Tusigāmanatu Konafesi Aperila 2013

“O le mea ua fai atu ai A’u o le Alii, ua Ou fai atu ai; … pe i lo’u lava leo po o i le leo o a’u auauna, ua tutusa lava” (MF&F 1:38).

A o e iloiloina le konafesi aoao ia Aperila 2013, e mafai ona e faaaogaina nei itulau (ma Tusigāmanatu o le Konafesi i lomiga i le lumanai) e fesoasoani ai ia te oe e suesue ma faaaoga aoaoga talu ai nei a perofeta soifua ma aposetolo ma isi taitai o le Ekalesia.

Ina ia faitau, matamata, pe faalogologo foi i lauga o le konafesi aoao, asiasi ane i le conference.lds.org.

Upu a Perofeta e uiga i Mataupu Faavae o Amioga Lelei

“Ua faaali mai e le Atua i Ana perofeta e faapea, o loo i ai mataupu faavae o amioga lelei. O le agasala o le a avea pea ma agasala. O le le usiusitai i poloaiga a le Alii o le a aveesea ai e le aunoa i tatou mai Ana faamanuiaga. O le lalolagi e fesuisuiai soo ma tele ona suiga, ae o le Atua, Ana poloaiga, ma faamanuiaga folafolaina e le suia lava. … E le tatau ona tatou ilo ma fili po o le fea poloaiga ua tatou manatu e taua ona tausia, ae ia talia poloaiga uma a le Atua. E tatau ona tatou tutu mausali ma tutumau, ma ia talitonu atoatoa i le tumau o le Alii ma talitonu atoatoa i Ana folafolaga.”

Elder L. Tom Perry o le Korama a Aposetolo e Toasefululua, “O Le Usiusitai i le Tulafono o le Saolotoga Lea,” Liahona, Me 2013, 88.

Valaaulia Faafaifeautalai: Pu’e le Galu

• “Outou le tupulaga talavou, opogi la outou mataupu aoaoina fou ma aoao atu e le tasi le isi i mataupu a Iesu Keriso. O lo outou taimi lenei e sauniuni ai e aoao atu isi e uiga i le agalelei o le Atua.

• “Alii ma tamaitai talavou, e matua taua tele le a’otauina o outou. … Matou te fautuaina oe e tuu i totonu lau talosaga e lesitala ai i le aoga e te filifilia ao lei amataina lau misiona.

• “Outou matua, faiaoga, ma isi, pu’e le galu ao outou tapenaina a outou tupulaga faiae ia agavaa mo le galuega faafaifeautalai. O le taimi nei, o o outou soifuaga amiotonu o le a faatosina maia le naunau o a outou uo ma tuaoi.

• “Outou tagata matutua, pu’e le galu e ala i le tapenaina faaleagaga, faaletino, ma mea tautupe mo faifeautalai i le lumanai.

• “Outou ulugalii matutua, ia outou fuafua mo le aso o le a mafai ai ona outou o ia outou misiona.

• “O peresitene o siteki ma epikopo … ua umia ki o le tiutetauave mo le galuega faafaifeautalai i a latou iunite.

• “Outou taitai misiona o uarota … o le sootaga i le va o tagata o le au paia ma faifeautalai i lenei galuega paia o le laveai mai o fanau a le Atua.”

Elder Russell M. Nelson o le Korama a Aposetolo e Toasefululua, “Pu’e le Galu,” Liahona, Me 2013, 45, 46.

Faatumu le Avanoa

1. “O le a le maua lava e le pogisa le manumalo i le ____________ o Keriso” (Dieter F. Uchtdorf, “O Le Faamoemoe o le Malamalama o le Atua,” Liahona, Me 2013, 77).

2. “O le Ekalesia o se ____________ lea e mafai ai e soo o Keriso ona maua ai le filemu” (Quentin L. Cook, “Filemu o le Tagata Lava Ia: O Le Taui lea o le Amiotonu,” Liahona, Me 2013, 34).

3. “O i tatou o e ua i ai tino faaletino ua i ai le __________ i tagata o e e le o i ai [ni tino faaletino]” (Boyd K. Packer, “O Nei Mea Ua Ou Iloa,” Liahona, Me 2013, 8).

4. “A tatou lafoai le tuuto ma le faamaoni a’ia’i i a tatou ________________, ua tatou aveesea le kelu e taofiofia faatasi lo tatou lalolagi” (L. Tom Perry, “Obedience to Law Is Liberty,” Liahona, Me 2013, 87).

5. “Afai e le o oe o se faifeautalai faamisiona e i ai se pine faifeautalai e faamau i lou pelaue, o le taimi la lenei e vali ai se pine i lou ____________” (Neil L. Andersen, “O Se Vavega Lava,” Liahona, Me 2013, 78).

Tali: 1.malamalama; 4.sulufaiga; 3. mana; 4. paaga faaipoipo; 5. loto.

Ia Atamai i le Ala o E Opogi ai Tekinolosi

• “O le faasoaina atu o le talalelei, na amatalia ai e ni talavou i Boston ni nai poloka (blogs). O i latou na auai i le Ekalesia sa amata lo latou aoaoina i luga o le initoneti, na sosoo ai ma talanoaga ma faifeautalai. … Sa fai mai se tasi o i latou, ‘E le o se galuega faafaifeautalai lenei. O se fiafiaga faafaifeautalai.’”¹

• “Aisea e le filifilia ai se taimi i aso taitasi e aluese ai mai i mea faatekinolosi ae fesootai atu i le tasi ma le isi? Na o le tape lava o mea uma.”²

• “Faailoga mau taua i lau masini ma ia toe alu soo i ai e faitau. … O le a le umi ae outou taulotoina ni mau se fia selau. O na fuaitau o le a faamaonia le avea ma punavai malosi o musumusuga ma taitaiga a le Agaga Paia i taimi o faafitauli.”³

Faamatalaga

1. Elder Neil L. Andersen, “O Se Vavega Lava,” Liahona, Me 2013, 79.

2. Rosemary M. Wixom, “O Upu Tatou Te Tautatala Ai,” Liahona, Me 2013, 82.

3. Richard G. Scott, “Mo Le Filemu i le Aiga,” Liahona, Me 2013, 30.

Fesoasoani Atu i E Matitiva ma lē Tagolima

“I le faaaogaina o tupe e foai mai e tagata limafoai o le ekalesia, e auina atu ai e Le Ekalesia a Iesu Keriso o le Au Paia o Aso e Gata Ai ia taumafa, lavalava, ma isi mea taua e fesoasoani ai i le mafatia o tagata matutua ma tamaiti i le lalolagi atoa. O nei foai alofa, e faitau fiaselau miliona tala i le sefulu tausaga talu ai, e faia e aunoa ma se mafaufau i ni lotu, lanu, po o atunuu. … I le luasefululima tausaga talu ai, ua tatou fesoasoani atu ai i le toeitiiti atoa le 30 miliona tagata i atunuu e 179.”

Elder Dallin H. Oaks o le Korama a Aposetolo e Toasefululua, “O Soo o Keriso,” Liahona, Me 2013, 98.

• Tala mai le Konafesi