O Le Auala a le Taitai i Faaaliga
Ua faasoa mai e taitai perisitua ma ausilali i le lotoifale ni mataupu faavae se fa ua fesoasoani ia i latou e galulue ai i musumusuga i o latou valaauga.
“Ina ua faatoa valaauina au, sa ou lagonaina le lofituina,” sa saunoa ai se peresitene o se paranesi lea ua auauna nei mo le tele o tausaga. “Sa ou maua le faatuatua o loo silafia e le Tama Faalelagi le auala e faamanuiaina ai tagata o le au paia ma o latou aiga, ae mafai faapefea ona ou iloaina le mea o Ia finagalo patino ai mo au e fai e fesoasoani ai ia i latou?”
Sa silafia e le peresitene ni mataupu faavae se lua na faamalosia ai o ia o se tagata liliu mai i le Ekalesia ma se tamā talavou: suesueina o tusitusiga paia ma le tatalo. O lea na ia faatinoina ai ma se faamoemoega ua faafouina.
“A o ou faia, sa ou lagonaina e tatau ona ou faitauina le mea o tau mai i le Mataupu Faavae ma Feagaiga 9:8, e ‘suesue i ai i lou mafaufau; ona ao lea ona e ole [atu i le Alii] pe ua sao.’ Ina ua ou toe faitauina na upu, sa ou iloaina ua leva lava ona taialaina au e le Alii i luga o le auala i faaaliga.”
O le auala lena e tatau ona malaga ai taitai uma ina ia mataalia ai i o latou valaauga. Ma a o latou saili atu i musumusuga ia latou te agavaa i ai, latou te aoao pea lava pea e i ai mataupu faavae patino o le talalelei ia e faafaigofieina ai le oo mai o le taitaiga faalelagi. O mataupu faavae la nei e fa o ia mataupu faavae.
1. Fefautuaai Faatasi
“Sa ou mauaina e tusa lava pe ou te lagonaina se musumusuga malosi e fai se mea, ou te maua lava se faamautinoaga pe a ou talanoaina faatasi ma ou fesoasoani,” o le tala lea a se tasi tina sa avea muamua ma se peresitene o le Aualofa o se paranesi. “O nisi taimi e na ona la faamautu mai lava ua la lagonaina lea lava lagona e tasi, ona matou agai ai lea i luma i le lotogatasi. Ae o nisi taimi sa la fesoasoani mai ia te au ia ou iloa mea sa ou le iloaina, ma na mafai ona matou fesuiaia se mea sa matou faia po o le manatu mamafa atili i le auala na matou faia ai. Ae matou te agai pea lava i luma i le lotogatasi.”
O loo maua foi fautuaga e ala i le siaki atu i tusitaulima, suesue i savali o konafesi aoao, ma tatalo i le faatuatua.
“O nisi o fautuaga aupito silisili ou te mauaina e oo mai pe a ou faitauina ma toe faitauina ia lauga mai le konafesi aoao,” o le tala lea a se peresitene o Tamaitai Talavou a se uarota. “Ma a ou tootuli e tatalo, ou te ole atu i le Tama Faalelagi e uiga i mea sa ou suesue i ai ma le auala e faaaoga ai aoaoga a perofeta soifua ma ausilali aoao e fesoasoani ai i tamaitai talavou.”
Sa saunoa se fesoasoani i se au peresitene o le Aoga Sa a se siteki, “Pe a matou fono o se au peresitene, matou te iloiloina lava i taimi uma se fuaitau puupuu i le Tusitaulima 2: Taitaiina o le Ekalesia. A o matou iloiloina soo ia faatonuga ua uma ona matou mauaina, e fesoasoani mai lava le Agaga ia i matou e tumau i se maliliega e ogatusa ma taiala.”
“E tele lou mafanafana i le mea moni e faapea o le Ekalesia a le Alii o se ekalesia o fonotaga,” na saunoa ai se peresitene o le siteki. “O se aafiaga tulagaese le pulefaamalumalu ai i fonotaga lea e tatalo faatasi ai tagata e tele ni tomai ma ni poto masani ua tuufaatasia ona talanoaina lea o le auala silisili e faagaoioia ai. O a latou uunaiga e mafai ai ona ou mafaufau i isi auala, faalogo i le Agaga, ona maua ai lea o le talitonuga atoa i le tuuina atu o la’u faaiuga i l e Alii.”1
O nisi taimi o le sailia o se fautuaga o lona uiga o le sailia o se tasi e i ai ni tomai sili atu. “Sa ou taumafai e fesoasoani i se aiga na i ai ni faafitauli tautupe, ma sa uunaia au e fai atu ia i latou e talanoa atu i se uso i le uarota o ia o se faufautua mo mea tautupe,” o le tala lea a se epikopo e lei leva ona faamalolo. “Sa mafai ona ia fesoasoani atu ia i latou i ala e matua le mafai lava ona ou faia.”
Na faamatalaina mai e se isi epikopo le aafiaga lenei, o lē sa fautua mai e faapea e manaomia ona faatagaina e epikopo isi taitai o le uarota e siitia i luga ma faia o latou tiute: “Sa manao se tasi o tina ua maliu lana tane ina ia asia o ia e le epikopo ia le itiiti ifo ma le faatasi i le vaiaso. I lona mafaufau, ua lava lava na o se asiasiga mai le epikopo. Sa ou taumafai e asia o ia i le tele e mafai ai, ae sa tele ou tiutetauave, e aofia ai se aiga talavou. Mulimuli ane, faatasi ai ma se tasi o ou fesoasoani, sa ou toe alu ai e vaai o ia.
“A o ma talanoa, sa ou lagonaina le uunaiga e fai atu, “Tuafafine pele, e te silafia i le avea ai ma ou epikopo ou te alofa ia te oe. Ma ona ou te alofa tele ia te oe, ua ou talosagaina ai ni alii e umia le Perisitua Mekisateko se toalua ma ni o tatou tuafafine lelei tele o le Aualofa e toalua ia asiasi mai ia te oe ia le itiiti ifo ma le faatasi i le masina, pe faatele foi pe a manaomia. O le a latou lipoti mai pe afai e i ai ni ou manaoga po o ni atugaluga. Pe lelei lena? ‘Oi ioe, epikopo,’ sa ia tali mai ai. Sa ou fesili atu pe na te fia iloaina o latou igoa, ma sa ia fai mai ioe. Ina ua ou tau atua ia te ia, sa ia fai mai, ‘O i latou na o ou faiaoga o aiga ma faiaoga asiasi!’ Ma sa ou fai atu, ‘Ua e malamalama nei la i le ala na faavaeina e le Alii mo i tatou e leoleo ai ia te oe.’”
2. Faalogo atu ma le Totoa
Ua saunoa mai foi taitai o le tomai e faalogo ai ma iloatino e fesoasoani tele lea i le sailia o musumusuga.
“A o matou fono ai ma uso, ou te taumafai lava e faalogo atili atu nai lo na o upu o loo latou saunoa ai,” o le tala lea a se peresitene o le Aualofa. “O nisi taimi e ala mai i le Agaga e mafai ona ou lagonaina o loo latou manaomiaina se fesoasoani. Ou te lagona le faamanuiaina o le vaaia i o latou mata pe lagonaina foi i o latou uiga. O nisi taimi ou te faapea atu lava, ‘O au o lou peresitene o le Aualofa, ma ou te lagonaina o loo e manaomiaina se mea. E mafai faapefea ona ou auauna atu ia te oe?’ Ou te lagona e tele lava ina ou maua musumusuga e ala i le fesili, ‘O le a se mea e ono faia e le Faaola?”
“Ou te talisapaia le ala e faalogo mai ai lo matou epikopo i uso i le aufono a le matou uarota,” o le tala lea a se peresitene o le peraimeri. “E fesili mai lava o ia i taimi uma po o a ni o matou lagona ona ia faalogo lea ma le totoa i mea uma matou te fai atu ai. E tele taimi na te faapea mai ai, ‘E ao ona tatou manatuaina e tele lava malamalamaaga e oo mai i āvā, i tina, ma i tuafafine nofofua.’”
“E manaomia foi ona tatou manatua o le faalogo e aofia ai le faalogo atu i le Agaga,” o le tala lea a se taitai vaega o faitaulaga sili. “O le iloiloga aupito sa’o o le faamanuiaina o se taitai atonu o lona mafaia lea ona lagona ma mulimuli i le Agaga. O loo faatinoina e Peresitene Monson lenei mea i le tele o taimi.”2
3. Tutu i Nofoaga Paia
Ua iloa foi e taitai e i ai nofoaga patino e faafaigofie ai ona maua ia faaaliga.
“Mo au lava ia, o le nofoaga silisili e lagona ai musumusuga o totonu o le malumalu,” o le saunoaga lea a se fesoasoani i se au epikopo. “Pe a ou manao ia lagona le latalata atu i le Alii, ou te alu i Lona maota ina ia mafai ai ona ou lagonaina le saoloto mai popolega ma taulai atu i le faalogologo atu i le Agaga.”
“E i ai so’u potu i lo’u fale ua atofaina e fai ma o’u ofisa,” o le tala lea a se peteriaka a se siteki. “Ua ou ole atu i le Alii e fesoasoani mai ia avea lea potu ma se nofoaga e mafai ona afio ai le Agaga. Pe a ou sauni e tuu atu se faamanuiaga, ou te alu iina ma tatalo ai. O iina foi e fai ai au faatalanoaga ma tuu atu ai faamanuiaga.”
“O o tatou falelotu ua faapaiaina e avea ma ni nofoaga o tapuaiga,” sa fai mai ai se epikopo. “O nisi taimi i se afiafi o se aso aunoa, pe a ou fia lagonaina le filemu, ou te nofonofo ai i totonu o le falesa. Ou te mafaufau i tagata o le uarota ma le tele o le alofa o le Faaola mo i latou. Po o nisi taimi ou te usuina ai se viiga.”
“Mo au o le Peraimeri o se nofoaga paia,” sa fai mai ai se isi epikopo. “Pe a ou fia lagonaina le fiafia ma le uunaia, ou te alu ma nonofo faatasi ma tamaiti o le Peraimeri a o latou pepese. E faagaeetia ai lava lou loto i taimi uma.”
“O le tatalo e mafai ona faia soo se nofoaga ia paia,” sa fai mai ai se peresitene o Alii Talavou o se paranesi. “Mafaufau i faaaliga na oo mai i le Perofeta o Iosefa a o i ai o ia i le Falepuipui o Liperate. Sa mafai ona ia faia o se nofoaga paia e ala i le valaau atu i le Alii.”
4. Galue i le Pule
“O nisi tagata o le matou uarota sa lei mamafa ia i latou ia valaauga,” sa fai mai ai se epikopo. “Sa ou lagonaina e mafai ona ou fesoasoani atu ia i latou e ala i le faamalamalama atu i ai o le auala sa matou tatalo ai, o se au epikopo, ia iloaina po o ai e tatau ona valaauina ma faapena ona matou maua ai se tali. Sa ou manao ia latou iloaina na valaauina i latou e le Alii, e auala mai i taitai o i ai le pule. Sa faia ai se eseesega tele lava ina ua latou iloaina na musuia o latou valaauga ma ua faamoemoeina i latou e le Alii ia latou saili atu foi i musumusuga ina ia mafai ai ona faalauteleina lena valaauga.
Sa malaga o ia ma ona fesoasoani i le auala i faaaliga, o se auala o loo matala atu i tagata uma o le Ekalesia ma taitai. Ma e ala i le faamatalaina o le auala na latou faimalaga ai, na latou uunaia ai foi isi.