I Lana Lava Taimi, i Lana Lava Ala
Mai se lauga na tuuina atu i peresitene fou o misiona i le aso 7 o Iuni, 2001.
O faaaliga o se mea moni lava. E oo mai i le ala a le Alii ma e tusa ai ma le faatulagaga o taimi a le Alii.
Ou te fia vailiilia nisi o mataupu faavae ia e faatatau i fesootaiga uma mai le Agaga—o fesootaiga i le tagata o loo aoao atu, i le tagata o loo saili e aoaoina, ma i tagata uma o le Ekalesia.
Muamua, e tatau ona tatou iloaina o le a fetalai mai le Alii ia i tatou e ala mai i le Agaga i Lana lava taimi ma i Lana lava ala. E toatele tagata e le o malamalama i lenei mataupu faavae. Latou te talitonu e faapea seiloga lava latou te saunia ma i le taimi e talafeagai ma o latou tulaga, ona mafai lea ona latou valaau atu i le Alii ma o le a Ia vave tali mai, e oo lava i ala patino ua latou malilie i ai. E le oo mai faaaliga i lena ala.
Agavaa mo Faaaliga
O le mea taua i soo se taumafaiga e maua se faaaliga, o se tautinoga lea e faia mea uma tatou te mafaia i a tatou lava taumafaiga ma faaiuga. O lona uiga e manaomia ona tatou auauna atu ma galulue.
O le agaigai i luma i a tatou auaunaga ma galuega o se ala taua lea e agavaa ai mo faaaliga. I au suesuega o tusitusiga paia ua ou matauina ai, o le tele o faaaliga i fanau a le Atua e oo mai i taimi latou te galulue ai, e le o taimi latou te nofonofo ai i o latou apitaga ma faatalitali i le Alii e ta’u atu ia i latou le laasaga muamua e faia.
Mo se faataitaiga, e taua le matauina o le faaaliga lea ua lauiloa nei “o le Afioga ma le Finagalo o le Alii e faatatau i le tolauapiga a Isaraelu” (MF&F 136:1) sa lei tuuina atua i Navu a o fuafuaina e le Korama a le Toasefululua le malaga tele mai Navu i na aso faanoanoa lea na sosoo ma le Faamaturoina o le Perofeta i le 1844; sa lei tuuina atu foi i le auvai i sisifo o le Vaitafe o Misisipi. Sa tuuina atu i Uinita Kuota, Nebraska, ina ua uma ona faaalu e le Au Paia se tausaga faigata na malaga mai ai i le itu sisifo o Navu ma sopo atu i Iowa i tolauapiga le tumau i le Vaitafe o Misuri. O le faaaliga ina ia taiala le malaga a le Au Paia e sopoia laufanua valevalenoa na tuuina mai i le Aso 14 o Ianuari, 1847, ina ua pasia e le Au Paia pe tusa o le tasi vaetolu o le ala i vanu o atumauga.
O le a tatou mauaina uunaiga a le Agaga pe a tatou faia mea uma tatou te mafaia, pe a tatou galulue i fafo i le la nai lo le nofonofo i le paolo ma tatalo mo se taitaiga po o le a le laasaga muamua e fai. E oo mai faaaliga i taimi e galulue ai fanau a le Atua.
O lea la tatou te faia ai mea uma tatou te mafaia. Ona tatou faatalitali lea i le Alii mo Lana faaaliga. Ua i ai lana lava taimi faatulagaina.
Taimi ma le Ituaiga
Pe tusa ma le 35 tausaga talu ai, a o avea au ma peresitene o le Iunivesite o Polika Iaga, sa matou faia ai ni fuafuaga e tauanau ai le peresitene o le Iunaite Setete e saunoa i le iunivesite. Sa i ai o matou taimi patino e talafeagai lelei mo i matou ma ua matou manatu i ni mea matou te mananao e saunoa atu ai o ia ma faia a o i ai o ia iina. Ae sa lava le atamai o i matou uma e iloa ai sa le mafai ona matou faafesootaia le au taitai maualuluga i le Iunaite Setete ma valaaulia o ia e susu mai i le lotoa o le BYU—ma saunoa atu i le 26,000 tagata—ma faia ai ni tuutuuga i lona susu atu.
Sa matou iloa a valaaulia le peresitene, e tatau ona matou faapea atu, “O le a matou talia lau susuga i soo se aso e mafai ona e susu mai ai, ma soo se taimi e te finagalo e te susu mai ai atoa ai ma soo se mea e te finagalo e saunoa ai ma fai a o e i ai iinei. O le a matou fetuunaia a matou fuafuaga ma faatulagaga atoa i lau asiasiga.”
Ia, afai o le ala lena e tatau ona talosagaina ai e se nuu o tagata e 26,000 le pule silisili o se malo, e le o se mea la e ofo ai le faapea e leai se tulaga o se tagata e toatasi—po o le a lava le taua e i ai—e tuu ai ni tuutuuga pe faia ai ni taimi patino mo se asiasiga po o se fesootaiga mai le Pule Silisili i le atulaulau.
O le mea moni, o le mataupu faavae lenei a le Alii ua faaalia mai i Lana fanau i le faaaliga sili ua lomia i le vaega e 88 o le Mataupu Faavae ma Feagaiga. Na fetalai mai le Alii, “Faalatalata mai ia te au ma o le a Ou faalatalata atu ai ia te outou; saili mai ia te au ma le filiga ma o le a outou maua ai au; ole mai ma o le a outou maua ai; tu’itu’i mai, ma o le a tatala atu ai ia te outou” (fuaiupu e 63).
O le isi, na tautino mai e le Alii afai e tautasi o tatou mata i Lona mamalu, o le a faatumulia o tatou tino atoa i le malamalama ma o le a mafai ona tatou malamalama ai i mea uma. Ona sosoo lea, ma Lana faatonuga lea na faaauau i le folafolaga sili lenei: “O lea, ia outou faapaia outou lava ina ia tau-tasi o outou mafaufau i le Atua, ma e oo mai aso o le a outou vaai ai ia te ia; ona o le a afe ese e ia le veli mai ona fofoga ia te outou, ma o le a faia lena mea i lona lava taimi, ma i lana lava ala, ma e tusa ai ma lona lava finagalo” (fuaiupu 68; faaopoopo le faamamafa).
O le mataupu faavae ua taua i lena faaaliga ua faatatau lea i fesootaiga uma mai lo tatou Tama Faalelagi. E le mafai ona tatou fai faamalosi ni mea faaleagaga e tutupu.
I le tele lava o tulaga, o le “i lana lava ala” e le o le papa o faititili po o le emo o uila ae o le mea o loo taua e tusitusiga paia o le “leo filemu ma le itiiti” (1 Tupu 19:12; 1 Nifae 17:45; MF&F 85:6). Ua aveseseina e nisi lenei mataupu faavae. O se taunuuga, ua matuai saili atoa ai nisi mo se faaaliga maoae ua faamaumauina i tusitusiga paia ma ua le mafai ai ona iloaina le “leo filemu ma le itiiti” lea e tuu atu ia i latou. E tai pei lava lenei mea o le fai o la tatou faaiuga o le a tau o se faiaoga e avaavau tatou te aoao mai ai, ae o le a tatou mumusu e faalogo atu i aoaoga e sili atu ona taua pe a tuuina mai i se musumusu.
E manaomia ona tatou iloaina e seasea lava fetalai leotele mai le Alii. O Ana savali e toetoe lava oo mai i taimi uma i se musumusu.
Faaaliga o se Faamalamalamaga ma le Filemu
O se tasi o faamalamalamaga aupito silisili o le auala e aoao mai ai le Agaga ia i tatou o loo i ai lea i le faaaliga na tuu atu ia Oliva Kaotui i Haremoni, Penisilevania, ia Aperila 1829. I le faaaliga lenei na ta’u atu ai e le Alii ia Oliva:
“Ioe, faauta, o le a Ou ta’u atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto.
“O lenei, faauta, o le agaga lenei o faaaliga” (MF&F 8:2–3; faaopoopo le faamamafa).
E faapena foi, ina ua ta’ua e le Perofeta o Iosefa Samita le agaga o faaaliga o le “atamai mama aiai,” lea e “mafai ona e maua ai ni manatu e vave oo atu i lou mafaufau.”1 I se isi faaaliga, sa faamanatu atu ai ia Oliva na ia ole atu i le Alii ma “o le tele o taimi na e ole mai ai na e maua ai faatonuga mai lo’u Agaga” (MF&F 6:14). Na faapefea ona oo mai lena faatonuga? “Faauta,” na fetalai mai ai le Alii, “ua e iloa na e ole mai ia te a’u ma sa Ou faapupulaina lou mafaufau” (fuaiupu 15; faaopoopo le faamamafa). O lena lava aoaoga e tasi sa toe tuu mai i se faaaliga ia Ailama Samita lea na fetalai mai ai le Alii, “E moni, e moni, Ou te fai atu ia te oe, o le a Ou faaali atu ia te oe ‘ai lo’u Agaga, lea o le a faapupula ai lou mafaufau, lea o le a faatumulia ai lou agaga i le olioli” (MF&F 11:13; faaopoopo le faamamafa). O faamatalaga sili ia e uiga i le ala e fesootai mai ai le Alii ia i tatou e ala i Lona Agaga.
I se isi faatonuga ia Oliva Kaotui, sa faamanatu atu ai e le Alii ia te ia e uiga i le taimi sa ia tatalo ai ina ia ona iloaina “le moni o nei mea” (MF&F 6:22). Ma sa faamatala mai e le Alii le auala na Ia taliina ai lena tatalo ma tuu atu se faaaliga ia Oliva: “Ou te lei tautala atu ea le filemu i lou mafaufau e uiga i le mataupu? O le a se molimau sili atu e mafai ona e maua mai lo lena mai le Atua?” (fuaiupu 23; faaopoopo le faamamafa).
Mai nei faaaliga ua tatou iloa ai e aoao mai e le Atua i tatou e ala i le mana o Lona Agaga, lea e faapupulaina o tatou mafaufau ma tautala mai le filemu ia i tatou e uiga i fesili ua tatou ole atu ai.
Faaaliga o Se Lagona
Ua tatou aoao foi mai nei faaaliga e faapea o le aoaoina e le Agaga e le o se mea e tupu fua. E masani lava o fesootaiga a le Alii e le oo mai sei vagana ua tatou suesueina mataupu i o tatou lava mafaufau. Ona tatou mauaina lea o se faamautinoaga.
Sa faamalamalama atu lea faagasologa ia Oliva Kaotui i se isi faaaliga na maua i Haremoni, Penisilevania, ia Aperila 1829. Sa faamatala atu e le Alii le mafuaaga na le mafai ai ona faaliliu e Oliva le Tusi a Mamona:
“Faauta, sa e le malamalama; sa e manatu o le a Ou tuu atu ia te oe lena mea, ae e te lei mafaufau i ai ae na o lou ole mai ai ia te a’u.
“Ae, faauta, Ou te fai atu ia te oe, e ao ina e suesue i ai i lou mafaufau; ona ao lea ona e ole mai ia te au pe ua sao, ma afai ua sao, o le a Ou faia ia mu lou loto i totonu ia te oe; o lea, o le a e lagona ai ua sao” (MF&F 9:7–8; faaopoopo le faamamafa).
Atonu o se tasi lenei o aoaoga aupito sili ona taua ma sili foi ona malamalama sese i ai i le tusi atoa o le Mataupu Faavae ma Feagaiga. O aoaoga a le Agaga e tele lava ina oo mai o ni lagona. O lena mea moni e matua sili ona taua, ae e malamalama sese lava i ai nisi o tagata i lona uiga. Ou te iloa ni tagata e manatu latou te lei mauaina lava se molimau mai le Agaga Paia ona latou te lei lagonaina lava o latou loto “ua mu i totonu” o i latou. O le mu o le loto, ou te fautua atu, e le o se lagona o se vevela o le tino e pei o mu ae o se lagona o le filemu ma le mafanafana ma le toafimalie ma le lelei.
Faaaliga E Le Tumau
O faaaliga e le tumau. O le ala a le Alii e tuu ai faatapulaa pe faafia ona Ia fetalai mai ia i tatou e ala i Lona Agaga. I le le malamalama ai i lenei mea, ua taitai sese ai nisi i lo latou faamoemoe o le a maua faalausosoo ia faaaliga.
I le faaalia ai o lona finagalo e uiga i ala e galue ai le Agaga, sa saunoa ai Peresitene Boyd K. Packer, le Peresitene o le Korama a Aposetolo e Toasefululua, “Ua ou aoaoina o aafiaga malolosi, ma le uunaia e le oo mai faalausosoo ia i tatou.”2
Ina ia faaali atu lena manatu, mafaufau i le mea ua tatou aoaoina e uiga i o tatou uluai matua ina ua tuliesea mai le Faatoaga o Etena ma tapunia i fafo mai le afioaga o le Alii. Na tuu atu e le Alii ia Atamu se poloaiga e tatau ona ia osi atu taulaga i uluai manu o ana lafu e fai ma taulaga i le Alii. Na ia usiusitai. Pe na fesootai vave le Alii ma ia? O loo tau mai i tusitusiga paia: “Ma ina ua mavae aso e tele sa oo mai se agelu a le Alii ia Atamu” (Mose 5:6; faaopoopo le faamamafa).
Sa saunoa mai William E. Berrett, o se tasi o faiaoga lelei tele o le talalelei, o le sa avea o se taitai i le BYU faapea ai ma le Ofisa o Aoga a le Ekalesia, i le mea lenei e uiga i le mataupu o faaaliga tumau ma faifai pea: “O i latou e tatalo ina ia tuu atu vave e le Agaga ia i latou se taitaiga i mea iti uma, ua latou lafoina i latou lava i agaga leaga ia e foliga mai ua saunia i taimi uma e tali mai i a tatou olega ma tatou le mautonu ai. … O tagata ua ou iloa ua sili ona le mautonu i lenei Ekalesia o i latou ia o e saili atu i faaaliga patino i mea uma lava. Latou te mananao i le faamautinoaga patino mai le Agaga mai lava i le taeao e oo i le po i mea uma latou te faia. Ou te faapea atu o i latou o tagata aupito sili ona le mautonu ua ou iloa ona e foliga mai i nisi taimi o le tali e sau mai le punavai sese.”3
Sa saunoa foi le Perofeta o Iosefa Samita i se mea faapea. Pe a “faatoga atu [le Au Paia] i le nofoalii o le alofatunoa,” sa ia fautua mai ai, e le tatau ona latou faia i ni mataupu e leai se taua ae e tatau ona “tatalo atu ma le naunautai mo meaalofa silisili.”4 O se mataupu faavae taua lena. Tatou te tatalo pea lava pea mo le taitaiga, ae e le tatau ona tatou faamoemoe i ni faaaliga faifai pea. Tatou te faamoemoeina faaaliga faifai pea, o le faamautinoaga faifai pea lena o faaaliga i soo se taimi lava tatou te saili atu ai i le taitaiga ma ia tonu o tatou tulaga ina ia filifili ai le Alii atamai ma agaalofa e tuu mai ia i tatou.
Faaaliga ma le Molimau
E Tutupu Faaaliga. E faalogoina ia siufofoga mai tala atu o le veli. Ua ou iloa lenei mea. Ae o nei aafiaga e tulagaese. Ma a tatou mauaina se aafiaga maoae ma tulagaese, e seasea ona tatou talanoaina faalauaitele ona ua faatonuina i tatou e aua le faia (tagai MF&F 63:64) ma ona ua tatou malamalama o le a tapunia ala o faaaliga pe afai tatou te faaali atu nei mea i luma o le lalolagi.
O le tele o faaaliga e oo mai i taitai ma tagata o le Ekalesia e oo mai e ala i le “leo filemu ma le itiiti” pe auala mai i se lagona nai lo se faaaliga vaaia po o se leo lea e tautala mai i ni upu patino i o tatou taliga. Ou te molimau atu i le moni a’ia’i o lena ituaiga o faaaliga, lea ua ou iloaina o se aafiaga masani, e oo lava i aso taitasi, e taiala ai i tatou i le galuega a le Alii.
O le le malamalama ai i nei mataupu faavae o faaaliga, e tolopo ai e nisi tagata le faailoa o a latou molimau po o lo latou alualu i luma faaleagaga sei vagana ua tupu se mea faavavega. Latou te le iloaina o le toatele o tagata—aemaise i latou na ola ae i le Ekalesia—o le faaaliga taua e tuuina mai ai ia i tatou se molimau, e le o se mea e tupu aloaia ae o se faagasologa. Na matauina e Elder Bruce R. McConkie (1915–85): “O le toe fanaufouina o se mea e faasolosolo malie, vagana ai i nai mea tumaoti e matua ofoofogia tele e ala ai ona tusia i tusitusiga paia. Ae tusa ai ma le tulaga lautele o tagata o le Ekalesia, e toefanauina i tatou i sina vaega, e toefanauina i tatou i se malamalama ua faaopoopo ma se naunautaiga faaopoopo mo le amiotonu a o tatou tausia poloaiga.”5
E tatau ona tatou malamalama o le a fetalai mai le Alii ia i tatou i Lana lava taimi ma i Lana lava ala. E masani lava o le uiga lea o le mea ua taua e tusitusiga paia o le “leo filemu ma le itiiti” o le faamalamalamaga. E tele lava ina moomia ona tatou faatino i luga o la tatou faautautaga sili, e faalagolago i uunaiga faatonutonu a le Agaga pe afai ua tatou se ese ma tapulaa faatagaina.
O faaaliga o se mea moni lava. E oo mai i le ala a le Alii e tusa ma le taimi faatulagaina a le Alii.
Ou te molimau atu e moni nei mea. Ua i ai ia i tatou le meaalofa o le Agaga Paia, o le aia tatau lea i le mafutaga faifai pea ma le Agaga o le Alii e molimau i le Tama ma le Alo, e taitai atu ai i tatou i le upumoni, e aoao ai i tatou i mea uma, ma ia aumai ai mea uma i lo tatou manatuaga (tagai Ioane 14:26; 16:13).
Mai faaaliga ia Ailama Samita (faaalia i luga) ma Oliva Kaotui, ua tatou iloa ai e aoao e le Atua i tatou e ala i le mana o Lona Agaga, lea e faapupulaina ai o tatou mafaufau ma tautala mai ai le filemu ia i tatou e uiga i fesili tatou te ole atu ai.
Sa lei vave fesootai mai le Alii ia Atamu ina ua ia usiusitai i le poloaiga e osi atu se taulaga i uluai manu o ana lafu. Ua faapea mai tusitusiga paia, “Ma ina ua mavae aso e tele sa oo mai se agelu a le Alii ia Atamu” (Mose 5:6).