Fesili & Tali
“E faapefea ona ou faamalamalama atu i la’u uo o le soli o le tulafono o le legavia o se mea le lelei?”
E finagalo le Tama Faalelagi ina ia tatou fiafia ma agavaa mo Lona Agaga, o lea ua Ia tuuina mai ai tulafono e fesoasoani e faatumau ai o tatou mafaufauga, upu, ma amioga i totonu o tuaoi e tatau ai. O le tulafono o le ola mama e fesoasoani e taofia ai mana o le foafoaga i totonu o tuaoi o le faaipoipoga. O se tasi o mafuaaga ua Ia poloai mai ai ia tau lava o le va o le tane ma le ava e faaaoga ai le mana o le foafoaga aua e “alagatatau ona fananau mai fanau i totonu o noataga o le faaipoipoga.”1
E mafai ona e faasoaina atu se kopi o le Mo Le Malosi o le Autalavou i lau uo. O loo tuuina mai ai ni isi o mafuaaga e lelei ai le tausia o le tulafono o le ola mama: “A e mama mai i feusuaiga, ua e saunia oe lava e osia ma tausia feagaiga paia i le malumalu. E te saunia oe lava e fausia se faaipoipoga malosi ma aumai fanau i le lalolagi o se vaega o se aiga e faavavau ma alolofa. E te puipuia oe lava mai faatamaiaga faaleagaga ma faalelagona lea e oo mai i le faia o uiga feusuai i fafo atu o le faaipoipoga. E te puipuia ai foi oe lava mai faama’i leaga. O le tumau o le mama mai feusuaiga e fesoasoani ia te oe ia e talitonu ia te oe lava ma fiafia moni ma faaleleia ai ou gafatia i le faia o filifiliga lelei i le taimi nei ma i le faavavau.2
O Le Malumalu
Ua i ai i lo tatou Tama Faalelagi se faamoemoega e paia mo i tatou uma, ma o lena faamoemoega e mafai ona faataunuuina i le malumalu. E tatau ona tatou agavaa e ulu atu i le malumalu ina ia mafai ona faamauina ai e faavavau o tatou aiga. O le a tatou toe nonofo faatasi ma lo tatou Tama Faalelagi, ma o le mea e sili ona taua o le a tatou maua se fiafia e le gata, lea e le mafai ona maua e i latou e le agavaa.
Alofa M., 18 tausaga, Samoa
Faaipoipoga ma le Aiga
Ua uunaia i tatou ia mama mai feusuaiga ina ia mafai ona tatou agavaa e ulu atu i le malumalu ma tausi feagaiga paia. Afai tatou te mulimuli i le tulafono o le ola mama, e mafai ona tatou fausia se faaipoipoga ma se aiga malosi i le lumanai. E i ai lava iina i taimi uma Satani e faaosooso i tatou, ae e ala atu i le tatalo, tusitusiga paia, ma uo lelei, e mafai ai ona tatou faatoilalo o ia.
Resty M., 16 tausaga, Filipaina
Taunuuga Le Lelei
E tele taunuuga le lelei o le solia o le tulafono o le ola mama, ae e te le aoaoina na mea uma i le vasega o le soifua maloloina. O le solia o le tulafono o le ola mama e mafai ona tuliesea ai le Agaga mai lou olaga, faatiga ai ia i latou e te latalata i ai, ma e te maua ai ni lagona leaga e uiga ia te oe lava. Ou te fautuaina e matamata i se vitio o Savali Faamamona e ta’u o le “Ola Mama: O A ia Tuaoi?” [i le youth.lds.org i le Faaperetania, Faapotukale, ma le Faasipaniolo].
Matthew T., 17 tausaga, Iuta, ISA
Mama ma le Faaaloalo
O le mulimuli i le tulafono o le ola mama, tatou te tumau ai i le mama i le silafaga a le Atua, tatou te faaaloalo ai ia i tatou lava, ma tatou fesoasoani ai i isi ia faaaloalogia foi i tatou. Afai tatou te usitai i le tulafono o le ola mama, tatou te faaali atu o i tatou o fanau a le Atua ma tatou te taofimau ai i o tatou tulaga faatonuina. O le a tatou aloese ai mai le faanoanoa. Pe a tatou usitai i lo tatou Tama Faalelagi, ae maise lava e faatatau i lenei tulafono, o le a fiafia atu o tatou olaga iinei i le lalolagi ma i le olaga a sau.
Alyana G., 19 tausaga, Filipaina
O Se Meaalofa Paia
Afai e manatu mama i le meaalofa o le foafoaga, o le a taulimaina e pei o se mea masani lenei meaalofa taua mai le Atua. O le tuuina atu o se meaalofa e le lagonaina ai se tauia pe afai o le tagata sa e tuuina i ai e le manatu e taua. E tatau i se tagata ona tausia ma le paia le mana o le foafoaga; aua o i tatou uma o malumalu o le Atua ma e tatau ona tumau lo tatou mama ma le le pona e pei o se malumalu.
Jaron Z., 15 tausaga, Idaho, ISA
O Le Agaga faatasi ma i Tatou
A tumau lou mama mai agasala, o le a sili atu ona e fiafia ma o le a faamanuiaina oe. O o tatou tino e pei o malumalu, ma o le Tama Faalelagi “e le afio o ia i ni malumalu ua le paia” (Alema 7:21). O lea la, a tumau lo tatou mama mai agasala, e mafai e le Agaga ona mafuta ma i tatou.
Maryann P., 14 tausaga, Arkansas, ISA
Fesili Taua
Tali i fesili a lau uo e ala i le fesili atu o nisi o fesili: “Ae faapefea pe afai o loo mataituina oe i le taimi nei e lou toalua i le lumanai?” O tagata uma ua ou faalogo i ai o e ua solia le tulafono o le ola mama ua latou salamo ai. “Ae faapefea pe afai e fesili atu lau tama i le lumanai pe sa e solia le tulafono o le ola mama?” E tatau ona iloa e au uo le taua o le tulafono o le ola mama i le taimi nei, a o le’i fesiliga e se atalii po o se afafine lena fesili. E tatau ona e tausia oe lava ia mama ma lē pona ia e oo atu ai i se olaga fiafia, ma maloloina e aunoa ma ni mea e tausalaina ai i le solia o le tulafono paia.
Robyn K., 13 tausaga, Iuta, ISA
Amio Mama ma le Ola Mama
E fiafia le Alii i le amio mama ma le ola mama, ma e tatau ona tutupu mea uma i lona taimi e tatau ai. O le tulafono o le ola mama o se poloaiga mai le Alii. O le tatalo ma le mafutaga a le Agaga o le tuufaatasiga atoatoa lea e iloa ai o le nofomama o se faamanuiaga.
Selene R., 18 tausaga, Nikarakua
I Totonu o le Faaipoipoga
Ou te faamalamalama atu i la’u uo o le solia o le tulafono o le ola mama o se mea leaga ona o le mana o le foafoaga ua faia mo na o ulugalii ua faaipoipoina faaletulafono. A tatou solia le tulafono o le ola mama, e aluese le Agaga Paia mai i o tatou olaga.
Augustina A., 15 tausaga, Ghana