Mo Le Malosi o le Autalavou
O Le a le Mea e Ta’u o le Uo Moni?
O le faauigaga o se uo ua suia i aso nei i se lalolagi ua fesootai i auala faatekinolosi. O aso nei atonu tatou te manatu faapea ua toatele a tatou “uo.” E sa’o: tatou te fiafia i le mafai ona logoina ma tumau pea le iloa o mea o loo tutupu i olaga o le toatele o a tatou paaga faapea ma a tatou uo o loo i ai ma sa i ai e faapena foi i tagata tatou te le’i feiloai i ai o e ua tatou ta’ua o a tatou uo.
I le anotusi o faasalalauga faaagafesootai, o le upu “uo” e masani ona faaaoga e faamatala ai tagata e fesootai nai lo sootaga. Ua ia te oe le tomai e auina atu ai i au “uo” se savali, ae e le tutusa lea ma le i ai o se sootaga faafesaga’i na o oulua.
O nisi taimi o lo tatou popolega o le i ai o ni uo. Atonu e tatau ona tatou taulai atu i le avea ma se uo.
E tele faauigaga o le mea e ta’u o le avea ma se uo. O le a le galo ia te au le faalogo atu ia Elder Robert D. Hales o le Korama a Aposetolo e Toasefululua o saunoa e uiga i le mea e ta’u o le avea ma se uo ma le faatosinaga malosi a uo i o tatou olaga. O lana faauigaga ua i ai se aafiaga tumau i lo’u olaga. Na saunoa o ia, “O uo o tagata ia latou te faafaigofieina le ola ai i le talalelei a Iesu Keriso.”1 I lenei agaga, o le sailia o le mea e aupito sili ona lelei ai le isi tagata o le aano lea o faauooga moni. O le faamuamuaina o le isi tagata. O le amiosa’o, faamaoni, ma le nofomama a’ia’i i amioga uma. Atonu o le upu tautinoga e matala ai le uiga moni o le faauooga.
Ina ua 15 tausaga o la’u tama o Emi, sa ia faia ai se filifiliga e uiga i le ituaiga o uo o le a ia sailia. O se tasi taeao sa ou matauina ai lana kopi o le Tusi a Mamona sa susue i le Alema 48. Sa ia faailogaina ia fuaiupu na faamatalaina ai le Taitaiau o Moronae: O Moronae o se tagata malosi ma tautaua tele; o ia o se tagata ua atoatoa le malamalama. … Ioe, ma o ia o se tagata sa mausali i le faatuatua ia Keriso” (fuaiupu 11, 13). I autafa sa ia tusia ai, “Ou te fia tafao faamasani ma faaipoipo i se tama e pei o Moronae.” A o ou mataituina Emi ma ituaiga alii talavou sa latou fegalegaleai faatasi ma mulimuli ane tafao faamasani ai ina ua atoa lona 16, sa mafai ona ou iloa sa ia faataitaia foi na lava uiga ma fesoasoani i isi ia ola e tusa ai ma o latou faasinomaga o ni atalii o le Atua, o e umia le perisitua, ma o ni tamā ma ni taitai i le lumanai.
O uo moni latou te faatosinaina i latou o e latou te fegalegaleai ina ia “tutu maualuga teisi a’e [ma] ia lelei teisi atu.”2 E mafai ona outou fesoasoani i le tasi ma le isi, ae maise lava alii talavou, ia outou saunia mo, ma auauna atu i ni misiona faamamaluina. E mafai ona outou fesoasoani i le tasi ma le isi ia tumau le ola mama. O a outou faatosinaga amiotonu ma faauooga e mafai ona i ai se taunuuga e faavavau e le gata i olaga o i latou o e tou te faifaimea faatasi ae faapea foi i augatupulaga a sau.
Sa ta’ua e le Faaola ia Ona soo o Ana uo. Na Ia fetalai:
“O la’u poloaiga lenei, ia outou fealofani, e pei ona ou alofa atu ia te outou.
“E le sili lava le alofa o se tasi i lenei alofa, ia tuuina atu e se tasi lona ola e sui ai ana uo.
“O a’u uo outou, pe afai tou te faia mea uma lava ou te fai atu ai ia te outou.
“Ou te le toe ta’ua outou o auauna; aua e le iloa e le auauna mea e faia e lona alii: a ua ou ta’ua outou o uo; aua ua ou faailoa atu ia te outou mea uma na ou faalogo ai i lo’u Tama” (Ioane 15:12–15; ua faaopoopo le faamamafa).
A o e ola ma faasoa atu le talalelei a Iesu Keriso, o le a e tosina atu tagata ia te oe o e o le a mananao e avea ma au uo—ae le na o se [tagata] e fesootai i luga o site o faasalalauga faaagafesootai ae o le ituaiga o uo na faataitaia e le Faaola e ala i Ana fetalaiga ma Ana faataitaiga. A o e taumafai ia avea ma se uo i isi ma ia faasusulu atu lou malamalama, o au uunaiga o le a faamanuia ai olaga o le toatele o le a outou fegalegaleai. Ou te iloa a o e taulai atu i le avea ma se uo i isi, e pei ona faamalamalamaina mai e perofeta ma faataitaiga i tusitusiga paia, o le a e fiafia ma o le a avea oe ma se uunaiga mo le lelei i le lalolagi ma o le a i ai se aso e te maua ai le folafolaga matagofie ua ta’ua i tusitusiga paia e uiga i faauooga moni: “O lea lava matufaga ua i ai ia te i tatou iinei o le a i ai ia te outou iina, ae o le a na o na faatasia ma le mamalu e faavavau” (MF&F 130:2).
Ata tusi © iStockphoto.com/Fonikum ma Les Nilsson