i lo’u aiga, e aumai ai ia te a’u se faamoemoe susulu mo lo’u lumanai.”
I le uarota a Tenisi e suesue ai e alii talavou le Talai La’u Talalelei i vaiaso taitasi. Ua avea i latou e faapei o se au, e galulue vavalalata ma faifeautalai faamisiona ma aumai uo i sauniga o le Aso Sa ma isi gaoioiga, e aofia ai taaloga pasiketipolo ma soka i le vaiaso. Ua papatisoina e ositaulaga ni uo ma isi sa latou fesoasoani e aoao faatasi ma faifeautalai. I le aluga o ni tausaga, o lenei au o alii talavou ua faamalolosia le uarota atoa, ma o le toafa o i latou e aofia ai Tenisi, ua maua ni valaauga i le Misiona a Kenya Nairobi.
Ua latou mulimuli i le fautuaga a Elder David A. Bednar o le Korama a Aposetolo e Toasefululua ina ia “avea ma faifeautalai a o le’i taitai tuuina i totonu au pepa o le misiona.”3 Sa latou faia lea e ala i le galulue faatasi o se korama, o se au e sili atu nai lo se isi lava [au].
Sa faatoilaloina e faifeautalai uma e toafa ni luitau ina ia mafai ona latou auauna atu. Sa faamatala mai e Wilberforce, “Sa toetoe lava a leiloa atu lo’u faamoemoe mo le faia o se misiona [ona o le tau], peitai sa ou faitau i le Mataio 6:19–20: ‘Aua tou te toloai oa mo outou i le lalolagi … a ia outou toloai oa mo outou i le lagi.’ O lea faatasi ai ma le maelega ma le tautino atu, sa mafai ai ona ou ausia la’u sini o le auauna atu o se faifeautalai faamisiona. Ese lo’u fiafia i le galuega faafaifeautalai. E leai se mea e sili atu le lelei nai lo le saili muamua o le malo o le lagi.”
Faamoemoe mo le Lumanai
O loo fesoasoani le autalavou i Uganada e atiina ae le malo o le Atua iinei, faatasi ai ma le faamoemoe sili mo le lumanai. E ui ina leai se malumalu i Aferika i Sasae, ae o loo tulimatai pea le autalavou i le taimi o le a latou faaipoipo ai i se malumalu mamao. O se tasi o gaoioiga faalesiteki sa taulai atu i le saunia e ulu i le malumalu, ma i le faaiuga, sa tuuina atu ai e se tasi o le au peresitene o le siteki lana molimau: “E alofa le Atua ia te outou. O outou o le lumanai o le Ekalesia i Uganda.” O nei talavou amiotonu ua i ai sa latou uunaiga maoae.
Ua ositaulagaina e alii ma tamaitai talavou o Uganda ia mea o le lalolagi mo faamanuiaga o le a tumau e faavavau. Ua latou totoina le fatu o le faatuatua ma o loo latou tausia ma le faaeteete (tagai i le Alema 32:33–37). E pei o se laau ua tumu i fua (tagai i le Alema 32:42), ua faasoa atu ai e le autalavou le olioli o le talalelei i lenei laueleele lafulemu.
Luga: O le autalavou o loo auai faatasi i se faeasaite a le siteki.
Luga ae: O Susana (ogatotonu), o se tagata sulufai i Uganda, ua mauaina le toafilemu i le talalelei ma ua aumaia nei nai ona tei ma isi tamaiti i le lotu.
Ogatotonu: O tamaitai talavou o lenei uarota e fiafia e galulue i le Alualu i Luma o le Tagata Lava Ia.
Taumatau: Sa faataatiaese e Tenisi se avanoa i se au soka faapolofesa ina ia talai atu le talalelei. O ia ma isi alii talavou o le korama a ositaulaga ua ositaulagaina ma faatoilaloina luitau ina ia auauna atu i ni misiona.
Ata na pueina e Cindy Smith